މެޑްރިޑް (އޮކްޓޫބަރު 10) - ޓެނިހުގެ ތާރީހުގައި ވެސް ހާއްސަ ކުޅުންތެރިޔެއް ކަމަށްވާ، ލެޖެންޑް، ރަފައެލް ނަޑާލް، ކުރިއަށް އޮތް ޑޭވިސް ކަޕަށް ފަހު ޕްރޮފެޝަނަލް ކެރިއަރު ނިންމާލާނެކަން އިއުލާނުކޮށްފި އެވެ.
އުމުރުން 38 އަހަރުގެ ނަޑާލްގެ ޕްރޮފެޝަނަލް ކެރިއަރުގައި ކުޅޭ ފަހު މުބާރާތަކަށް ވެގެންދާނީ އަންނަ މަހު ސްޕެއިނުގެ މަލާގާގައި ކުރިއަށްދާ ޑޭވިސް ކަޕް ފައިނަލްސް އެވެ.
މިދިޔަ ދެ އަހަރެއްހާ ދުވަހު، އަނިޔާގެ އެކި މައްސަލަތަކާ ހުރެ ނަޑާލް އަށް ކުޅެވުނީ މަދު މުބާރާތްތަކެއްގަ އެވެ. ޓެނިހުގެ ގްރޭންޑް ސްލޭމް 22 ތަށި ހޯދާފައިވާ ނަޑާލް، މިދިޔަ އަހަރު ދިން އިންޓަވިއުއެއްގައި ވަނީ މި އަހަރަކީ އޭނާގެ ޕްރޮފެޝަނަލް ކެރިއަރުގެ ފަހު ސީޒަން ކަމަށް ބުނެފަ އެވެ.
މިއަދު އާންމުކުރި ވީޑިއޯއެއްގައި ނަޑާލް ބުނެފައިވަނީ، މިއީ، އޭނާގެ ރިޓަޔަކުރަން އެންމެ ރަނގަޅު ވަގުތު ކަމަށް ގަބޫލުކުރެވޭ ކަމަށެވެ.
"ހަގީގަތުގައި މިދިޔަ ދެ އަހަރު މިދިޔައީ ވަރަށް އުނދަގޫކޮށް. އަހަންނަށް ޔަގީންވަނީ އުނދަގުލެއް ނެތި އަހަރެން ކުޅުނު އެއްވެސް މުބާރާތެއް ނޯންނާނެހެން،" ނޮވަކް ޖޮކޮވިޗަށް ވުރެ ފަހަތުގައި މި ވަގުތު އޮތް ޓެނިހުގެ ތާރީހުގައި ދެ ވަނަ އަށް އެންމެ ކާމިޔާބު ކުޅުންތެރިޔާ، ނަޑާލް ބުންޏެވެ.
ނަޑާލްގެ ކާމިޔާބީގެ އެންމެ ހާއްސަ މުބާރާތަކީ 14 ފަހަރު ފްރެންޗް އޯޕަން ކާމިޔާބު ކުރުމެވެ. ދުނިޔޭގެ އެންމެ ބޮޑު ފުޓްބޯޅަ ކްލަބް، ރެއާލް މެޑްރިޑްގެ އެމްބަސަޑަރެއްގެ ގޮތުގައި ވެސް މަސައްކަތް ކުރާ ނަޑާލް ޓެނިހުގައި މަޝްހޫރުވެފައިވާ އެއް ނަމަކީ، "ކިންގް އޮފް ކްލޭ" އެވެ. އެއީ، ފްރެންޗް އޯޕަން މުބާރާތުގައި ކުޅުނު 116 މެޗުގެ ތެރެއިން 112 މެޗުން މޮޅުވެފައިވާތީ އެވެ.
ޔޫއެސް އޯޕަން ތަށި ހަތަރު ފަހަރު ހޯދިއިރު، ވިމްބަލްޑަން އާއި އޮސްޓްރޭލިއަން އޯޕަން ކޮންމެ މުބާރާތެއް ދެ ފަހަރު ކާމިޔާބުކޮށްފައިވެ އެވެ. އަދި ނަޑާލް ވަނީ އޮލިމްޕިކްސްގެ ސިންގަލްސް އާއި ޑަބަލްސް އިން ރަން މެޑަލް ހޯދުމުގެ އިތުރުން، ސްޕެއިނަށް ފަސް ޑޭވިސް ކަޕް ހޯދައިދޭން އެހީތެރިވެދީފަ އެވެ. އެންމެ ފަހުން، އެ ތަށި ހޯދީ 2019 ވަނަ އަހަރު އެވެ.
