އުތުރުގެ ތިން އަތޮޅުގައި ތިއްބެވި އެމްޑީޕީއަށް ނިސްބަތްވާ ކައުންސިލަރުންނާއި ޑަބްލިޔޫޑީސީގެ މެންބަރުން މިއަދު ކުޅުދުއްފުށްޓަށް ޖަމާވަނީ ސަރުކާރުން ލާމަރުކަޒީ ނިޒާމު ހަލާކު ކޮށްލަން މަސައްކަތް ކުރާތީ ކަމަށާއި، އެ ކޮންފަރެންސްގައި އިގުރާރުވާ ކަންކަން ރަނގަޅު ކުރަން ސަރުކާރަށް ގޮވާލާނެ ކަމަށް އެމްޑީޕީގެ ޗެއާޕާސަން ފައްޔާޒު އިސްމާއީލް ވިދާޅުވި އެވެ.
ރިޔާސީ އިންތިހާބަށް ފަހު، އިދިކޮޅު ޕާޓީއެއްގެ ގޮތުގައި އެމްޑީޕީ ހަރަކާތްތެރިވާން ފެށި ފަހުން، މިފަދަ ބޮޑު ހަރަކާތެއް ބާއްވާ މިއީ ފުރަތަމަ ފަހަރެވެ.
ކުޅުދުއްފުށީގައި ބާއްވާ ކައުންސިލަރުންގެ ކޮންފަރެންސްގައި ހއ، ހދ އަދި ށ. އަތޮޅުގައި ތިއްބެވި އެމްޑީޕީއަށް ނިސްބަތްވާ ކައުންސިލަރުންނާއި ޑަބްލިޔޫޑީސީގެ މެންބަރުންނާއެކު ޖުމުލަ 80 މީހުން ބައިވެރިވެ އެވެ.
މި ކޮންފަރެންސްގައި ކުރީގެ ރައީސް އިބްރާހިމް މުހައްމަދު ސޯލިހު އާއި އެމްޑީޕީގެ ލީޑަޝިޕްގެ ބައެއް ބޭފުޅުންނާއި މާލޭ މެޔަރު އާދަމް އާޒިމް، އައްޑޫ މޭޔަރު އަލީ ނިޒާރު، ފުވައްމުލަކު މޭޔަރު އިސްމާއީލް ރަފީގު، ތިނަދޫ މޭޔަރު ސައުދު އަލީ އަދި ކުޅުދުއްފުށީ މޭޔަރު މުހައްމަދު އާތިފު ވެސް އެ ކޮންފަރެންސްގައި ބައިވެރިވެވަޑައިގަންނަވަ އެވެ.
އެ ފަސް ބޭފުޅުން ވެސް ނިސްބަތް ވަނީ އެމްޑީޕީއަށެވެ.
ފައްޔާޒު "އަދަދު" ނޫހަށް ވިދާޅުވީ މި ކޮންފަރެންސްގެ ބޭނުމަކީ މިހާރު އޮތް ޕީއެންސީގެ ސަރުކާރުން ލާމަރުކަޒީ ނިޒާމު ހަލާކުކޮށްލިޔަ ނުދިނުން ކަމަށެވެ.
"އެއްވެސް އިރެއްގައި ޕީޕީއެމް، ޕީއެންސީގެ ފިކުރެއް ނޫން ލާމަރުކަޒު ކުރުމަކީ. މިހާރު ވެސް ސަރުކާރުން އަމަލުކުރަމުންދާ ގޮތުން އެކަން ސާބިތުވޭ،" ފައްޔާޒު ވިދާޅުވި އެވެ.
ކައުންސިލްތައް ބެލެހެއްޓުމަށް ވަކިން މިނިސްޓްރީއެއް އުފެއްދީ، މަރުކަޒު ކުރުމުގެ ވިސްނުމުގައި ކަމަށާއި ގާނޫނުތަކަށް ބަދަލު ގެންނަމުން ދަނީ ވެސް ލާމަރުކަޒީ ވިސްނުމާ ފުށުއަރާ ގޮތަށް ކަމަށް، ނިމިގެން ދިޔަ އެމްޑީޕީގެ ވެރިކަމުގައި އިކޮނޮމިކް މިނިސްޓަރުކަން އަދި 18 ވަނަ ރައްޔިތުންގެ މަޖިލީހުގެ ގަމު ދާއިރާގެ މެންބަރުކަން ކުރެއްވި ފައްޔާޒު ވިދާޅުވި އެވެ.
މިއަދުގެ ކޮންފަރެންސްގައި ދެ މައުލޫއަކަށް މަޝްވަރާ ކުރާނެ ކަމަށާއި އެއީ ގޮންޖެހުންތަކާއި ސަރުކާރުން މިހާރު އަމަލުކުރާ ގޮތްތައް ކަމަށް ފައްޔާޒު ވިދާޅުވި އެވެ. އޭގެ އިތުރުން ކައުންސިލްތަކުގެ މާލީ ކަންކަމާ ގުޅޭ ގޮތުން ވެސް މަޝްވަރާ ކުރާނެ އެވެ.
"މި ކަންކަމަށް ފަހު އިގުރާރުވާ ކަންކަން އަޅުގަނޑުމެން ހާމަކުރާނަން. ރަނގަޅު ކުރަންޖެހޭ ކަންކަން ސަރުކާރަށް ގޮވާލާނަން،" ފައްޔާޒު ވިދާޅުވި އެވެ.
މިފަދަ ކޮންފަރެންސްތައް ރާއްޖޭގެ އެހެން ސަރަހައްދުތަކުގައި ވެސް ބާއްވާނެ ކަމަށް އޭނާ ވިދާޅުވި އެވެ.
