ފަލަސްތީނުގެ ރައްޔިތުންގެ ދިފާއުގައި ހަނގުރާމަކުރަމުން ދަނިކޮށް އިޒްރޭލުން ހަމާސްގެ ލީޑަރު، ޔަހުޔާ ސިންވާރު އަވަހާރަކޮށްލުން މެލޭޝިއާގެ ބޮޑުވަޒީރު އަންވަރު އިބްރާހިމް ކުށްވެރިކުރައްވައިފި އެވެ.
މިކަމާ ގުޅުވައި އަންވަރު "އެކްސް" ގައި ކުރެއްވި ޕޯސްޓެއްގައި ވިދާޅުވީ އަނިޔާވެރިކޮށް ސިންވާރު އަވަހާރަކޮށްލުމުގެ ހިތާމައިގައި ބައިވެރިވެ، އެކަން ހަރުކަށި އިބާރާތުން ކުށްވެރި ކުރާ ކަމަށެވެ.
"މެލޭޝިއާއިން ސިންވާރު އަވަހާރަކޮށްލުން ހަރުކަށި އިބާރާތުން ކުށްވެރި ކުރަން. އޭގެ ނަތީޖާއަކަށް ވާނީ ހަމާސްގެ ބެލުމުގެ ދަށުގައިވާ މީހުން ދޫކޮށްލުމުގެ ޑިމާންޑު ފުރިހަމަ ނުވުން،" އަންވަރު ވިދާޅުވި އެވެ.
އަންވަރު އިތުރަށް ވިދާޅުވީ މީގެން އަންގައިދެނީ ސުލްހަ ގާއިމު ކުރުމުގައި ބައިނަލްއަގުވާމީ މުޖުތަމައު ފެއިލްވެފައިވާ ކަމަށާއި ސިންވާރު މަރާލުމުން ހާލަތު އިތުރަށް ގޯސްވާނެ ކަމަށެވެ. އަދި އިޒްރޭލުން ފަލަސްތީނާ ދެކޮޅަށް ހިންގަމުންދާ ގަތުލްއާންމު ވަގުތުން ވަގުތަށް ހުއްޓާލަން ވެސް އެމަނިކުފާނުގެ ޕޯސްޓުގައި ގޮވާލައްވާފައިވެ އެވެ.
މިދިޔަ އަހަރުގެ އޮކްޓޯބަރު 7، އިން ފެށިގެން ހިންގާ ގަތުލްއާންމުގައި މިހާތަނަށް ފަލަސްތީނުގެ 42،500 މީހުން މަރުވެފައިވާއިރު، އޭގެ ތެރޭގައި ގިނައީ ކުޑަކުދިންނާއި އަންހެނުންނެވެ.
އިޒްރޭލުން އަންނަނީ ފަލަސްތީނުގެ އިތުރުން ލުބްނާނަށް ވެސް މެދުނުކެނޑީ ހަމަލާތައް ދެމުންނެވެ. އެ ހަމަލާތަކުގައި މަރުވި މީހުންގެ އަދަދު މިހާރު ވަނީ 2،000 އަށް ވުރެ އިތުރުވެފަ އެވެ.
އިޒްރޭލުން ދެމުން އަންނަ ހަމަލާތައް ހުއްޓާލުމަށް ބައެއް ގައުމުތަކުން ގޮވާލި ނަމަވެސް، މިހާތަނަށް އިޒްރޭލުން އެކަމަށް އިޖާބަ ނުދެ އެވެ. އަދި އެމެރިކާއިން އަންނަނީ އިޒްރޭލަށް ވާގިވެރިވެ، ހަނގުރާމަ ކުރިއަށް ގެންދަން ހަތިޔާރު ފޯރުކޮށްދެމުންނެވެ.
