ރިވައިވަލް ސްޕޯޓްސް ކްލަބުން ޔޫގާންޑާގައި ކުރިއަށްދާ ބައިނަލްއަގުވާމީ ދެ މުބާރާތެއްގައި ވާދަކުރުމަށް އެ ގައުމަށް ފުރައިފި އެވެ.
އެ ގޮތުން، ޔޫގާންޑާގައި މި މަހުގެ 26-29 އަށް ކުރިއަށްދާ ކެމްޕާލާ އިންޓަނޭޝަނަލް އާއި އަންނަ މަހުގެ 3-6 އަށް ކުރިއަށްދާ ޔޫގާންޑާ އިންޓަނޭޝަނަލް ސީރީސްގައި ވާދަކުރާ ގޮތަށް ވަނީ ހަމަޖެހިފަ އެވެ.
ކޯޗު ނަޝްފާން މުހައްމަދުގެ އިރުޝާދުގެ ދަށުން، ޒަޔާން ޒަކީ، ނިބާލް އަހުމަދު އަދި ހަސަން ޒަޔާން މުހައްމަދުގެ އިތުރުން އައިމިނަތު ނަބީހާ (ނަބީ) އާއި ފާތިމަތު ނަބާހާ (ނަބާ) ވެސް މި ފަހަރު ޓީމުން ފެންނާނެ އެވެ. އެ ގޮތުން، ނަބާ އާއި ނަބީ، ވާދަކުރާނީ އިންޓަނޭޝަނަލް ސީރީސްގަ އެވެ.
ކެމްޕާލާ މުބާރާތުގައި ފިރިހެން ސިންގަލްސް ބައިގައި، ހަސަން ޒަޔާން އާއި ޒަޔާން ޒަކީ އަދި ނިބާލް ވާދަކުރާއިރު، ޑަބަލްސްގައި ނިބާލް އާއި ޒަޔާންގެ ޕެއާ ކުޅޭނެ އެވެ. އަދި، ޔޫގާންޑާ ސީރީސް މުބާރާތުގައި، ފިރިހެން އިވެންޓްތަކުގެ އިތުރުން، އަންހެން ސިންގަލްސް އާއި އަންހެން ޑަބަލްސް އަދި މިކްސް ޑަބަލްސްގައި ވެސް ވާދަކުރާނެ އެވެ.
މީގެ ކުރިން ވެސް ރާއްޖޭގެ ކުޅުންތެރިން ވަނީ ޔޫގާންޑާ މުބާރާތުގައި ވާދަކޮށް ކާމިޔާބީތަކެއް ހާސިލްކޮށްފަ އެވެ.
