ރައްޔިތުންގެ މަޖިލީހުގެ މި އަހަރުގެ ދެ ވަނަ ދައުރު ނިންމައި ނެގި ޗުއްޓީއަށްފަހު ތިން ވަނަ ދައުރުގެ ޖަލްސާތައް މާދަމާ ފަށަން ހަމަޖެހިއްޖެ އެވެ.
މި އަހަރުގެ ތިން ވަނަ ދައުރުގެ ޖަލްސާތައް ފަށަން ފުރަތަމަ ހަމަޖެހިފައި އޮތީ މިދިޔަ ހަފުތާގަ އެވެ. ނަމަވެސް ބްރޯޑްކާސްޓުކުރާ ރޫމުގެ މަސައްކަތް ނުނިމިގެން ކަމަށް ބުނެ ހަފުތާއަކަށް ޖަލްސާތައް ފަސް ކުރީ އެވެ.
މަޖިލީހުން އާންމުކުރި އެޖެންޑާގައިވާ ގޮތުން، މާދަމާގެ ޖަލްސާގައި ވަޒީރުންގެ މަޖިލީހަށް ރައީސް ގެންނެވި ބަދަލުތަކާއެކު އަލަށް އައްޔަންކުރެއްވި ވަޒީރުންނަށް ރުހުން ދިނުމަށް އެ މައްސަލަ ކޮމިޓީއަށް ފޮނުވުމާމެދު ގޮތެއް ނިންމާނެ އެވެ.
ރާއްޖެއިން އިންޑިއާއަށް ސަފީރަކު ކަނޑައެޅުމުގެ މައްސަލައަކާއި އިލެކްޝަން ކޮމިޝަނަށް މެންބަރަކު އައްޔަންކުރުމުގެ މައްސަލައެއް އިންޓަނޭޝަނަލް އެޓޮމިކް އެނާޖީ އެޖެންސީގައި ރާއްޖެއިން ބައިވެރިވުމާމެދު ގޮތެއް ނިންމުމާ ގުޅޭ މައްސަލަތައް ކޮމިޓީއަށް ފޮނުވުމާމެދު ގޮތެއް ނިންމުން ވެސް މާދަން އޮންނާނެ އެވެ.
އޭގެ އިތުރުން، ސަރުކާރުގެ ފަރާތުން މަޖިލީހަށް އަލަށް ހުށަހަޅާ ތިން ބިލެއްގެ ފުރަތަމަ ކިޔުން އިއްވުން ވެސް މާދަމާގެ ޖަލްސާއަށް ވަނީ ތާވަލުކޮށްފަ އެވެ.
މަޖިލީހުގެ ޖަލްސާތައް ފަށާއިރު މަޖިލީހުގެ ރައީސް އަބްދުއްރަހީމް އަބްދުﷲ ހުންނެވީ އިންޓަ-ޕާލަމެންޓްރީ ޔޫނިއަން (އައިޕީޔޫ) ގެ އެސެމްބްލީގައި ބައިވެރިވެވަޑައިގަތުމަށް ސްވިޒަލެންޑުގެ ޖެނީވާގަ އެވެ. މާދަމާގެ ޖަލްސާގެ ރިޔާސަތު ބަލަހައްޓަވާނީ ނައިބު ރައީސް އަހުމަދު ނާޒިމް އެވެ.
