މެންޗެސްޓާ (އޮކްޓޫބަރު 2) - އިނގިރޭސި ޕްރިމިއާ ލީގުގައި މި ހަފްތާގައި މެންޗެސްޓާ ޔުނައިޓްގެ ކެޕްޓަން، ބްރޫނޯ ފެނާންޑޭސް އަށް ދެއްކި ރަތް ކާޑާ ދެކޮޅަށް އެ ކްލަބުން ކުރި އެޕީލް ކާމިޔާބުވެއްޖެ އެވެ.
މި ނިންމުމާ އެކު، ފެނާންޑޭސް، 30، އަށް ދިން ތިން މެޗުގެ ސަސްޕެންޝަން ވެސް ވަނީ އުވިފަ އެވެ.
ޓޮޓެންހަމް އަތުން 3-0 އިން ޔުނައިޓެޑް ބަލިވި މެޗުގެ 42 ވަނަ މިނިޓްގައި އެ ޓީމުގެ ކެޕްޓަން، ބްރޫނޯ ފެނާންޑޭސް އަށް ސީދާ ރަތް ކާޑެއް ދެއްކި އެވެ. ފެނާންޑޭސް އަށް ރަތް ކާޑު ދެއްކިއިރު، ޔުނައިޓެޑް އޮތީ 1-0 އިން ފަހަތުގަ އެވެ.
ފެނާންޑޭސް އަށް ރަތެއް ދެއްކީ، ޖޭމްސް މެޑިސަން އަށް ނުރައްކާތެރި ފައުލެއް ކުރި ކަމަށް ބަލައިފަ އެވެ. މެޗަށް ފަހު، ފެނާންޑޭސް ބުނީ، އެއީ ރީނދޫ ކާޑެއް ދެއްކޭނެ ފައުލެއް ކަމަށާއި އެކަމަކު ރަތް ކާޑެއް ދެއްކުން ބަލައިގަންނަން އުނދަގޫ ކަމަށެވެ.
ސީދާ ރަތް ކާޑަކާ ގުޅިގެން ތިން މެޗަށް ސަސްޕެންޑްވާނެ އެވެ. އެހެންވެ، ކުރިން ބެލެވިފައި އޮތީ ރަތް ކާޑުގެ ސަބަބުން ފެނާންޑޭސް ނުލައި، ޔުނައިޓެޑުން ތިން މެޗު ކުޅެން ޖެހޭނެ ކަމަށެވެ. އެ ތިން މެޗަކީ، އެސްޓަން ވިލާ، ބްރެންޓްފޯޑް އަދި ވެސްޓް ހޭމްއާ ދެކޮޅަށް މެޗުތަކެވެ. އެކަމަކު، އެޕީލް ކާމިޔާބުވުމާ އެކު، ޔުނައިޓެޑުން މި ތިން މެޗުގައި ވެސް ފެނާންޑޭސް ބޭނުންކުރަން ފުރުސަތު ލިބޭނެ އެވެ.
ޔުނައިޓެޑުން ދެން ކުޅޭ މެޗަކީ، ޔޫރޮޕާ ލީގުގައި މާދަމާރޭ ރަށުންބޭރުގައި ޕޯޓޯއާ ދެކޮޅަށް ކުޅޭ މެޗެވެ.
