ދިރިއުޅުމަކީ ފިނިފެންމަލުގެ ތަންމައްޗެއް ނޫނެވެ. ތިބާ ދިރިއުޅުމުގައި ތިޔަ އެދޭ އުފަލާއި އަރާމަށް ވާސިލުވުމަށް އެތައް ހުރަހެއް އަބަދުވެސް ތިބާގެ ކުރިމަތީގައި އެތުރިފައި ހުންނާނެ އެވެ. ތިބާ ތިޔަ އެދޭ ފަސޭހަކަން ހޯދައި ދެމެހެއްޓުމަށްވެސް ތަހައްމަލުކުރަމުން ދާންޖެހެނީ ތަކުލީފެކެވެ. އެ ތަކުލީފަކީ އުފާވެރިކަން ކަމަށް ވެގެން ދަނީ ތިބާގެ ނަޒަރިއްޔާގެ ސަބަބުންނެވެ. އުފާވެރިކަން ގެނެސްދޭ ތަކުލީފު ހިޔާރުކުރުން އޮތީ ތިބާގެ އަތްމަތީގަ އެވެ. ތިބާއަށް އޮތީ ވިސްނުންތެރިކަމާއެކު ތިބާ ބޭނުންވާ ތަކުލީފެއް ހިޔާރުކުރުމެވެ.
އިނގިރޭސި ޝާއިރު އަދި ލިޔުންތެރިޔާ ޑެވިން ބްރޯވ ގެ މަޝްހޫރު ޅެމެއްގައި ކިޔަ އެވެ.
ކައިވެންޏެއް ރޫޅާލަން ނިންމުމަކީ ތަކުލީފެކެވެ. ތިބާއާއެކު ދިރިއުޅުން ވެއަތުކުރި، އަދި ތިބާގެ ސިއްރުތަކުގެ ބައިވެރިޔާއާ ވަކިވާންޖެހޭތީ އެވެ. ދެފަރާތުގެ އާއިލާގެ ބަހާއި، ރަށްޓެހި ރަހުމަތްތެރިންގެ ސުވާލުތަކާއި، ދަރިންގެ މުސްތަގުބަލާމެދު ވިސްނަންޖެހޭ ޖެހުމަކީ ބަޔާންކޮށްނުދެވޭނޭ ތަކުލީފެކެވެ. ހަމަ އެގޮތަށް ކައިވެންޏެއް ދެމެހެއްޓުމަކީ ވެސް ތަކުލީފެކެވެ. ކައިވެނި ދެމެހެއްޓޭނީ ދެމަފިރިން އެކަކު އަނެކަކަށް ވަގުތު ދީގެންނެވެ. ކުރިން ތިބާގެ ރަށްޓެހިންނަށް ހާއްސަކުރި ވަގުތުގެ ތެރެއިން އެއްބައި، ނުވަތަ ބޮޑުބައި ތިބާގެ ބައިވެރިޔާއަށް ހާއްސަކުރަންޖެހެ އެވެ. ދަރިންނާއި ބައިވެރިޔާގެ އުފާތަކަށްޓަކައި މަސައްކަތްކުރަންޖެހެ އެވެ. ބައެއް ފަހަރު ތިބާގެ އަމިއްލަ އުފާތައްވެސް ދޫކޮށްލަންޖެހެ އެވެ. ވަރިވުމަށް ނިންމިޔަސް، ކައިވެނި ދެމެހެއްޓުމަށް ނިންމިޔަސް ދެގޮތުގައި ތަކުލީފު ހިމެނެ އެވެ. ވީމާ ތިބާ އެދޭ ތަކުލީފެއް ހިޔާރު ކުރާށެވެ.
