ސިނގިރޭޓާއި ދުންފަތުން ޓެކްސް ބޮޑު ކުރަން ތާއީދުކޮށް، ދުންފަތުގެ އިސްތިއުމާލު ކުރުން ހުއްޓާލަން އަޒުމް ކަނޑައަޅުއްވާފައިވާ ކަމަށް، މިހާރު ވެސް ދުވާލަކު ދެ ފޮށި ސިނގިރޭޓު ހުސް ކުރައްވާ ވެލިދޫ ދާއިރާގެ މެންބަރު މުހައްމަދު އައްބާސް މިއަދު ވިދާޅުވެއްޖެ އެވެ.
ޓެކްސް ބޮޑު ކުރުމުގެ ބިލަށް މަޖިލީހުގައި މިއަދު ވާހަކަ ދައްކަވަމުން އައްބާސް ވިދާޅުވީ ދުންފަތާއި ސިނގިރޭޓުން ޓެކްސް ބޮޑު ކުރުމަކީ ގައުމުގެ މުސްތަގުބަލަށް މުހިންމު ނިންމުމެއް ކަމަށެވެ. އަދި ވިދާޅުވީ އޭނާ މިހާރު ނިންމަވައިގެން ހުރީ ޓެކްސް ބޮޑު ކުރާ ދުވަހުން ފެށިގެން ދުންފަތުގެ އިސްތިއުމާލު ކުރުން ހުއްޓާލަން ކަމަށެވެ.
"މިފަދަ ވަގުތެއްގައި މިފަދަ ހަރުދަނާ ގައުމީ ނިންމުމެއް ނިންމެވީތީ ވަޒީރުންގެ މަޖިލީހަށް ދިވެހިރާއްޖޭގެ އިއްޒަތްތެރި ރައީސުލްޖުމްހޫރިއްޔާއަށް އިހުލާސްތެރިކަމާއެކު ޝުކުރު އަދާ ކުރަން،" އައްބާސް ވިދާޅުވި އެވެ. "އަޅުގަނޑަކީ ދުވާލަކު ދެ ފޮށި ސިނގިރޭޓު މިހާރު ވެސް ބޯ މީހެއް. ނޮވެމްބަރު 15، ވަނަ ދުވަހުން ފެށިގެން މާތް ﷲ ގެ ތަނަވަސް ރަހުމަތާއެކު ސިނގިރޭޓު ބުއިން ހުއްޓާލަން އަޅުގަނޑު ނިންމައިފިން."
ރައީސް ޑރ. މުހައްމަދު މުއިއްޒު ވިދާޅުވެފައި ވަނީ ދުންފަތާއި ސިނގިރޭޓުން ނަގާ ޓެކްސް ނޮވެމްބަރު 1، އިން ފެށިގެން ބޮޑު ކުރައްވާނެ ކަމަށެވެ. ރައީސް ނިންމެވީ ސިނގިރޭޓަކުން މިހާރު ނަގާ 3ރ. ގެ ޓެކްސް އަށް ރުފިޔާއަށް ބަދަލުކޮށް، ދުންފަތުގެ އެހެން ބާވަތްތަކުން ނަގާ ޑިއުޓީ 50 ޕަސެންޓު ބޮޑު ކުރުމަށެވެ. މަޖިލީހަށް އިއްޔެ ހުށަހަޅައިގެން މިއަދު ބަހުސް ކުރާ ބިލުގައި ވެސް އޮތީ އެގޮތަށް ޓެކްސް ބޮޑު ކުރުމަށެވެ.
އޭގެ އިތުރުން، ވޭޕް އާއި ވޭޕުގެ ބާވަތްތައް މަނާ ކުރަން ވެސް ސަރުކާރުން ވަނީ ނިންމައިފަ އެވެ. ސަރުކާރުން ނިންމާފައި ވަނީ ނޮވެމްބަރު 15، އިން ފެށިގެން ވޭޕް އެތެރެ ކުރުން މަނާކޮށް، ޑިސެމްބަރު 15، އިން ފެށިގެން ވޭޕް ބޭނުން ކުރުން ވެސް މަނާ ކުރުމަށެވެ.
ޓެކްސް ބޮޑުކުރުމުގެ ބިލަށް މިއަދު ބަހުސް ކުރި އިދިކޮޅު މޯލްޑިވިއަން ޑިމޮކްރެޓިކް ޕާޓީގެ މެންބަރުން ވަނީ، ދުންފަތުން ނަގާ ޓެކްސް ބޮޑު ކުރުމުން ދުންފަތް ބޭނުން ކުރާ މީހުންގެ އަދަދު މަދުވާނެތޯ ސުވާލު އުފައްދައިފަ އެވެ. އަދި ރައްޔިތުން ހޭލުންތެރިނުކޮށް، ޓެކްސް ބޮޑު ކުރުމުން ނުކުންނާނެ ނަތީޖާއާމެދު ވެސް އެމްޑީޕީގެ މެންބަރުން ސުވާލު އުފެއްދި އެވެ.
"ސިނގިރޭޓުގެ ޑިއުޓީ ބޮޑުކުރާތީ ވެސް އަޅުގަނޑު ކަންބޮޑުވަނީކީ ނޫން. އަޅުގަނޑު މި ދަންނަވަނީ ބޮޑު ކުރާ ޑިއުޓީއަކުން ނަތީޖާއެއް ނުފެނެއޭ. ނަންބަރުތަކުން އެކަން އެ ހުރީ ސާފުކޮށް ފެންނާށޭ،" ވައިކަރަދޫ ދާއިރާގެ މެންބަރު ހުސެއިން ޒިޔާދު ވިދާޅުވި އެވެ.
ރާއްޖޭގައި 2019 ވަނަ އަހަރު ހެދި ސްޓެޕްސް ސާވޭއިން ދައްކާ ގޮތުގައި ރާއްޖޭގެ ކޮންމެ ހަތަރު މީހަކުން އެކަކީ ދުންފަތުގެ އިސްތިއުމާލު ކުރާ މީހެކެވެ. އަދި ދުންފަތް ބޭނުން ކުރާ ކުޑަކުދިންގެ އަދަދު ވެސް މަތިކަން ދިރާސާއިން ދައްކަ އެވެ. ކުޑަކުދިން އެންމެ ގިނައިން ބޭނުން ކުރަނީ ވޭޕެވެ.
