ރައްޔިތުންގެ މަޖިލީހުގެ ރައީސްގެ ރަސްމީ ގެކޮޅު، މުރައިދޫ ގައި މަސައްކަތްކުރާ މުވައްޒަފުންގެ ތަފުސީލުތައް ހާމަނުކުރަން މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އިން ނިންމައިފި އެވެ.
އެ ތަފުސީލުތައް ހޯދަން މަޖިލީހަށް ހުށަހަޅާފައި ވަނީ މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން ކަމަށް ބެލެވެ އެވެ. މިކަން މައްސަލައެއްގެ ގޮތުގައި ބަލަން ފެށީ އެ ހުށަހެޅުންތަކާ ގުޅިގެން މަޖިލިސް އިދާރާއިން 241 ކޮމިޓީއަށް ސިޓީއެއް ފޮނުވުމާ ގުޅިގެންނެވެ.
އެ މައްސަލާގައި ގޮތެއް ނިންމަން މިއަދު ބޭއްވި ކޮމިޓީ ބައްދަލުވުން ކުރިއަށް ގެންދިޔައީ ސިއްރުކޮށްގެންނެވެ. ނަމަވެސް "އަދަދު" އަށް ކަށަވަރުވެފައިވާ ގޮތުގައި ކޮމިޓީން ނިންމީ މުރައިދޫ ގައި މަސައްކަތް ކުރާ މުވައްޒަފުންގެ އަދަދާއި މުސާރަ ހިމެނޭހެން ތަފުސީލުތައް ހާމަނުކުރުމަށެވެ.
މިގޮތަށް ނިންމީ މި މައުލޫމާތު އާންމުކޮށްފިނަމަ މަޖިލީހުގެ ރައީސްގެ ސަލާމަތަށް ނުރައްކަލެއް ކުރިމަތިވެދާނެ ކަމަށް ދެކޭތީ ކަމަށް ވެސް މި ނޫހަށް މައުލޫމާތު ލިބިފައިވެ އެވެ.
މަރާމާތަށް ފަހު މަޖިލީހުގެ ރައީސް، އަބްދުއްރަހީމް އަބްދުﷲ މުރައިދޫއަށް ބަދަލުވެވަޑައިގެންނެވީ ޖުލައި 26، ގަ އެވެ. އެއަށް ފަހު އެމަނިކުފާނު ވަނީ މުރައިދޫގެ އެކި މަގާމުތަކަށް ބޭފުޅުން އައްޔަންކޮށްފަ އެވެ.
އެގޮތުން، އެ ގޭގެ ޗީފް އޮފް ސްޓާފްގެ މަގާމަށް ނޫސްވެރިޔާ އާދަމް ހަލީމް (މުންޑޫ) އަދި ޑިރެކްޓަރު ޖެނެރަލްގެ މަގާމަށް ފުޓްބޯޅަ ކުޅުންތެރިޔާ، އަލީ އަޝްފާގު (ދަގަނޑޭ) ހަމަޖެއްސިކަން ނޫސްތަކުގެ ސުރުހީއަށް އެރި އެވެ. ނަމަވެސް މުރައިދޫގައި މަސައްކަތްކުރާ މުވައްޒަފުންގެ އަދަދާއި ލިބޭ މުސާރައިގެ ތަފުސީލެއް ނޭނގެ އެވެ.
މަޖިލީހުގެ ރައީސްއަށް ހާއްސަ ގެއެއްގެ ގޮތުގައި މުރައިދޫ ހަމަޖެއްސީ މަޖިލީހުގެ އޭރުގެ ރައީސް މުހައްމަދު ނަޝީދު ދިރިއުޅުއްވުމަށް އެ ގެ ހާއްސަ ކުރެއްވީ، މެއި 6، 2021 ގައި އެ މަނިކުފާނު އަވަހާރަކޮށްލަން ދިން ބޮމުގެ ހަމަލާ ގުޅިގެންނެވެ.
ނަމަވެސް، ނަޝީދަށް ފަހު 19 ވަނަ މަޖިލީހުގެ ރައީސްއަކަށް އިންތިހާބު ކުރެއްވި ހިތަދޫ އުތުރު ދާއިރާގެ މެންބަރު މުހައްމަދު އަސްލަމު މުރައިދޫ ގައި ދިރިނޫޅުއްވަ އެވެ. އެ ގެ ހުސްކޮށް ހުރުމަށް ފަހު މަރާމާތު ކުރަން ފެށީ 20 ވަނަ މަޖިލީހުގެ އިންތިހާބަށް ފަހުގަ އެވެ.