ހަށިގަނޑުގެ ބަރުދަން އިތުރުވެ، ފަލަވެފައި ހުރުމަކީ ތަކުލީފެކެވެ. އެއީ މީހާ އެތައް ބައްޔަކަށް ހުށަހެޅިގެންދާ ކަމެކެވެ. ދުވަހުން ދުވަހަށް ކުރަންޖެހޭ މަސައްކަތްތަކާއި އާއިލާއާއެކު ވަގުތު ހޭދަކުރުމާއި، ދަރިންނާއެކު ކުޅެ ސަކަރާތްޖެހުންފަދަ އުފާތަކަށް އެޅޭ ހުރަހެކެވެ. ކުޑަމިނުން، ބަރުހެލިވެފައިވާ ހަށިގަނޑަށް ހެޔޮވަރު ހެދުން ހޯދުމަކީވެސް ތަކުލީފެކެވެ. ހަމަ އެގޮތަށް ދުޅަހެޔޮ ސިއްހަތެއްގައި ފިޓުކޮށް ހުރުމަކީވެސް ތަކުލީފެކެވެ. ތިބާ ކެއުމަށް ހިތް އެދޭ އެތަކެއް މީރު ކެއުމެއް ނުކައި ދޫކޮށްލަންޖެހެ އެވެ. ހެލިފެލިވެ، ކަސްރަތުކޮށް ދާއޮހޮރުވަންޖެހެ އެވެ. ގަޑިން ގަޑިއަށް ކެއުމާއި، ކޮންމެ ކޮންމެ އެއްޗެއް ނުކެއުމަކީ ވެސް އަހުލާގީ އާދައަކަށް ހަދަންޖެހެ އެވެ. ހަށިގަނޑު ބަރުހެލިވެ ފަލަކޮށް ހުރުމާއި، ފިޓުކޮށް ހުރުމުގައިވެސް އޮތީ އުފުލަންޖެހޭ ތަކުލީފެވެ. ތިބާ ބޭނުންވާ ތަކުލީފެއް ހިޔާރުކުރާށެވެ.
ވަޒީފާއެއް އަދާކޮށް އާމްދަނީ ހޯދުމަކީ ތަކުލީފެކެވެ. ހެނދުނުގެ އަރާމު ނިދިކޮޅު ދޫކޮށްލައި، މަސައްކަތަށް ނުކުންނަންޖެހެ އެވެ. ވަޒީފާއެއްގައި އުޅޭނަމަ ވަޒީފާ ދިން މީހާ، ނުވަތަ އަމިއްލަ މަސައްކަތެއް ކުރާނަމަ ތިބާގެ ގާތުން ހިދުމަތް ހޯދާ މީހާ ރުއްސުމުގެ ތަކުލީފު އުފުލަންޖެހެ އެވެ. އޭނާގެ ޝަރުތުތަކަށް އިގުރާރުވެވިފައިވާތީ އެ ޝަރުތުތަކާ އެއްގޮތަށް އަމަލުތައް ބަހައްޓަންޖެހެ އެވެ. ތިބާއާއި އާއިލާގެ ހަރަދު ބަރަދަށް ބޭނުންވާ ފައިސާ ލިބެނީ އޭރުންނެވެ. ހަމަ އެ އުސޫލުން ވަޒީފާއެއް އަދާނުކޮށް، މަސައްކަތެއް ނުކޮށް ހުރުމަކީވެސް ތަކުލީފެކެވެ. އަސާސީ ޒަރޫރަތުތަކަކީވެސް ފައިސާއަށް ގަންނަންޖެހޭ އެއްޗަކަށްވެފައިވާ މި ޒަމާނުގައި ފައިސާ ނުލިބޭ މީހާއަކީ އެ ޒަރޫރަތްތައް ފުއްދުމުގައި އެތައް ތަކުލީފެއް އުފުލަންޖެހޭނޭ މީހެކެވެ. އަމިއްލަ މަސައްކަތުން ފައިސާއެއް ނުލިބި އެހީއަށް އެދި މީހުންނަށް އަތްދިމާކުރަންޖެހުމަކީ ފިލައިގެން ނުދާނޭ ތަދެކެވެ. އިއްޒަތުއްނަފުސު ނީލަން ކިޔޭއިރު ހިތުގައި އުފެދޭ ރިހުމަކީ ބަޔާންވެސް ނުކުރެވޭނޭ ތަކުލީފެކެވެ. ބުރަ މަސައްކަތުން އާމްދަނީ ހޯދައި، އަބުރުވެރި ދިރިއުޅުމެއް އުޅުމަކީ ތަކުލީފެކެވެ. ހަމައެގޮތަށް، އާމްދަނީ ހޯދުމަށް މަސައްކަތެއްނުކޮށް މުޖުތަމައުގައި ބޭކާރުވެފައި ހުރުމުގައިވެސް އޮތީ ތަކުލީފެވެ. ތިބާއަށް އޮތީ ތިބާ ބޭނުންވާ ތަކުލީފެއް ހިޔާރުކުރުމެވެ.
