ލަންޑަން (ސެޕްޓެމްބަރު 13) - މަޝްހޫރު ޓީމު އިވެންޓް، ޓެނިސް މުބާރާތް، ލޭވާ ކަޕުގައި ވާދަކުރާ ޓީމު ޔޫރަޕުން އެހެން ކުޅުންތެރިންނަށް ފުރުސަތު ދިނުމުގެ ގޮތުން ސްޕެއިނުގެ މަޝްހޫރު ތަރި، ރަފައެލް ނަޑާލް ޓީމާ ދުރަށް ޖެހިލައިފި އެވެ.
ނަޑާލް، 38، އެންމެ ފަހުން ރަސްމީ ޓެނިސް މެޗެއްގައި ކުޅެފައިވަނީ، މި ފަހަރުގެ އޮލިމްޕިކްސްގެ ޑަބަލްސް އިވެންޓްގެ ކުއާޓާ ފައިނަލުގައި، އަރަމުން އަންނަ ޓެނިސް ތަރި، ކާލޯސް އަލްކަރާޒާ އެއް ޕެއާ އަކަށެވެ.
ޓެނިހުގެ ބޮޑެތި މުބާރާތްތަށް، ގްރޭންޑް ސްލޭމްގެ 22 މުބާރާތުގެ ތަށި ހޯދާފައިވާ ނަޑާލް، މީގެ ކުރިން ވަނީ 2024 އަކީ އޭނާގެ ޕްރޮފެޝަނަލް ކެރިއަރުގެ ފަހު އަހަރު ކަމަށް ބުނެފަ އެވެ. އެކަމަކު، ވަކި ސަބަބެއް ހާމަކޮށްފައެއް ނުވެ އެވެ.
ޖަރުމަނުގެ ބާލީގައި އަންނަ ހަފްތާގައި ފަށާ ލޭވާ ކަޕްގެ ޓީމު ޔޫރަޕްގައި ނުހިމެނޭނެކަން ނަޑާލް އިއުލާނުކުރިއިރު، އަނިޔާގެ ވާހަކައެއް ހިއްސާކޮށްފައެއް ނުވެ އެވެ.
"މި ޓީމު މުބާރާތެއް، އަހަރެން ބޭނުންވަނީ ޓީމު ޔޫރަަޕަށް އެންމެ ރަނގަޅު ގޮތްތައް. އެހެންކަމަަށްވުމާ އެކު، އަހަރެން ދެކެނީ، މި ވަގުތު އަހަންނަށް ވުރެ ރަނގަޅު ކުޅުންތެރިންނަށް ޓީމުން ފުރުސަތު ދޭން، އެހެންވެ، އަހަރެން މި ފަހަރު ޓީމުގައި ނުހިމެނޭނެ،" ނަޑާލް ބުންޏެވެ.
ބާލިންގައި މި މަހު 20 ވަނަ ދުވަހު ފަށާ ލޭވާ ކަޕްގައި، ކުޅޭނީ ޓީމު ޔޫރަޕް އާއި ޓީމު ވޯލްޑް އެވެ.
ލޭވާ ކަޕްގައި ތިން ފަހަރެއްގެ މަތިން ކުޅެފައިވާ ނަޑާލް އަށް މި ފަހަރުގެ ޓެނިސް ގްރޭންޑް ސްލޭމް މުބާރާތްތަކުގެ ތެރެއިން ކުޅެވުނީ، ފްރެންްޗް އޯޕަންގައި އެކަންޏެވެ. އެކަމަކު، އެ މުބާރާތުގެ، ފުރަތަމަ ބުރުގައި އަލެކްސަންޑަ ޒްވެރެވް އަތުން ބަލިވީ އެވެ. އަދި އަނިޔާއާ ހެދި ވިމްބަލްޑަންގައި ނުކުޅެ އޮލިމްޕިކްސް އަށް ފިޓްވެގެން އައި ނަމަވެސް، ސިންގަލްސްގެ ދެ ވަނަ ބުރުގައި ނޮވަކް ޖޮކޮވިޗް އަތުން ބަލިވެ ކެޓީ އެވެ.
