ރިވައިވަލް ސްޕޯޓްސް އިން ޔޫގާންޑާގެ ދެ މުބާރާތަށް އަމާޒުކޮށް، އެ ގައުމަށް ދިޔައިރު، ފުރަތަމަ މުބާރާތުން ހާސިލްކުރަން ބޭނުންވި ކަންކަމަށް ބަލާއިރު ކުރެވުނު މަސައްކަތް ރަނގަޅު ކަމަށް އެ ޓީމުގެ ކޯޗު ނަޝްފާން މުހައްމަދު ބުނެފި އެވެ.
ރިވައިވަލް އިން ތައްޔާރުވީ، މި މަހުގެ 26-29 އަށް ކުރިއަށްދިޔަ ކެމްޕާލާ އިންޓަނޭޝަނަލް އާއި އަންނަ މަހުގެ 3-6 އަށް ކުރިއަށްދާ ޔޫގާންޑާ އިންޓަނޭޝަނަލް ސީރީސް އެވެ. އެ ގޮތުން، ކެމްޕާލާ މުބާރާތް ވަނީ ނިމިފަ އެވެ.
ސިންގަލްސް ކެޓަގަރީން، ރިވައިވަލް ކުޅުންތެރިންނަށް ކެމްޕާލާ މުބާރާތް ނިމުނީ ގަދަ 32 ކުޅުންތެރިންގެ ބުރުންނެެވެ. ކޮލިފިކޭޝަން ބުރުގެ ތިން މެޗުން މޮޅުވެގެން މެއިން ޑްރޯ އަށް އައި ހަސަން ޒަޔާން ބަލިވީ، އާރްޔާ ބިވްޕަތަކީއާ ވާދަކޮށް، 21-09، 21-12 އިންނެވެ. އިންޑިއާގެ ކްރިޝް ދޭސާއީ އަތުން ނިބާލް ބަލިވީ، 21-09، 21-07 އިންނެވެ. އަދި ޒަޔާން ޒަކީ ބަލިވީ އިންޑިއާގެ އަދިތުޔާ ގުޕްތާ އަތުންނެވެ. ސެޓުތައް ދިޔައީ، 21-11، 21-06 އިންނެވެ.
ޒަޔާން ޒަކީ އާއި ނިބާލްގެ ޕެއާ ވަނީ، ޑަބަލްސްގެ ކުއާޓާ ފައިނަލުގައި ވާދަކޮށްފަ އެވެ. މުބާރާތުގައި ހަތަރު ވަނަ އަށް ސީޑުކޮށްފައިވާ، އިންޑިއާގެ ވިޕްލަވް ކުވާލޭ އާއި ވިރާޖް ކުވާލޭގެ ޕެއާއާ ދެކޮޅަށް ކުޅެ ނިބާލް އާއި ޒަޔާންގެ ޕެއާ ބަލިވީ، 11-21 11-21 އިންނެވެ.
ކެމްޕާލާ މުބާރާތާ ބެހޭގޮތުން ކޯޗު ނަޝްފާން ބުނީ، މުޅި މުބާރާތަށް ބަލާއިރު ކަންކަން ދިޔައީ ރަނގަޅަށް ކަމަށެވެ.
"ހަސަން ޒަޔާން ތިން މެޗުން މޮޅުވެ، މެއިން ޑްރޯ އަށް ޕްރޮމޯޓްވުން. ނިބާލް އާއި ޒަޔާންގެ ޕެއާ ޑަބަލްސްގެ ކުއާޓާ އަށް ޕްރޮމޯޓްވުން. އުންމީދަކީ ޔޫގާންޑާ ސީރީސްގައި އިރާދަކުރެއްވިއްޔާ މި އަށް ވުރެ ރަނގަޅު ނަތީޖާއެއް ހޯދުން،" ގައުމީ ފިިރިހެން ބެޑްމިންޓަން ޓީމުގެ ކެޕްޓަންކަން ކުރިން ކުރި ނަޝްފާން ބުންޏެވެ.
ޔޫގާންޑާ އިންޓަނޭޝަނަލް ސީރީސްގައި ފިރިހެން އިވެންޓްތަކުގެ އިތުރުން، އަންހެން ސިންގަލްސް އާއި އަންހެން ޑަބަލްސް އަދި، ދެ ޖިންސުގެ ކުޅުންތެރިން ހިމެނޭ، މިކްސް ޑަބަލްސް އިވެންޓްގައި ވެސް ވާދަކުރާނެ އެވެ. އެއީ، އެ މުބާރާތަށް ގައުމީ ޓީމުގެ، އައިމިނަތު ނަބީހާ (ނަބީ) އާއި ފާތިމަތު ނަބާހާ ވެސް ޓީމާ ގުޅޭނެތީ އެެވެ.
