ދުންފަތާއި ދުންފަތުގެ އުފައްދާފައިވާ ތަކެތީގެ ވިޔަފާރީ ކުރެވޭ އެންމެ ހަގު އުމުރު 18 އިން 21 އަހަރަށް ބަދަލުކުރާ ތާރީހުގެ ގޮތުގައި ނޮވެމްބަރު 15، ކަނޑައަޅައިފި އެވެ.
ދުންފަތާއި ސިނގިރޭޓު ގަނެވޭ އުމުރަށް ބަދަލުގެންނަން މަޖިލީހަށް ހުށަހަޅުއްވާނެކަން ރައީސް ޑރ. މުހައްމަދު މުއިއްޒު އިއުލާނުކުރެއްވީ ރޭގަ އެވެ.
ދުންފަތާއި ދުންފަތުގެ އުފައްދާފައިވާ ތަކެތީގެ ވިޔަފާރީ ކުރެވޭ އުމުރު މަތިކުރާ އިސްލާހު ހިމަނާފައިވަނީ ވޭޕު ކުރުމަށް ބޭނުން ކުރާ ތަކެއްޗާއި އޭގެ ވަކިވަކި ބައިތައް ރާއްޖެއަށް އެތެރެ ކުރުމާއި ބޭނުން ކުރުމާއި ވިޔަފާރި ކުރުން މަނާކުރުން ހިމެނޭ ގޮތަށް ހެންވޭރު އުތުރު ދާއިރާގެ މެންބަރު އަހުމަދު އައިފާން މިއަދު މަޖިލީހަށް ފޮނުވި ބިލުގަ އެވެ.
ދުންފަތް ކޮންޓްރޯލް ކުރުމާ ބެހޭ ގާނޫނަށް އިސްލާހު ހުށަހެޅުމަށް ފޮނުވި މި ބިލަށް އަމަލުކުރަން ފަށާ ތާރީހެއްގެ ގޮތުގައި އޮތީ ނޮވެމްބަރު 15، އެވެ.
އިސްލާހުގައިވަނީ ކުރިން 18 އަހަރުން ދަށުގެ ކުދިންނަށް ދުންފަތުގެ އުފެއްދުންތައް ވިއްކުމާއި އެތަކެތީގެ ވިޔަފާރީގައި ބައިވެރިކުރުން މަނާ ކަމަށް އޮތް މާއްދާ 21 އަހަރުން ދަށުގެ މީހުންނާއި ކުދިންނަށް ބަދަލުކުރުމެވެ. އަދި ވިޔަފާރިކުރާ ތަންތަނުގައި ދުންފަތުގެ އުފެއްދުންތައް ވިއްކާ އުމުރު އަންގައިދޭ ލިޔުން ބިލުގެ ދަށުން އިސްލާހު ކުރުން މަޖުބޫރުވާނެ އެވެ.
އެ ނިންމުން އިއުލާނުކުރައްވަމުން ސޯޝަލް މީޑިއާ ޕޯސްޓެއްގައި ރައީސް މުއިއްޒު ރޭ ވިދާޅުވީ އެގޮތަށް ނިންމެވީ ޒުވާނުން ދުންފަތުގެ ގޯސް އާދައިން ދުރުކުރުމަށް ކަމަށެވެ.
ވޭޕު މަނާކުރުމުގެ އިތުރުން ސިނގިރޭޓު އަދި އެހެން ވަސީލަތްތައް ބޭނުންކޮށްގެން ދުންފަތުގެ އިސްތިއުމާލު ކުރުން ކޮންޓްރޯލް ކުރުމާއި ދުންފަތުގެ ބާވަތްތައް ރާއްޖެ އެތެރެކުރުމާއި ވަގަށް ސްމަގްލް ކުރުން ހުއްޓުވުމަށް ވެސް މި ބިލުގައި ގިނަ ކަންތައްތަކެއް ހިމަނާފައިވެ އެވެ.
އަދި ވޭޕު އެތެރުކޮށް، އޭގެ ވިޔަފާރިކޮށް، ބޭނުންކުރާ މީހުންނަށް ބޮޑެތި ޖޫރިމަނާތަކެއްވެސް އަންނާނެ ގޮތަށް މި ބިލުގައި ގިނަ އިސްލާހުތަކެއްވެސް ހުށަހަޅާފައިވެ އެވެ.
