ރިވައިވަލް ސްޕޯޓްސް ކްލަބްގެ ކުޅުންތެރިން، ޔޫގާންޑާގައި ކުރިއަށްދާ އިންޓަނޭޝަނަލް ދެ މުބާރާތުގައި ވެސް ވާދަކުރުމަށް އެ ގައުމުގައި މި ވަގުތު ތިބިއިރު، ޓާގެޓަކީ އެ ދެ މުބާރާތުން ވެސް މެޑަލް ހޯދުން ކަމަށް އެ ޓީމުގެ ނިބާލް އަހުމަދު ބުނެފި އެވެ.
ޔޫގާންޑާގައި މިއަދު ފެށި، ކެމްޕާލާ އިންޓަނޭޝަނަލް އާއި އަންނަ މަހުގެ 3-6 އަށް ކުރިއަށްދާ ޔޫގާންޑާ އިންޓަނޭޝަނަލް ސީރީސްގައި ރިވައިވަލް އިން ޒަޔާން ޒަކީ، ނިބާލް އަދި ހަަސަން ޒަޔާން ވާދަކުރެ އެވެ.
ހަސަން ޒަޔާން ވަނީ ކެމްޕާލާ މުބާރާތުގެ ފިިރިހެން ސިންގަލްސް ކޮލިފިކޭޝަން ތިން މެޗުން މޮޅުވެ، މެއިން ޑްރޯ، ގަދަ 32 ކުޅުންތެރިންގެ ބުރުން ޖާގަ ހޯދައިފަ އެވެ.
ފިރިހެން ސިންގަލްސް މެއިންޑްރޯގައި ރިވައިވަލްގެ ނިބާލް އަހުމަދު އާއި ޒަޔާން ޒަކީ ވެސް ކުޅޭނެ އެވެ. ޒަޔާން ޒަކީ ކުޅޭނީ ކޮލިފިކޭޝަނުން އައި އިންޑިއާގެ އަދިތުޔާ ގުޕްތާއާ އެވެ. ނިބާލް ބައްދަލުކުރާނީ ކޮލިފިކޭޝަނުން އައި އިންޑިއާގެ ކްރިޝް ދޭސާއީއާ އެވެ. ފިރިހެން ޑަބަލްސްގައި ނިބާލް އާއި ޒަޔާން ޒަކީގެ ޕެއާ ބައްދަލުކުރާނީ، ޔޫގާންޑާގެ އަކްރަމް ކަމޯގާ އާއި އަބްދުލް ސްވަބްރޫގެ ޕެއާއާ އެވެ.
"ވަރަށް ޓްރެއިނިން ވެސް ހެދިއްޖެ މި ދެ މުބާރާތަށް. ޓާގެޓަކީ މި ދެ މުބާރާތުން ވެސް މެޑަލެއް ހޯދުން." މުބާރާތާ ބެހޭގޮތުން، ނިބާލް ބުންޏެވެ.
ރިވައިވަލްގެ ކޯޗު ނަޝްފާން މުހައްމަދު ބުނީ، ރިވައިވަލް އިން ވާދަކުރާ އެހެން މުބާރާތްތަކެކޭ އެއްގޮތަށް މި މުބާރާތުގައި ވެސް ރަނގަޅު ކާމިޔާބެއް ލިބޭނެ ކަމަށް އުންމީދުކުރާ ކަމަށެވެ.
ޔޫގާންޑާ ސީރީސް މުބާރާތުގައި، ފިރިހެން އިވެންޓްތަކުގެ އިތުރުން، އަންހެން ސިންގަލްސް އާއި އަންހެން ޑަބަލްސް އަދި، ދެ ޖިންސުގެ ކުޅުންތެރިން ހިމެނޭ، މިކްސް ޑަބަލްސް އިވެންޓްގައި ވެސް ވާދަކުރާނެ އެވެ. އެއީ، އެ މުބާރާތަށް ގައުމީ ޓީމުގެ، އައިމިނަތު ނަބީހާ (ނަބީ) އާއި ފާތިމަތު ނަބާހާ ވެސް ޓީމާ ގުޅޭނެތީ އެެވެ.
