މިއާމީ، ޔުނައިޓެޑް ސްޓޭޓްސް (އޮކްޓޫބަރު 20) - ދުނިޔޭގައި އުފެދުނު އެންމެ މޮޅު އެއް ފުޓްބޯޅަ ކުޅުންތެރިޔާ، ލިއޮނަލް މެސީ އަށް ފުރުސަތު ފަހިވާ ގޮތަށް، އޭނާ ކުޅެމުން އަންނަ އިންޓަ މިއާމީ އަށް ފީފާ ކްލަބް ވޯލްޑް ކަޕުން ފުރުސަތު ދޭން ދުނިޔޭގެ މައި ފުޓްބޯޅަ އިދާރާ، ފީފާ އިން ނިންމައިފި އެވެ.
އިންޓަ މިއާމީ އަށް ޖާގަ ދެނީ، އަންނަ އަހަރު ފީފާ ކްލަބް ވޯލްޑް ކަޕް ބާއްވާ ގައުމު، ހައިސިއްޔަތުންނެވެ. އެކަމަކު، އެ ޖާގަ ލީގު ނުނިމެނިސް ދިނުމުން ގިނަ ބަަޔަކު ވަނީ ސުވާލު އުފައްދައިފަ އެވެ.
މެސީގެ ހެޓްރިކާ އެކު، ނިއު އިންގްލެންޑް އަތުން 6-2 އިން މިޔާމީ މޮޅުވި މެޗަށް ފަހު، ފީފާގެ ރައީސް ޖިއާނީ އިންފަންޓީނޯ ދެއްކެވި ވާހަކައިގައި އިއުލާނުކުރެއްވީ، އަންނަ އަހަރު ކްލަބް ވޯލްޑް ކަޕް ފަށާ މެޗުގައި އިންޓަ މިއާމީ ކުޅޭނެ ކަމަށެވެ.
އެމެރިކާގެ ފުޓްބޯޅަ ލީގު، މޭޖަ ލީގު ސޮކާ (އެމްއެލްއެސް)ގެ ޗެމްޕިއަނުން ކަނޑައަޅާނީ ކުރިއަށް އޮތް ޕްލޭއޮފަށް ފަހު އެވެ. އެކަމަކު، ޕްލޭއޮފް ވެސް ނުފަށައި، ރެގިއުލާ ސީޒަން ނިމުމާ އެކު، ސަޕޯޓާސް ޝީލްޑް ހޯދި މިއާމީ އަށް ކްލަބް ވޯލްޑް ކަޕްގެ ޖާގަ ދިނީ، އެ މުބާރާތުގައި މެސީ ފެންނަން ފީފާ އިން ބޭނުންވާތީ ކަމަށް މީޑިއާތަކުން އަންނަނީ ރިޕޯޓްކުރަމުންނެވެ.
މިއާމީން ސަޕޯޓާސް ޝީލްޑް ހޯދީ ރެގިއުލާ ސީޒަނުގެ އެންމެ ގިނަ ޕޮއިންޓް ހޯދި ޓީމުގެ ރެކޯޑާ އެކު އެވެ. އެކަމަކު، ލީގުގެ 29 ޓީމުން ވެސް ވަނީ، ސީޒަން ފެށުމުގެ ކުރިން، ރެގިއުލާ ސީޒަން ކާމިޔާބުކުރާ ޓީމަކަށް ކްލަބް ވޯލްޑް ކަޕްގެ ޖާގައެއް ދޭނެކަން އިއުލާނުކޮށްފައިނުވާތީ ކަންބޮޑުވުން ފާޅުކޮށްފަ އެވެ.
އެމްއެލްއެސް ސީޒަން ނިމޭނީ، ޑިސެމްބަރު ހަތް ވަނަ ދުވަހު ކުޅޭ ޕްލޭއޮފް ފައިނަލުންނެވެ. ޕްލޭއޮފް ފަށާނީ މި މަހު އެވެ.
މީގެ ކުރިން، ކްލަބް ވޯލްޑް ކަޕް ބޭއްވީ ބައްރުތަކުގެ ޗެމްޕިއަނުންގެ މެދުގަ އެވެ. މަދު ކްލަބްތަކަކާ އެކު ކުޅޭ މި މުބާރާތުގެ ޗެމްޕިއަންކަން، ޔޫރަޕްގެ ޓީމުތަކުން ހޯދާފައިވަނީ އެންމެ ގިނަ ވެގެން ތިން މެޗު ކުޅެގެންނެވެ. އެ ގޮތުން، މެސީ ވަނީ ބާސެލޯނާއާ އެކު، އެ މުބާރާތުގެ ތަށި ތިން ފަހަރެއްގެ މަތިން ހޯދައިފަ އެވެ.
ފީފާ އިން އަންނަ އަހަރު ކްލަބް ވޯލްޑް ކަޕް ފުޅާކޮށްލައިގެން، 32 ޓީމާ އެކު ބާއްވަނީ، މާލީ މަންފާ އަށް ބޮޑަށް ވިސްނުމަށް ފަހު ކަމަށް މީޑިއާތަކުން ތުހުމަތުކުރެ އެވެ. އަދި ކުޅުންތެރިންގެ ސިއްހަތަށް ނުބަލައި، ފީފާ އިން ފުޓްބޯޅަ ކަލަންޑަރަށް ބަދަލު ގެނެސް މުބާރާތްތަކާއި މެޗުތައް އިތުރުކުރާ މައްސަލައިގައި، ބައެއް ކުޅުންތެރިން ތިބީ ހަޅުތާލެއް ކުރަން ވެސް ތައްޔާރަށެވެ.
އަންނަ އަހަރު ފީފާ ކްލަބް ވޯލްޑް ކަޕް ބާއްވަން ތާވަލުކޮށްފައިވަނީ، ޖޫން 15 އިން ފެށިގެން ޖުލައި 13 އަށެވެ.
