މަލާގާ، ސްޕެއިން (ނޮވެމްބަރު 20) - ޑޭވިސް ކަޕްގެ ކުއާޓާ ފައިނަލުގައި ނެދަލެންޑްސް އަތުން ކަޓައި، ސްޕެއިނުގެ ލެޖެންޑަރީ ޓެނިސް ތަރި، ރަފައެލް ނަޑާލްގެ ޕްރޮފެޝަނަލް ޓެނިސް ކެރިއަރަށް 23 އަހަރަށް ފަހު ނިމުން އަތުވެއްޖެ އެވެ.
ނަޑާލް، 38 ވަނީ މި މުބާާރާތް ފެށުމުގެ ކުރިން ވެސް، މިއީ، އޭނާގެ ކެރިއަރުގެ ފަހު މުބާރާތް ކަމަށް އިއުލާނުކޮށްފަ އެވެ. ނަޑާލްގެ ފަހު މެޗަކީ، ކުއާޓާ ފައިނަލުގެ ބެސްޓް އޮފް ތުރީސްގައި ރޭ ނެދަލެންޑްސްގެ ބޮޓިކް ވެން ޑި ޒަންޑުލްޝްޕްއާ ކުޅެ، 6-4، 6-4 އިން ބަލިވި މެޗެވެ.
ޓެނިހުގެ ގްރޭންޑް ސްލޭމް 22 މުބާރާތުގެ ތަށި އުފުލާލި ނަޑާލް، ރޭގެ މެޗަސް ފަހު ބުނީ، ނެދަލެންޑްސް އަށް މަރުހަބާ ކިޔާ ކަމަށާއި އަދި ސްޕެއިނުން އޭނާ އަށް މި މުބާރާތުގައި ކުޅެން ފުރުސަތު ދިނީތީވެ، ޝުކުރު އަދާކުރާ ކަމަށެވެ.
"އަހަރެން މި ހުއްޓާލަނީ ކުޅެން އަމިއްލަ ނަފްސަށް އިހުސާސްކުރެވޭ ވަރުބަލިކަމެއް ހުރެގެނެއް ނޫން. އެކަމަކު، އަހަރެންގެ ހަށިގަނޑަކު ނެތް މިކަން އިތުރަށް ބޭނުންވާ ލެވަލްގައި ކުރުމަށް ބޭނުންވާ ކަންކަމެއް. ޖެހޭނެ އެކަން ވެސް ގަބޫލުކުރަން. އަހަރެން ވަރަށް ފަހުރުވެރިވޭ، އަހަރެން ހުސްވަގުތުގައި ކުރަން ބޭނުންވި ކަމެއް އަަހަރެންގެ ޕްރޮފެޝަނަލް ކެރިއަރަކަށް ހަދައި، އެހާ ގިނަ ދުވަހު މި ކަމުގައި އުޅެވުނީތީ،" ނަޑާލް ބުންޏެވެ.
ނަޑާލް ބުނީ، އޭނާގެ ކެރިއަރުގައި ވަރަށް އުފާވެރި އަދި ވަރަށް ހިތްދަތި ދުވަސްތަކެއް ވެސް ތަޖުރިބާ ކުރެވުނު ކަމަށެެވެ. އެންމެ އުފާވަނީ ކާމިޔާބު ޓެނިސް ކެރިއަރެއް ބިނާކުރުމުގައި އާއިލާގެ ސަޕޯޓާއި ހިތްހަމަޖެހުމުގެ ތެރެއިން ހުރިހާ ކަމެއް ކުރެވުން ކަމަށް ނަޑާލް ފާހަގަކުރި އެވެ.
ދުނިޔޭގެ އެންމެ ބޮޑު ފުޓްބޯޅަ ކްލަބް، ރެއާލް މެޑްރިޑްގެ އެމްބަސަޑަރެއްގެ ގޮތުގައި ވެސް މަސައްކަތް ކުރާ ނަޑާލްގެ ކާމިޔާބީގެ އެންމެ ހާއްސަ މުބާރާތަކީ 14 ފަހަރު ފްރެންޗް އޯޕަން ކާމިޔާބު ކުރުމެވެ.
ނަޑާލް ޓެނިހުގައި މަޝްހޫރުވެފައިވާ އެއް ނަމަކީ، "ކިންގް އޮފް ކްލޭ" އެވެ. އެއީ، ފްރެންޗް އޯޕަން މުބާރާތުގައި ކުޅުނު 116 މެޗުގެ ތެރެއިން 112 މެޗުން މޮޅުވެފައިވާތީ އެވެ. ޔޫއެސް އޯޕަން ތަށި ހަތަރު ފަހަރު ހޯދިއިރު، ވިމްބަލްޑަން އާއި އޮސްޓްރޭލިއަން އޯޕަން ކޮންމެ މުބާރާތެއް ދެ ފަހަރު ކާމިޔާބުކޮށްފައިވެ އެވެ.
އޮލިމްޕިކްސްގެ ސިންގަލްސް އާއި ޑަބަލްސް އިނ ރަން މެޑަލް ހޯދުމުގެ އިތުރުން، ނަޑާލް ވަނީ ސްޕެއިނަށް ފަސް ފަހަރު ޑޭވިސް ކަޕް ހޯދައިދޭން އެހީތެރިވެދީފަ އެވެ. އެންމެ ފަހުން، އެ ތަށި ހޯދީ 2019 ވަނަ އަހަރު އެވެ.
ރަފައެލް ނަޑާލް
