އާސަންދަ ސްކީމްގެ ތެރެއިން އީވް ކްލިނިކުން ދޭ ހިދުމަތްތަކުގައި މައްސަލަތަކެއް ފާހަގަކުރެވިގެން ސަސްޕެންޑްު ކުރުމަށްފަހު އެ މައްސަލަތައް ބަލައި ސަސްޕެންޝަން އުވާލައިފި އެވެ.
މިކަމާއި ގުޅިގެން "އަދަދު" ނޫހާ ވާހަކަ ދައްކަމުން އާސަންދައިގެ އެމްޑީ އައިމިނަތު ޒީނިޔާ ވިދާޅުވީ މައްސަލަތައް ބެލުމަށްފަހު ބޯޑުން ނިންމީ އީވް ކްލިނިކްގެ ސަސްޕެންޝަން އުވާލުމަށެވެ.
"ބޯޑުން ނިންމީ އާސަންދައިން އީވް ކްލިނިކަށް ކުރި ސަސްޕެންޝަން އުވާލުމަށް. އެގޮތަށް ނިންމީ އެ މައްސަލަތައް ބެލުމަށްފަހު. މިހާރު ވެސް ބައެއް މައްސަލަތައް ރިވިއު ކުރަމުން ދަނީ" ޒީނިޔާ ވިދާޅުވި އެވެ.
އާސަންދައިން އީވް ކްލިނިކް ސަސްޕެންޑް ކުރީ އޮގަސްޓް 12، ގަ އެވެ. އަދި އީވް ކްލިނިކް އާ ގުޅިގެން މައްސަލަތަކެއް ބަލަމުންދާ ކަމަށް ޒީނިޔާ ވިދާޅުވީ އޮގަސްޓް 20، ގަ އެވެ.
އީވް ކްލިނިކްގެ މި ސަސްޕެންޝަން އުވާލާފައިވަނީ އޮކްޓޯބަރު 14، ގަ އެވެ.
ނުހޯދާ ހިދުމަތަކުން އާސަންދައަށް ބިލް ކުރި މައްސަަލަތަކެއްގައި މީގެ ކުރިން ވެސް އާސަންދައިން ވަނީ ބައެއް ކްލިނިކްތައް ސަސްޕެންޑުކޮށްފަ އެވެ.
އެގޮތުން މި އަހަރު ޖެނުއަރީ މަހު ޔޫރޯ މެޑިކަލް ކެއާ، ޑރ. ފިލް ފާމަސީ އަދި ސްޓެމް ސެންޓާ ވަނީ ސަސްޕެންޑުކޮށްފަ އެވެ.
މި އަހަރު ސަސްޕެންޑުކުރި ކްލިނިކްތަކުގެ މައްސަލަ އަންނަނީ ތަހުގީގު ކުރަމުންނެވެ.
