އިޒްރޭލުން 24 ގަޑިއިރު ތެރޭގައި ލުބްނާނަށް ދިން ހަމަލާތަކުގައި 500 މީހުން މަރާލައިފި އެވެ.
ލުބްނާނުގެ ހެލްތު މިނިސްޓްރީއާ ހަވާލާދީ "އަލްޖަޒީރާ" އިން ބުނީ ހަމަލާތަކުގައި މަރުވި މީހުންގެ ތެރޭގައި 58 އަންހެނުންނާއި 35 ކުޑަކުދިން ހިމެނޭ ކަމަށެވެ. އެ ހަމަލާތަކުގައި ޖުމްލަ 1،645 މީހުން ޒަހަމްވި އެވެ.
މިއީ ލުބްނާނުގައި 1975 އިން 1990 އަށް ކުރިއަށް ދިޔަ އެތެރޭގެ ހަނގުރާމައަށް ފަހު އެ ގައުމަށް ބަޔަކު ދިން އެންމެ ބޮޑު ހަމަލާ އެވެ.
ހަމަލާތަކާ ގުޅިގެން ލުބްނާނުގެ ދެކުނުގައި ތިބި މީހުން އަންނަނީ އެހެން ސަރަހައްދުތަކަށް ބަދަލުވަމުންނެވެ.
އިޒްރޭލުން ލުބްނާނަށް ދެމުން އަންނަ ހަމަލާތައް ވަރުގަދަ ކުރީ ހިޒްބުﷲ އަށް ހަމަލާ ދިނުމުގެ ނަމުގަ އެވެ. ނަމަވެސް ހަމަލާތަކުގައި ކަމާ ނުބެހޭ ގިނަ ބަޔަކު މަރުވާތީ ގިނަ ބަޔަކު އަންނަނީ ކަންބޮޑުވުން ފާޅު ކުރަމުންނެވެ.
އިޒްރޭލުން މެދުއިރުމަތީގެ ސުލްހަ ނަގާލުމަށް ކުރަމުންދާ މަސައްކަތް މެދުއިރުމަތީގެ ގައުމުތަކުން އަންނަނީ ކުށްވެރިކޮށް، ހަމަލާތައް ދިނުން ހުއްޓާލުމަށް ގޮވާލަމުންނެވެ.
އޭގެ އިތުރުން އިޒްރޭލުން ފަލަސްތީނުގެ ގާޒާއަށް ދެމުން އަންނަ ހަމަލާތަކުގައި އެތައް ހާސް ބަޔަކު މިހާތަނަށް މަރުވެފައިވާއިރު އޭގެ ތެރޭގައި ގިނައީ ކުޑަ ކުދިންނާއި އަންހެނުންނެވެ.
