ގައުމީ ޓޭބަލް ޓެނިސް މުބާރާތުގެ ފިރިހެން ސިންގަލްސް ޗެމްޕިއަންކަން ހޯދައި، ޒުވާން ކުޅުންތެރިޔާ، އަހްޔާރު އަހުމަދު ހާލިދު ތަފާތު ދައްކައިފި އެވެ.
ގައުމީ ތަށި 11 ފަހަރު ހޯދާފައިވާ މުންސިފްގެ މައްޗަށް އަހްޔާރު ކުރިހޯދީ، ވާދަވެރި ކުޅުމަކަށް ފަހު އެވެ.
މާލޭ ޓީޓީ ހޯލުގައި މިއަދު ކުޅުނު ފައިނަލުގައި، އަހްޔާރު ވަނީ ފުރަތަަމަ ކުޅުނު ތިން ސެޓު ގެންގޮސްފަ އެވެ. އެ ގޮތުން، އަހްޔާރު، މި ސެޓުތައް ގެންދިޔައީ، 12-10، 11-1 އަދި 11-08 އިންނެވެ. ސީދާ ހަތަރު ސެޓުން، އަހްޔާރު މޮޅުވާނެ ކަމަށް ބެލެވުނު ނަމަވެސް މުންސިފް ވަނީ ތަޖުރިބާގެ ބޭނުންކޮށް، ދެން ކުޅުނު ތިން ސެޓު ގެންގޮސްފަ އެވެ. އެއީ، 08-11، 05-11 އަދި 06-11 އިންނެވެ.
ނަތީޖާ ނެރުނު ސެޓެއް ކުޅެން ޖެހުނުއިރު، އަހްޔާރު ފެނުނީ ތަފާތު ރޫހެއްގައި، ޕްރެޝަރަށް ހޭނިގެން ކުޅެލިތަނެވެ. އެ ގޮތުން މި ސެޓު، 11-07 އިން ގެންގޮސް އަހްޔާރު މެޗުން މޮޅުވީ އެވެ. މި ނަތީޖާއާ އެކު މުންސިފް މި ވަނީ ޖެހިޖެހިގެން ތިން ގައުމީ ފައިނަލުގައި ނާކާމިޔާބާ ކުރިމަތިލައިފަ އެވެ. މި މެޗަށް އައިއިރު، މުންސިފް ވަނީ އެސޯސިއޭޝަން ކަޕްގެ ސިންގަލްސް ޗެމްޕިއަންކަމާއި ގައުމީ ރޭންކިންގެ އެއް ވަނަ ހޯދައިފަ އެވެ.
ފައިނަލް މެޗަށް ފަހު އަހްޔާރު އޭނާގެ އާއިލާއާ އެކު އުފާފާޅުކުރަނީ.--- ފޮޓޯ: މިރާން ނާޝިމް/އަދަދު
މި މަހުގެ 15 ވަނަ ދުވަހު، 17 އަހަރު ފުރޭ އަހްޔާރު ވަނީ، ޒީކް ހަސަން ލަތީފް ބަލިކޮށް، 19 އަހަރުން ދަށުގެ ފިރިހެން ސިންގަލްސް ތަށި ވެސް ހޯދައިފަ އެވެ. އަދި 19 އަހަރުން ދަށުގެ މިކްސް ޑަބަލްސް ޗެމްޕިއަންކަން ހޯދީ އަހްޔާރު އާއި ފާތިމަތު ދީމާ އަލީގެ ޕެއާ އެވެ. އަހްޔާރު އާއި އިބްރާހިމް އައުޒަމް އަޒީމްގެ ޕެއާ ދިޔައީ، ފިރިހެން ޑަބަލްސްގެ ތިން ވަނަ އެވެ. އަދި އޯޕަންސް ބައިގެ މިކްސް ޑަބަލްސް އިން އަހްޔާރު އާއި ދީމާގެ ޕެއާ ދިޔައީ ދެ ވަނަ އެވެ. އެ ބައިގެ ޗެމްޕިއަންކަން ހޯދީ، މުންސިފް އާއި އައިޝަތު ރަފާ ނާޒިމްގެ ޕެއާ އެވެ.
ތޭރަ އަހަރުން ދަށުގެ ފިރިހެން ސިންގަލްސް ޗެމްޕިއަނަކީ، މުހައްމަދު ޒާއިމް އަހުމަދު އެވެ. ފަނަރަ އަހަރުން ދަށުގެ ފިރިހެން ސިންގަލްސް ތަށި އުމޭރު މުހައްމަދު މުއިއްޒު ހޯދިއިރު، ފަނަރަ އަހަރުން ދަށުގެ ޑަބަލްސް ޗެމްޕިއަަނުންނަކީ މުހައްމަދު ހަލަފް ރާފިއު އާއި ޒާއިމްގެ ޕެއާ އެވެ. ސަތާރަ އަހަރުން ދަށުގެ ފިރިހެން ސިންގަލްސް ތަށި ޒީކް ހޯދިއިރު، އެ އުމުރުފުރާގެ ފިރިހެން ޑަބަލްސް ޗެމްޕިއަނުންނަކީ، ޒީކް އާއި އުމޭރު އެވެ. އަދި 17 އަހަރުން ދަށުގެ މިކްސް ޑަބަލްސް ޗެމްޕިއަނުންނަކީ، ޒީކް އާއި މިންހާ މަހްޖޫބު ޝުޖާއު އެވެ.
ޑިވިޝަން ދޭއްގެ ފިރިހެން ސިންގަލްސް ތަށި އަޒީމް ޝިހާމް ހޯދިއިރު، ވެޓެރަންސް ބައިގެ ސިންގަލްސް ޗެމްޕިއަނަކީ އަލީ އާދަމް މަނިކް އެވެ.
