މަނީ އެކްސްޗޭންޖު ލައިސެންސް ލިބޭނީ ދިވެހިން ހިއްސާވާ، ހުސް ދިވެހި މުވައްޒަފުން ތިބޭ ވިޔަފާރިތަކަށް ކަމަށް އެމްއެމްއޭއިން މިއަދު ކަނޑައަޅައިފި އެވެ.
އެމްއެމްއޭއިން އެކުލަވާލި މަނީ ޗޭންޖިން ވިޔަފާރިއާ ބެހޭ ގަވާއިދުގެ ދަށުން ފަސް އަހަރަށް ދޫކުރުމަށް ހަމަޖެހިފައި ވަނީ ބޭރު ފައިސާ ގަތުމާއި ވިއްކުމުގެ ވިޔަފާރި ކުރުމުގެ ލައިސަންސް އަދި ބޭރު ފައިސާ ވިއްކުމުގެ ވިޔަފާރި ކުރުމުގެ ލައިސަންސެވެ.
ނަމަވެސް ރާއްޖޭގެ ޓޫރިޒަމާބެހޭ ގާނޫނުގެ ދަށުން ރަޖިސްޓަރީ ކޮށްގެން ޓޫރިސްޓުންނަށް ހިދުމަށް ދޭ ތަންތަނުން ލައިސަންސަކާ ނުލައި ޓޫރިސްޓުން އަތުން ބޭރުފައިސާ ގަނެ އަދި ޓޫރިސްޓުންނަށް ބޭރު ފައިސާ ވިއްކުން ގަވާއިދުގެ ދަށުން ހުއްދަ އެވެ.
ގަވާއިދުގެ ދަށުން ބޭރު ފައިސާ ގަތުމާއި ވިއްކުމުގެ ވިޔަފާރި ކުރުމުގެ ލައިސަންސް ލިބޭނީ ކުންފުނީގެ ގާނޫނުގެ ދަށުން ބޭރު ފައިސާ ގަތުމާއި ވިއްކުމުގެ ވިޔަފާރި ކުރުމަށް އުފައްދާފައިވާ ކުންފުނިތަކަށެވެ.
އެ ގަވާއިދުގެ ދަށުން ކުންފުނީގެ ހަގީގީ ވެރިފަރާތަކީ ދިވެހި ރައްޔިތަކަށް ވާން ޖެހޭއިރު، މަނީ ޗޭންޖިން ލައިސަންސް ލިބިފައިވާ ވިޔަފާރީގައި ހަރަކާތްތެރިވާ ހުރިހާ މުވައްޒަފުން ވެސް ވާންވާނީ ދިވެހި ރައްޔިތުންނަށެވެ.
އެ ލައިސަންސްގެ އެޕްލިކޭޝަން ފީއަކަށް 20،000ރ. ނަގާއިރު އަހަރީ ފީއަކަށް ނެގުމަށް ހަމަޖެހިފައި ވަނީ 24،000ރ. އެވެ. ދުވާލެއްގެ މައްޗަށް އެއް ކަސްޓަމަރަކަށް ނަގުދު ފައިސާއިން އެންމެ ގިނަވެގެން މުއާމަލާތު ކުރެވޭނީ 50،000ރ. ނުވަތަ އެއަށްވާވަރުގެ ބޭރު ފައިސާގެ އަދަދަކަށެވެ.
ބޭރު ފައިސާ ގަތުމާއި ވިއްކުމުގެ ވިޔަފާރި ކުރުމުގެ ލައިސަންސް ލިބިފައިވާ ފަރާތްތަކުން، ބޭރު ފައިސާ ގަތުމާއި ވިއްކުމުގެ ހުރިހާ މުއާމަލާތްތަކެއް މޮނިޓާ ކުރެވޭނެ އިލެކްޓްރޯނިކް ނިޒާމެއް ވެސް ގާއިމު ކުރުމަށް ވަނީ ހަމަޖެހިފަ އެވެ.
