އޭޝިއާގެ 17 އަހަރުން ދަށުގެ މުބާރާތުގެ ކޮލިފައިންގައި މިއަދު ކުޅުނު މެޗުން ބޫޓާނުން ދެ ގޯލު ޖަހާފައިވަނިކޮށް، މުހައްމަދު އިލާން އިމްރާން ޖެހި ދެ ގޯލުން ރާއްޖޭން 2-2 އިން އެއްވަރުކޮށްފި އެވެ.
ޗައިނާގެ ޑާލިއާން ޔޫތު ފުޓްބޯލް ޓްރެއިނިން ދަނޑުގައި ކުޅުނު މި މެޗުގައި ބޫޓާނުން ވަނީ ދެ ވަނަ ހާފުގެ ކުރީކޮޅުގައި ދެ ގޯލު ޖަހައިފަ އެވެ. އެ ގޮތުން، މެޗުގެ 52 ވަނަ މިނިޓްގައި ބޫޓާނުގެ ފުރަތަމަ ލަނޑު ޖެހީ، 50 ވަނަ މިނިޓްގައި ކުރިއަށް ކުޅޭ ސަޔޯން ލާމާ އެވެ. އަދި އޭގެ 12 މިނިޓް ފަހުން އެ ޓީމުގެ، ތިންލޭ ޔަޒޭރު ވަނީ ލަނޑެއް ޖަހައި، އެ ޓީމުގެ ލީޑުފުޅާކޮށްދީފަ އެވެ.
ރާއްޖޭގެ ފުރަތަމަ ލަަނޑު އިލާން ޖެހީ، 70 ވަަނަ މިނިޓްގަ އެވެ. އޭގެ 11 މިނިޓް ފަހުން، އިލާން ވަނީ އިތުރު ގޯލެއް ޖަހައި އެއްވަރުކޮށްދީފަ އެވެ.
މިދިޔަ އަހަރު ބޫޓާނުގައި ކުޅުނު 17 އަހަރުން ދަށުގެ ސާފް ޗެމްޕިއަންޝިޕްގައި ރާއްޖޭން ވަނީ 3-2 އިން ބޫޓާން ބަލިކޮށްފަ އެވެ.
ފަސް ޓީމު ވާދަކުރާ މި ކޮލިފައިން ގްރޫޕްގައި ރާއްޖެ ކުޅޭ ދެ ވަނަ މެޗުގައި މާދަމާ ނޫން އަނެއް ދުވަހު ބައްދަލުކުރާނީ ބަހުރޭންއާ އެވެ. ތިން ވަނަ މެޗުގައި، ބުދަ ދުވަހު ދެކުނު ކޮރެއާއާ ކުޅުމަށް ފަހު، ހުކުރު ދުވަހު ގްރޫޕްގެ ފަހު މެޗުގައި ޗައިނާއާ ބައްދަލުކުރާނެ އެވެ.
ރާއްޖޭން 2022 ވަނަ އަހަރު ކުޅުނު 17 އަހަރުން ދަށުގެ ކޮލިފައިން ނިންމާލީ ޕޮއިންޓެއް ނުލިބި ހަތަރު މެޗުން ބަލިވެގެންނެވެ. އެ ފަހަރު، ކުވެއިތު އަތުން 6-0، އިންޑިއާ އަތުން 5-0، ސައުދީ އަރަބިއްޔާ އަތުން 9-0 އިން އަދި މިޔަންމާ އަތުން 7-0 އިން ވަނީ ބަލިވެފަ އެވެ.
