މޯލްޑިވްސް ނެޝަނަލް ޔުނިވާސިޓީ (އެމްއެންޔޫ) ގައި އިންޑިއާގެ ސަގާފަތް އުނގަންނައި ދޭން އިންޑިއާއާ އެކު މަސައްކަތް ކުރަން ސަރުކާރުން އެއްބަސްވެއްޖެ އެވެ.
ގައުމީ ޔުނިވާސިޓީގައި އިންޑިއާގެ ސަގާފަތް އުނގަންނައި ދިނުމުގެ މަސައްކަތް ކުރަން އެއްބަސްވީ ރައީސް ޑރ. މުހައްމަދު މުއިއްޒު އިންޑިއާއަށް ކުރައްވާ ރަސްމީ ދަތުރުފުޅުގެ ތެރެއިން ރާއްޖެ އާއި އިންޑިއާއާ ދެމެދު އިއްޔެ ސޮއިކުރި އެމްއޯޔޫއެއް ގަ އެވެ.
އެ އެމްއޯޔޫގައި ވާ ގޮތުން ސަރުކާރުން އެއްބަސްވީ ޔުނިވާސިޓީގައި އިންޑިއަން ކައުންސިލް ފޯ ކަލްޗަރަލް ރިލޭޝަންސް (އައިސީސީއާރް) ގެ ޗެއާއެއް ގާއިމު ކުރުމުގެ މަސައްކަތް ކުރުމަށެވެ.
އައިސީސީއާރްއަކީ 1950 ގައި އިންޑިއާގެ ސަގާފަތް އެހެން ގައުމުތަކުގައި އުނގަންނައި ދޭން އުފެއްދި ތަނެކެވެ. އިންޑިއާގެ ސަގާފަތް އެހެން ގައުމުތަކުގައި އުނގަންނައިދޭން އެ ކައުންސިލުން އެހީތެރިކަން ފޯރުކޮށްދެ އެވެ.
އައިސީސީއާރްގެ ޗެއާތައް ގާއިމުކޮށްފައި ވަނީ ދުނިޔޭގެ 32 ގައުމެއްގެ ޔުނިވާސިޓީތަކުގަ އެވެ. އެ ގައުމުތަކާއެކު 47 އެމްއޯޔޫއެއްގައި އެ ތަނުން ވަނީ ސޮއިކޮށްފަ އެވެ.
އޮސްޓްރިއާ، އަޔަލޭންޑް، ކެނެޑާ، ތައިލެންޑް، އަޒަރުބައިޖާން، ރަޝިއާ، ޔޫކޭ، ނޭޕާލް، ސްރީލަންކާ، އެމެރިކާ، ކްރޮއޭޝިއާ، އުޒްބަކިސްތާން، ގަތަރު، ތުރުކީ، ޔޫއޭއީ، ޓެންޒޭނިއާ، ކެމްބޯޑިއާ، ގަޔާނާ، އިންޑޮނީޝިއާ، ދެކުނު ކޮރެއާ، ވެސްޓް އިންޑީސް، ސްވިޒަލޭންޑް، ޕޮލެންޑް، ބަންގްލަދޭޝް، ޖަރުމަން، ތަޖިކިސްތާން، އިޓަލީ، ބަލްގޭރިއާ، ޕާޕުއާ ނިއު ގިނީ، މޮރިޝަސް، އައިސްލޭންޑް އަދި ޒެމްބިއާ އޭގެ ތެރޭގައި ހިމެނެ އެވެ.
އައިސީސީއާރްގެ އެހީތެރިކަމާއެކު ގައުމުތަކުގައި އިންޑިއަން ސްޓަޑީސް، ސާންސްކްރިތު، ހިންދީ، ތަމިލް ސްޓަޑީސް، ބުދިސްޓް އެންޑް ސާންސްކްރިތު ސްޓަޑީސް ގެ އިތުރުން އެހެން މާއްދާތައް ވެސް އަންނަނީ ކިޔަވައި ދެމުންނެވެ.
ގައުމިއްޔަތަށް އިސްކަން ދޭ މި ސަރުކާރުން ވެރިކަމަށް އައުމުގެ ކުރިން އިންޑިއާގެ ސަގާފަތް ރާއްޖޭގައި އުނގަންނައި ދޭން އޭރުގެ ސަރުކާރުން މަސައްކަތް ކުރަމުންދާ ކަމަށް ބުނެ ބޮޑެތި ތުހުމަތުތަކެއް ކުރެއްވި އެވެ.
މި ސަރުކާރުން ގައުމިއްޔަތަށް އިސްކަން ދޭނެ ކަމަށް ވައުދުވެގެން ވެރިކަމަށް އައިސްފައިވާއިރު، ގައުމިއްޔަތު މިނިސްޓްރީއެއް އުފެއްދުމުގެ އިތުރުން ގައުމިއްޔަތަށް ހާއްސަކޮށްގެން މާ ބޮޑު ކަމެއް މިހާތަނަށް ކުރެވިފައެއް ނުވެ އެވެ.
