ލަންޑަން (އޮކްޓޫބަރު 8) - ޗެލްސީގެ ކޯޗުގެ މަގާމުގައި ފުރަތަމަ ތިން މަސް ދުވަހު ހޭދަވިއިރު، ކުރެވުނު މަސައްކަތާ މެދު ހިތްހަމަޖެހޭ ކަމަށް އެންޒޯ މަރެސްކާ ބުނެފި އެވެ.
މިދިޔަ ސީޒަނުގައި ލެސްޓާ ސިޓީ އަށް އިނގިރޭސި ދެ ވަނަ ޑިވިޝަނުގެ ޗެމްޕިއަންކަން ހޯދައިދިން ކޯޗު މަރެސްކާ ގެންނަން ޗެލްސީން 10 މިލިއަން ޑޮލަރު ހަރަދުކުރި އެވެ. އެއީ، ލެސްޓާއާ އެކު، މަރެސްކާ ހަދާފައި އޮތް އެއްބަސްވުން އުވާލުމަށެވެ.
ލީގުގައި އެންމެ ފަހުން ނޮޓިންހަމް ފޮރެސްޓާ 1-1 އިން އެއްވަރުވި މެޗަށް ފަހު، މަރެސްކާ ބުނީ، ފުރަތަމަ ތިން މަސް ދުވަހު ޗެލްސީގައި ކުރެވުނު މަސައްކަތާ މެދު އޭނާ ހިތްހަމަަޖެހޭ ކަމަށެވެ.
"އެންމެ ގިނަ ވެގެން 21 ޕޮއިންޓް ލިބެން އޮތީ މި ހަތް މެޗުން. އަހަރެމެން 14 ޕޮއިންޓް ހޯދައިގެން، އެއް ވަނައިގައި އޮތް ޓީމާ ހަތަރު ޕޮއިންޓުގެ ފަރަގެއް މި އޮތީ. ލީގުގެ ހަތަރެއްގައި މި އޮތީ ވެސް. މިއީ، ގޯސް ހިސާބެކޭ ޔަގީނުން ވެސް އަހަންނެއް ނުބުނާނަން. އަހަރެން މި ވަގުތަށް ބަލާއިރު މި ކަމާ ހިތްހަމަޖެހޭ،" މަރެސްކާ ބުންޏެވެ.
ކުޑަ ކަންބޮޑުވުމެއް އޮތް ކަމެއްގެ ގޮތުގައި މަރެސްކާ ފާހަގަކުރީ މޮޅުވި މެޗުތަކުގެ ނިސްބަތަށް ބަލާއިރު، އަމިއްލަ ދަނޑުގައި ކުޅުނު މެޗުތަކުން ނަތީޖާ ނެރުމުގައި ދިމާވި ދަތިތަކުގެ މައްސަލަ އެވެ. އެ ގޮތުން، ފޮރެސްޓް މެޗަކީ ވެސް އެ ފަދަ މެޗެއްގެ ގޮތުގައި މަރެސްކާ ފާހަގަކުރި އެވެ.
"އަހަރެމެން އެބަޖެހޭ އަތުގައި އޮންނަ ކޮންޓްރޯލްގެ ބޭނުން ސްކޯ އިން ވެސް ދައްކަން. އަހަރެމެންގެ ކުޅުން ރަނގަޅު، ފުރުސަތު ތަނަވަސްކުރޭ، ދެން، މި ޖެހެނީ ނަތީޖާ ނެރެން ބޭނުންވާ ކަންކަން ބަރާބަރަށް ކުރަން، އެކަންކަން ވެސް ރަނގަޅު ކުރެވޭނެ،" މަރެސްކާ ބުންޏެވެ.
"އެންމެ ފަހުން އަމިއްލަ ދަނޑުގައި ކުޅުނު ހަތަރު މެޗުން ތިން މެޗުގައި މޮޅުވުން އެއީ މި ކަމުގައި ވެސް ޕޮޒިޓިވް އެއް،"
ޗެލްސީން ދެން އެންމެ އަވަހަށް ކުޅޭ މެޗުގައި މި މަހު 20 ވަނަ ދުވަހު ކުޅޭނީ ރަށުންބޭރުގައި ލިވަޕޫލާ އެވެ.
