ފަލަސްތީނާ ދެކޮޅަށް ގަތުލްއާންމު ހިންގަމުންދާ އިޒްރޭލުން ފަލަސްތީނުގެ ސެންޓްރަލް ވެސްޓް ބޭންކުގެ ރާމަﷲ ގައި ހުންނަ އަލްޖަޒީރާ އޮފީހަށް ހަތިޔާރާއެކު ވަދެގަނެފި އެވެ.
އަލްޖަޒީރާއިން ބުނީ އިޒްރޭލުން އެ އޮފީހަށް ވަދެގަނެ އެތަނުގައި ތިބި ސްޓާފުން ނުކުންނަން އިންޒާރުދީ، 45 ދުވަސް ވަންދެން އެތަން ބަންދު ކުރަން އަންގާފައިވާ ކަމަށެވެ.
"އިޒްރޭލު ސިފައިން އައިސް އޮފީހުގައި ތިބި އަލްޖަޒީރާ މުވައްޒަފުންނަށް އިންޒާރު ދިނީ 10 މިނެޓު ތެރޭގައި އެތަން ހުސް ކުރަން. ދާއިރު އަމިއްލަ ތަކެތި ވެސް ހިފައިގެން ދާން ބުނީ. އެމީހުން ބުނީ 45 ދުވަސް ވަންދެން އެތަން ބަންދު ކުރަން އަމުރު ލިބިފައިވާ ކަމަށް،" އަލްޖަޒީރާއިން ބުންޏެވެ.
އިޒްރޭލުގެ ސިފައިން އަންނަނީ އެތަނުގައި ވީޑީއޯ ނުކުރުމަށް އަންގައި، މުވައްޒަފުންނަށް ހުރަސް އަޅަމުން ކަމަށް ވެސް އަލްޖަޒީރާއިން ބުންޏެވެ.
ހުޅަނގު ޖެރޫސަލަމްގައި ހުންނަ އަލްޖަޒީރާގެ ހެޑްކުއާޓާ ބިއުރޯ ވެސް އިޒްރޭލުން ވަނީ 45 ދުވަހަށް ބަންދު ކޮށްފަ އެވެ. އަދި އެ މުއްދަތު އިޒްރޭލުން އަންނަނީ އިތުރު ކުރަމުންނެވެ.
އެގޮތުން ރާމަﷲ ގައި ހުންނަ އަލްޖަޒީރާ އޮފީސް ބަންދުކުރަން ނެރުނު 45 ދުވަހުގެ މުއްދަތު ވެސް އިތުރު ކުރަމުން ދާނެ ކަމަށް ބެލެވެ އެވެ.
ފަލަސްތީނުގައި ހިންގާ ގަތުލްއާންމާ ގުޅޭ ހަބަރުތައް މެދުކެނޑުމެއް ނެތި އަލްޖަޒީރާއިން ގެނެސްދޭތީ، އެ މީޑިއާއަށް އެކި ގޮތްގޮތުން އިޒްރޭލުން ދަނީ ފިއްތުންތައް ކުރިމަތި ކުރުވަމުންނެވެ.
