ރައްޔިތުންގެ މަޖިލީހުގައި ތިއްބެވި ޕީއެންސީގެ މެންބަރުންނަށް ރައީސް ޑރ. މުހައްމަދު މުއިއްޒު ރިޝްވަތު ދީގެން ގަނެލާފައިވާ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ރޭ ބޭއްވި ޕީއެންއެފްގެ ޖަލްސާގައި މެންބަރުންނަށް ރިޝްވަތު ދީފައިވާ ވާހަކަ ޔާމީން ފާހަގަ ކުރެއްވީ މަޖިލީހުގައި ޕީއެންސީގެ ސުޕަ މެޖޯރިޓީ އޮތަސް، އެ މެންބަރުން ކުރިން ކަންބޮޑުވި އިންޑިއާއާ ގުޅޭ މައްސަލަތައް ނުބަލާނެކަމާއި އިންޑިއާއާއެކު ހަދާފައިވާ އެއްބަސްވުންތައް ހާމަކުރަން މަޖިލީހުން ވެސް މަސައްކަތް ނުކުރާނެ ކަމަށް ވިދާޅުވުމަށް ފަހު އެވެ.
"މިހާރު އެ މީހުންނަށް އެ ލިބޭ ރިޝްވަތުގެ ލާރިކޮޅު އެ މީހުންނަށް މުހިއްމު އެބަވޭ. މަޖިލީހުގެ މުސާރައިގެ އިތުރަށް ކޮންމެ މަހަކު އެދޭ 50،000 ރުފިޔާ ނުވަތަ 75،000 ރުފިޔާ. ރައީސުލްޖުމްހޫރިއްޔާ އެ ތިބީ ރައްޔިތުންގެ މަޖިލީހުގެ މެންބަރުންކޮޅު ހަމަ ރިޝްވަތު ދީގެން ގަނެލައިގެން ނޫންތޯ،" ޔާމީން ވިދާޅުވި އެވެ.
ރައީސް މުއިއްޒުގެ ފަރާތުން ޕީއެންސީގެ މަޖިލިސް މެންބަރުންނަށް ފައިސާ ދޭ ވާހަކައަކީ "ކަނޑައެޅިގެން ހަގީގަތާ ހިލާފު ދޮގު ހަބަރެއް" ކަމަށް ރައީސް އޮފީހުގެ ތަރުޖަމާނު ހީނާ ވަލީދު ވަނީ ވިދާޅުވެފަ އެވެ.
ޔާމީން ވިދާޅުވި ގޮތުގައި ފުރަތަމަ ގަނެލީ ނިމިގެން ދިޔަ މަޖިލީހުގައި ތިއްބެވި އެމްޑީޕީގެ 13 މެންބަރެކެވެ.
މިހާ މުޑުދާރުކޮށް ކަންކަން ކުރިއަށް ގެންދާއިރު އިންޑިއާގެ އެއްބަސްވުންތައް ހާމަކުރާނެ ކަމަށް ކުރިން ވަކާލާތުކޮށްފައި އޮތަސް، އެއްވެސް އެއްބަސްވުމެއް މިހާރު ނުދައްކާނެ ކަމަށް ޔާމީން ވިދާޅުވި އެވެ.
މި ސަރުކާރުން އިންޑިއާއާއެކު ހެދި އެއްބަސްވުންތައް ކުރިއަށް ވުރެ ނުރައްކާ ކަމަށް ވެސް އެމަނިކުފާނު ވިދާޅުވި އެވެ.
"މިހާރު މިއޮތީ އަޅުގަނޑުމެންގެ ސަރުކާރު. ހަމަ ކުރީގައި ކޮށްފައި އޮތް އެގްރީމެންޓު އެއަށް ވުރެ ދިވެހިރާއްޖެއަށް ނުރައްކާ ވާގޮތަށް އެއޮތީ އެ އެގްރީމެންޓުކޮށް ނިންމާފައި. މިހާރު މަޖިލީހުގައި ވެސް އެ ތިބީ އަޅުގަނޑުމެންގެ މީހުން. ކޮން އެގްރީމެންޓެއް ދައްކާނީ. އެގްރީމެންޓު ގެންނާކަށް ވެސް ނޫޅޭ. އެގްރީމެންޓު ހޯދާކަށް ރައްޔިތުންގެ މަޖިލީހުގެ 241 ކޮމިޓީއަކުން ވެސް މަސައްކަތެއް ނުކުރޭ. އަދި އެހެން ކޮމިޓިއަކުން ވެސް މަސައްކަތް ނުކުރޭ،" ޔާމީން ވިދާޅުވި އެވެ.
ކުރީ ސަރުކާރުން އިންޑިއާއާއެކު ސޮއިކުރި އެއްބަސްވުންތަކުގެ މައްސަލަ ބެލުމަށް ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީ (241 ކޮމިޓީ) އަށް، ހިތަދޫ މެދު ދާއިރާގެ މެންބަރު އަހްމަދު އަޒާން ހުށަހެޅުއްވި މައްސަލަ ކުރިއަށް ނުގެންގޮސް، ބާއްވާފައި އޮންނަތާ މިހާރު ވަނީ ހަތަރު މަސްވެފަ އެވެ.
އިންތިހާބުގައި ރައީސް މުއިއްޒު އާއި ޕީޕީއެން/ޕީއެންސީން އިންޑިއާއާ ގުޅޭ ގޮތުން ދެއްކި އެއްވެސް ވާހަކައެއް އަދި ތަންފީޒެއް ނުކުރެ އެވެ.
އިންޑިއާގެ ހެލިކޮޕްޓަރާއި ޑޯނިޔާ މަތިންދާ ބޯޓެއް ފޮނުވައެއް ނުލަ އެވެ. ހަމައެކަނި ކުރި ކަމަކީ އެ އުޅަނދުތައް ދުއްވަން އަސްކަރީ ޔުނިފޯމުގައި ތިބި މީހުންގެ ބަދަލުގައި، އިންޑިއާގެ ހިންދުސްތާން އޭރޮނެޓިކްސް ކުންފުނީގެ އެއްބަސްވުމުގައި ތިބި އިންޑިއާ މީހުން ގެނައުމެވެ.