ބޭރު ފައިސާ ވިއްކުމުގެ ވިޔަފާރި ކުރުމުގެ ލައިސަންސް ލިބޭނީ ރާއްޖޭގެ ޓޫރިޒަމާ ބެހޭ ގާނޫނުގެ ދަށުން ޓޫރިސްޓު ރިޒޯޓް ހިންގަން ހުއްދަ ނުވަތަ ލައިސަސް ލިބިފައިވާ ކުންފުންޏަކަށެވެ.
އެ ލައިސަންސްގެ މުއްދަތަކީ ޓޫރިސްޓް ރިޒޯޓް ހިންގަން ލިބިފައިވާ ހުއްދައިގެ ނުވަތަ ލައިސަންސްގެ މުއްދަތު ކަމަށް ވަނީ ކަނޑައަޅާފަ އެވެ.
ބޭރު ފައިސާ ވިއްކުމުގެ ވިޔަފާރި ކުރުމުގެ ލައިސަންސްގެ އެޕްރިލޭޝަން ފީއެއްގެ ގޮތުގައި 1،300 ޑޮލަރު އަދި އަހަރީ ފީއެއްގެ ގޮތުގައި 1،800 ޑޮލަރު ވަނީ ކަނޑައަޅާފަ އެވެ. އަދި ލައިސަންސް ލިބިފައިވާ ކޮންމެ ފަރާތަކުން ވެސް ސެކިއުރިޓީ ޑިޕޮސިޓްގެ ގޮތުގައި 50000 ޑޮލަރު ބަހައްޓަން ޖެހޭނެ އެވެ.
އެ ލައިސަންސްގެ ދަށުން ބޭރު ފައިސާ ވިއްކުމުގެ މުއާމަލާތް ކުރަންވާނީ ބޭންކެއް މެދުވެރިކޮށް ކަމަށްވާއިރު، ނަގުދު ފައިސާއިން ލައިސަންސް އޮވެގެން މުއާމަލާތް ކުރެވޭނެ އެވެ.
ކުރިން ލައިސަންސް އޮތް ފަރާތްތަކުން އާ ގަވާއިދުގެ ދަށުން ލައިސަންސަށް އެދި ހުށަހަޅައި އެއާ މެދު އޮތޯރިޓީން ވަކި ގޮތެއް ނިންމައި އަންގަންދެން ކުރީގެ ލައިސަންސްގެ ދަށުން ވިޔަފާރި ކުރިއަށް ގެންދެވޭނެ ކަމަށް އެމްއެމްއޭއިން ބުންޏެވެ.
އޭގެއިތުރުން އެމްއެމްއޭއިން ބުނީ ދެ މަސް ދުވަހުގެ ތެރޭގައި އާ ގަވާއިދުގެ ތެރެއިން ލައިސަންސަށް ހުށަހަޅަން ޖެހޭއިރު، އޭގެ ކުރިން ހުށަހަޅާފައި ނުވާ ނަމަ ކުރިން ދީފައިވާ ލައިސަންސް ބާތިލުވާން ކަމަށެވެ.
މިހާރު ލައިސަންސް އޮތް ފަރާތަކުން އާ ގަވާއިދުގެ ދަށުން ލައިސަންސަށް އެދި ހުށަހަޅާއިރު އެޕްލިކޭޝަންގެ ފީގެ ގޮތުގައި 10،000ރ. ދައްކަން ޖެހޭ ކަމަށް ވެސް އެ އޮތޯރިޓީން ބުންޏެވެ.
މަނީ ޗޭންޖިން ވިޔަފާރިއާ ބެހޭ އާ ގަވާއިދަށް އަމަލުކުރަން ފެށުމާއެކު، 1 މާޗް 1987 ގެ ތާރީހުގައިވާ "މަނީ ޗޭންޖާ ކަމުގެ ލައިސަންސް ލިބިގެން ބޭރު ފައިސާ ގަނެ ވިއްކާ ފަރާތްތަކުން ކަންތައް ކުރަންވީ ގަވާއިދު" ވަނީ އުވިފަ އެވެ.
