ވޭޕު ކުރުމަށް ބޭނުން ކުރާ ތަކެއްޗާއި އޭގެ ވަކިވަކި ބައިތައް ރާއްޖެއަށް އެތެރެ ކުރުމާއި ބޭނުން ކުރުމާއި ވިޔަފާރި ކުރުން މަނާކުރައްވަން ރައީސް ޑރ. މުހައްމަދު މުއިއްޒު ނިންމެވުމާ ގުޅިގެން, ވޭޕު ބޭނުންކުރުން މަނާކުރާ ތާރީހު ނޮވެމްބަރު 15، އަށް އަވަސްކޮށް ގާނޫނަށް ގެންނަން ޖެހޭ ބަދަލުތައް ގެނައުމަށް ސަރުކާރުން ރައްޔިތުންގެ މަޖިލީހަށް ބިލެއް ފޮނުވައިފި އެވެ.
ދުންފަތް ކޮންޓްރޯލް ކުރުމާ ބެހޭ ގާނޫނަށް އިސްލާހު ހުށަހެޅުމަށް މަޖިލީހަށް މި ބިލު ފޮނުވީ ވެރިކަންކުރާ ޕީއެންސީއަށް ނިސްބަތްވާ ހެންވޭރު އުތުރު ދާއިރާގެ މެންބަރު އަހުމަދު އައިފާން އެވެ.
ސޯޝަލް މީޑިއާގައި ކުރެއްވި ޕޯސްޓެއްގައި ރާއްޖެއަށް ވޭޕު އެތެރެކުރުން މަނާކުރާނެ ކަމަށް ރައީސް ވިދާޅުވީ ނޮވެމްބަރު 15، އިން ފެށިގެންނެވެ. އަދި، ރާއްޖޭގައި ވޭޕު ބޭނުންކުރުމާއި ގެންގުޅުން މަނާކުރާނެ ތާރީހެއްގެ ގޮތުގައި އިއުލާނުކުރެއްވީ ޑިސެމްބަރު 15، އެވެ.
ނަމަވެސް މަޖިލީހަށް ހުށަހެޅި ބިލަށް އަމަލުކުރަން ފަށާ ތާރީހުގެ ގޮތުގައި އޮތީ ނޮވެމްބަރު 15، އެވެ. އިތުރު ތާރީހުތަކެއް ބިލުގައި ދީފައެއް ނުވެ އެވެ.
ބިލުގައިވާގޮތުން މި އިސްލާހާއެކު ރާއްޖެއަށް އިލެކްޓްރޯނިކް ސިނގިރޭޓާއި ވޭޕު އަދި ވޭޕުކުރަން ބޭނުންކުރާ ތަކެތި އެތެރެކޮށްފިނަމަ އެ ފަރާތެއް 50،000ރ. އިން ޖޫރިމަނާކުރެވޭނެ އެވެ. އަދި، އެތެރެކުރާ ކޮންމެ ވޭޕަކަށް އިތުރު 10،000ރ. ގެ މަގުން ޖޫރިމަނާ އިތުރުކުރެވޭނެ އެވެ.
މީގެއިތުރުން، މި އިސްލާހާއެކު ރާއްޖޭގައި ވޭޕު ވިއްކާ ކޮންމެ ފަރާތެއް ޖޫރިމަނާ ކުރެވޭނީ 20،000ރ. އިންނެވެ. އަދި، ވިއްކި ކޮންމެ ވޭޕަކަށް 10،000ރ. ގެ ޖޫރިމަނާއެއް ކުރެވޭނެ ކަމަށްވެސް ބިލުގައިވެ އެވެ.
ވޭޕު މަނާކުރުމަށްފަހު ހިލޭ ވޭޕެއް މީހަކަށް ދިނަސް 10،000ރ. ގެ ޖޫރިމަނާއެއް އަދި ބޭނުންކުރާ ކޮންމެ މީހަކަށް 5،000ރ. ގެ ޖޫރިމަނާއެއް އަންނާނެ ކަމަށްވެސް ސަރުކާރުން ހުށަހެޅި ބިލުގައި ބުނެފައިވެ އެވެ.
ވޭޕު މަނާކުރުމުގެ އިތުރުން ސިނގިރޭޓު އަދި އެހެން ވަސީލަތްތައް ބޭނުންކޮށްގެން ދުންފަތުގެ އިސްތިއުމާލު ކުރުން ކޮންޓްރޯލް ކުރުމާއި ދުންފަތުގެ ބާވަތްތައް ރާއްޖެ އެތެރެކުރުމާއި ވަގަށް ސްމަގްލް ކުރުން ހުއްޓުވުމަށް ވެސް މި ބިލުގައި ގިނަ ކަންތައްތަކެއް ހިމަނާފައިވެ އެވެ.
މި ބިލު ފާސްވެ ތަސްދީގުކުރުމަށް ނަގާ މުއްދަތުގައި ވޭޕާއި އިލެކްޓްރިކް ސިނގިރޭޓުން ނަގާ އިމްޕޯޓު ޑިއުޓީ ބޮޑުކުރަންވެސް ސަރުކާރުން ވަނީ މަޖިލީހަށް ބިލެއް ހުށަހަޅާފަ އެވެ. އެ ބިލު ބަލައިގަނެ މިއަދު ވަނީ ކަމާބެހޭ ކޮމިޓީއަށް ފޮނުވާފަ އެވެ.
ސަރުކާރުގެ މި ނިންމުމާއެކު ވޭޕު އަދި އެފަދަ އާލަތްތަކުގެ ވިޔަފާރިކުރާ ފަރާތްތަކުން ދަނީ ނުރުހުން ފާޅުކުރަމުންނެވެ. އެގޮތުން އެ ފަރާތްތަކުގެ ފިހާރަތައް ބަންދުކޮށް އިއްޔެ ވަނީ މަޖިލިސް ދޮށުގައި މުޒާހަރާއެއް ވެސް ކޮށްފަ އެވެ.
