އޭޝިއަން ޓޭބަލް ޓެނިސް ޔޫނިއަން (އޭޓީޓީޔޫ)ގެ ކައުންސިލް މެމްބަރު ކަމަށް ރާއްޖޭގެ ޓޭބަލް ޓެނިސް އެސޯސިއޭޝަނުގެ ރައީސް، އަލީ ރަޝީދު (އައްޔަ) އިންތިހާބުކޮށްފި އެވެ.
އޭޝިއާގެ ޓީޓީ ރައީސް ކަމަށް ދެ ވަނަ ދައުރަކަށް ގަތަރުގެ ހަލީލް އަލް މުހައްނާދީ އިންތިހާބުވެފައިވަނީ، ކަޒަކްސްތާންގައި މިއަދު ކުރިއަށްދިޔަ، އޭޓީޓީޔޫގެ ޖެނެރަލް އެސެމްބްލީގަ އެވެ. ޓޭބަލް ޓެނިސް އެސޯސިއޭޝަންގެ ރައީސް ކަމަށް ތިން ވަނަ ދައުރަކަށް މި އަހަރު އިންތިހާބުވި އައްޔަ، އޭޝިއާގެ ޓީޓީ ޖަމިއްޔާގެ ކައުންސިލް މެމްބަރު ކަމަށް އިންތިހާބުވީ، 2024 އިން 2028 އަށެވެ.
ކަޒަކްސްތާނުގައި ހުރެ، އައްޔަ، "އަދަދު ސްޕޯޓްސް" އަށް ދެއްވި އިންޓަވިއުއެއްގައި ވިދާޅުވީ، މިއީ، އޭޝިއާގެ ޓީޓީ ޖަމިއްޔާ އިން އެކި ރީޖަންތަކަށް ނަގާ ކައުންސިލް މެމްބަރުތަކުގެ ތެރެއިން، ދެކުނު އޭޝިއާ އިން އިންތިހާބުކުރި މެމްބަރުކަން ރާއްޖެ އަށް ލިބިގެންދިއުމަކީ ބޮޑު ފުރުސަތެއް ކަމަށެވެ.
"މިއީ މި ކަހަލަ މަގާމެއް ރާއްޖެ އަށް ލިބުނު ފުރަަތަމަ ފަހަރު. ދެން، ހަގީގަތުގައި، ރާއްޖެ އަށް މި އޮޕޮޗިއުނިޓީސް އިތުރު ކުރެވޭނެ ކުރިއަށް ވުރެ ބޮޑަށް، އެއީ ކައުންސިލްގައި ހުރެގެން، ދެކުނު އޭޝިއާގެ ފަރާތުން، ބޭނުންވާ ކަންކަން ސީދާ އެގްޒެކްޓިވް ބޯޑަށް ހުށަހެޅޭނެ، އެހެންވީމަ ބޮޑު ފުރުސަތެއް ގޮތަށް ދެކެނީ،" އައްޔަ ވިދާޅުވި އެވެ.
އައްޔަ އަކީ މޯލްޑިވްސް އޮލިމްޕިކް ކޮމިޓީގެ ހިންގާ ކޮމިޓީގެ ވެސް މެމްބަރެކެެވެ
އެންމެ ފުރަތަމަ ރައީސަކަށް އިންތިހާބުވީ، ވާދަވެރިއަކު ނެތި، 2016 ވަނަ އަހަރު ބޭއްވި އިންތިހާބު ކާމިޔާބު ކުރައްވައިގެންނެވެ. އެކަމަކު، އެންމެ ފަހުން، 2020 ވަނަ އަހަރު ބޭއްވި އިންތިހާބު ވާދަވެރިކޮށް ދިޔައިރު، އައްޔަ، ވަނީ ދެ ވަނަ ދައުރަކަށް އިންތިހާބުވެވަޑައިގެންފަ އެވެ. އައްޔަ ދެ ވަނަ ދައުރަކަށް އިންތިހާބުވީ، ބޮޑު ތަފާތަކުން ތޯހާ ސަލީމް ބަލިކޮށެވެ.
ޓީޓީ އެސޯސިއޭޝަން ކަޕުގެ ސިންގަލްސް ޗެމްޕިއަންކަމާއި ގައުމީ މުބާރާތުގެ ޑަބަލްސް އާއި ޓީމް ޗެމްޕިއަންކަން ހޯދާފައިވާ އައްޔަ އަންނަނީ 2006 ވަނަ އަހަރުން ކުޅުމުން ރިޓާޔަކުރި ފަހުން، އެސޯސިއޭޝަނަށް އެކި ގޮތްގޮތުން ހިދުމަތް ކުރަމުންނެވެ. އެ ގޮތުން، 2006 އިން 2008 އަށް އެސޯސިއޭޝަންގެ އިދާރީ މަސައްކަތްތައް ކުރިއިރު، 2008 ވަނަ އަހަރުން ފެށިގެން އޭނާ އަކީ ޓީޓީގެ ނައިބް ރައީސް އެވެ.
