ޝަންހާއީ، ޗައިނާ (އޮކްޓޫބަރު 12) - އެކާވީސް ވަނަ ގަރުނުގައި ފެނިގެންދިޔަ ޓެނިހުގެ އެންމެ އާދަޔާހިލާފު ތިން ކުޅުންތެރިއަކު މިދިޔަ އަހަރުތަކުގައި ރިޓަޔާކޮށްފައިވާއިރު، މި ވަގުތު އޭނާ އަށް ކުރެވެނީ ތަފާތު އިހުސާސެއް ކަމަށް ސާބިއާގެ ތަރި، ނޮވަކް ޖޮކޮވިޗް ބުނެފި އެވެ.
ޓެނިހުގެ މަޝްހޫރު "ބިގް ފޯ" ގެ ތެރެއިން ރިޓަޔާނުކޮށް ހުރީ މިހާރު ޖޮކޮވިޗް، 37، އެކަންޏެވެ. އެ ގޮތުން، 2022 ވަނަ އަހަރު، ލެޖެންޑަރީ ތަރި، ސްވިޒަލެންޑުގެ ރޮޖާ ފެޑެރާ ރިޓަޔާކުރިއިރު، މި އަހަރުގެ އޮގަސްޓް މަހުގައި، ސްކޮޓްލެންޑްގެ އެންޑީ މަރީ ވަނީ ކުޅުން ހުއްޓާލައިފަ އެވެ. އަދި މީގެ އެއް ދުވަސް ކުރިން، ސްޕެއިނުގެ ރަފައެލް ނަޑާލް ވަނީ ރިޓަޔާމަންޓް އިއުލާނުކޮށްފަ އެވެ.
"ނަޑާލްއާ އެކު އޮތް ވާދަވެރިކަމަކީ އަހަރެންގެ ކެރިއަރަށް އެންމެ ރަނގަޅު އަސަރުތަކެއް ކުރި އެއް ކަމަކީ. ދެން، އަހަރެމެންނަށް އެނގޭ މި ދުވަސް (ނަޑާލް ވެސް ރިޓަޔާކުރާނެ ދުވަސް) އަންނާނެކަން. އެކަމަކު، އެކަން އެނގުނަސް މި ހަބަރަކީ ޝޮކެއް،" ޝަންހާއީ މާސްޓާސްގެ ސެމީ ފައިނަލުން ފުރުސަތު ހޯދި މެޗަށް ފަހު ޖޮކޮވިޗް ބުންޏެވެ.
"މީގެ އަހަރުތަކެއް ކުރިން، ރޮޖާ (ފެޑެރާ) އިއުލާނުކުރީ ރިޓަޔާމަންޓް، މި އަހަރު އޮގަސްޓްގައި އެންޑީ (މަރީ) މިހާރު ރަފާ (ނަޑާލް)، ހަގީގަތުގައި މުޅިން އެހެން އިހުސާސެއް މި ކުރެވެނީ، އަހަންނަށް ވާދަކުރެވޭތީ ހިތްހަމަޖެހޭ. އެކަމަކު، އެ މީހުންނާ އެކު (ރިޓަޔާކުރި ލެޖެންޑުންނާ އެކު) އަހަރެންގެ ބައެއް ވެސް ގޮސްފި،"
ޓެނިހުގެ 24 ގްރޭންޑް ސްލޭމް ތަށި ހޯދައި ރެކޯޑެއް ގާއިމްކޮށްފައިވާ ޖޮކޮވިޗް ވަނީ މި ފަހަރުގެ އޮލިމްޕިކްސް އިން ރަން މެޑަލް ހޯދައި، އޭނާ ކެރިއަރުގައި މަދުވާ ބޮޑު ކާމިޔާބީ ހާސިލްކޮށްފަ އެވެ.
ޝަންހާއީ މާސްޓާސް ތަށި ހާސިލްކޮށް، ކެރިއަރުގައި 100 އޭޓީޕީ މުބާރާތުގެ ޗެމްޕިއަންކަން ހޯދުމުގެ އަމާޒުގައި ހުރި ޖޮކޮވިޗް ބުނީ، އަރަމުން އަންނަ ޖީލުގެ ކުޅުންތެރިންނާ ވާދަކުރަން އޭނާ ހުރިއިރު، ހަށިގަނޑު ތަން ދިން މިންވަރަކުން ކެރިއަރު ކުރިއަށްގެންދާނެ ކަމަށެވެ.