ހެޔޮގޮތުގައި މުއާމަލާތްކޮށް ގުޅުންތައް ދެމެހެއްޓުމަކީ ތަކުލީފެކެވެ. ބައެއް ފަހަރު އެކުވެރިން ކުރާ ވިހަ ސަމާސާއަށް މައާފުކުރަންޖެހެ އެވެ. ބުރަކަށްޓަށް ހަރާލި ވަޅިން ޒަހަމެއް ނުވާ ކަމުގައި، ތަދެއްވެސް ނުވާކަމުގައި ބުނަންޖެހޭނީ ހިނިތުންވެ ހުރެ އެވެ. ތިބާގެ އަމިއްލަ ދިރިއުޅުމުގެ އެހެން ކަންކަމަށް ހާއްސަކުރެވުނު ވަގުތުތަކުން ބައެއް ރަށްޓެހިންނަށް ހާއްސަކޮށް، ބައެއް ފަހަރު ތިބާ އެދުނު އުފާ ދޫކޮށްލަން ޖެހި ދެ އެވެ. ތިބާއަށް ނިސްބަތްކޮށް ބުނި ބަހާމެދު ހިތްހަމަނުޖެހުނަސް އެ ހަނދާންވެސް ނައްތާލުމުގެ ތަކުލީފު އުފުލަންޖެހެ އެވެ. ގުޅުން ކަނޑާލައި ވާހަކަ ނުދައްކައި ހުރުމަކީވެސް ތަކުލީފެކެވެ. ތިބާގެ އެކުވެރިކަމުން މިސާލު ނަގައި އުޅުނު މީހުން އަދިވެސް ތިޔައީ އެކުވެރިންކަމުގައި ދެކި އަނެއް އެކުވެރިޔާގެ ހާލު ހަބަރު އަހައި ހަދާ ކޮންމެ ފަހަރަކު ހިތަށް ކުރާ އަސަރަކީ ތަކުލީފެކެވެ. ކުރިން އެ ނެގި މަޖަލާއި، އެކުގައި ކުރިއަށް ރާވާފައިހުރި ލަނޑުދަނޑިތަކަށް ދެން ދަތުރުކުރަންޖެހޭނީ، އެއްވެސް އެހީތެރިކަމެއް ނުލިބި، ތިބާ އެކަންޏެވެ. މުއާމަލާތްކޮށް ގުޅުންތައް ދެމެހެއްޓުމާއި، ވާހަކަ ނުދައްކައި ގުޅުން ކަނޑާލުމުގައިވެސް އޮތީ ތަކުލީފެވެ. ތިބާ ހިތް އެދޭ ތަކުލީފެއް ހިޔާރުކުރާށެވެ.
ދުނިޔޭގެ ދިރިއުޅުމުގައި ހުރި ތަކުލީފުތަކަށް ނިމުން އަންނާނީ ތިބާގެ އާހިރު ދުވަހު އެވެ. އެ ދުވަހާ ހަމައަށް ތިބާގެ ދިރިއުޅެން ހިޔާރު ކުރާ ކޮންމެ ކަމެއްގައިވެސް އޮތީ އެކަމެއްގެ ޒާތުން ހުރި ތަކުލީފެވެ. ތިބާއަށް އޮތީ ތިބާގެ ދިރިއުޅުން ބައްޓަންކުރަން ބޭނުންވާ ގޮތެއްގެ މައްޗަށް، ތިބާ ހިތް އެދޭ ތަކުލީފެއް ހިޔާރުކުރުމެވެ.
