ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް)ގެ ހިންގުން ކުޅިވަރާ ބެހޭ ގައުމީ މަޖިލީހަށް ހަވާލުކުރަން ކޮމިޝަނާ އޮފް ސްޕޯޓްސް އިން ނިންމި ނިންމުމާ ދެކޮޅަށް ބީއޭއެމް އިން ސިވިލް ކޯޓަށް ހުށަހެޅި މައްސަލަ ނާކާމިޔާބުވެއްޖެ އެވެ.
މިދިޔަ މަހު 15 ވަނަ ދުވަހު، ކޮމިޝަނާ އޮފް ސްޕޯޓްސް، މުހައްމަދު ތޮލާލް ވަނީ ބެޑްމިންޓަން އެސޯސިއޭޝަންގެ ކަންކަން ބެލުން ސްޕޯޓްސް ކައުންސިލްގެ ދަށަށް ގެނެސްފަ އެވެ.
ބީއޭއެމް އިން އެ މައްސަލަ ކޯޓަށް ހުށަހެޅިއިރު، ފާހަގަކޮށްފައިވަނީ، ކޮމިޝަނާ އޮފް ސްޕޯޓްސްގެ ނިންމުން ތަންފީޒުކޮށްފިނަމަ، ދުނިޔޭގެ މައި ބެޑްމިންޓަން ޖަމިއްޔާ، ބެޑްމިންޓަން ވޯލްޑް ފެޑެރޭޝަން (ބީޑަބްލިއުއެފް) އިން ރާއްޖެ އަށް ފިޔަވަޅު އަޅާނެކަމުގެ އިންޒާރުދީފައިވާ ކަމެވެ. އަދި ކޮމިޝަނަރުގެ އެ އެންގުން ބާތިލްކުރުމުގެ އަމުރަކަށް އެދި، ބެޑްމިންޓަން އެސޯސިއޭޝަަނުން ސިވިލް ކޯޓަށް މައްސަލަ ހުށަހެޅީ، މިިދިޔަ މަހުގެ 27 ގަ އެވެ. އެ މައްސަލައިގެ ޖުޑީޝިއަލް ރިވިއު އަޑުއެހުމެއް، މިދިޔަ އާދިއްތަ ދުވަހު ސިވިލް ކޯޓުގައި ކުރިއަށްދިޔަ އެވެ.
ސިވިލް ކޯޓުން އިއްޔެ ނިންމާފައިވަނީ، ބެޑްމިންޓަން އެސޯސިއޭޝަނުން އެދުނު ގޮތަށް އަމުރު ނެރެދެވެން ނެތް ކަމަށެވެ. ސަބަބަކީ، ވަގުތީ ހުށަހެޅުން ހުށަހެޅުމުގެ ހައިސިއްޔަތު ބެޑްމިންޓަން އެސޯސިއޭޝަންގެ މުއްދަތު ހަމަވެފައި އޮތް ހިންގާ ކޮމިޓީ އަށް ލިބިގެން ނުވާތީ، ވަގުތީ އަމުރެއް ނެރެދެވޭނެ ގާނޫނީ ހަމައެއް ނެތުމެވެ.
ބެޑްމިންޓްން އެސޯސިއޭޝަންގެ ވަކީލް، އަލީ ސައީދު ބުނީ، ވަގުތީ އަމުރާމެދު ގޮތެއް ނިންމާފައިވަނީ ޤާނޫނާ ހިލާފަށް ކަމުގައިވާތީ އެ މައްސަލަ އިސްތިއުނާފު ކުރުމުގެ މަސައްކަތް ކުރަމުން އަންނަ ކަމަށެވެ.
މިއީ މި އަހަރު ތެރޭ، ބެޑްމިންޓަން އެސޯސިއޭޝަނާ ގުޅޭ މައްސަލައެއް ކޯޓުގައި ކުރިއަށްދިޔަ ދެ ވަނަ ފަހަރެވެ. ބެޑްމިންޓަން އެސޯސިއޭޝަންގެ އެންމެ ފަހުގެ ރައީސަކަށް ހުންނެވި، މޫސާ ނާޝިދު (މޫސަ)، ހައި ކޯޓުގައި ޕްރޮސެކިއުޓާ ޖެނެރަލްއާ ދެކޮޅަށް ވެސް މައްސަލައެއް ކުރިއަށްގެންދިޔަ އެވެ.
ހައި ކޯޓުގައި ކުރިއަށްގެންދިޔަ މައްސަލައިގައި މޫސަ ވަނީ އޭނާއާ މެދުގައި ސަރުކާރު މުވައްޒަފެއްގެ ގޮތުގައި މުހާތަބު ނުކުރެވޭނެ ކަމަށާއި އޭނާ އަކީ އެއްވެސް އުޖޫރައެއް ސަރުކާރުން ލިބޭ މީހެއް ނޫން ކަމަށް ހާމަކޮށްފަ އެވެ. އެކަމަކު، ހައި ކޯޓުން ވެސް މައްސަލަ ނިންމީ މޫސަ ބޭނުންވި ގޮތަކަށް ނޫނެވެ.
ބެޑްމިންޓަން އެސޯސިއޭޝަންގެ ރައީސްގެ މަގާމުގައި މޫސަގެ ތިން ވަނަ ދައުރުގެ ރަސްމީ މުއްދަތު ހަަމަވިތާ ހަތަރު މަސް ފަހުން އޭނާ މިދިޔަ މަހު ވަނީ މަގާމުން އިސްތިއުފާ ދީފަ އެވެ. މޫސަ އާއި ބެޑްމިންޓަން އެސޯސިއޭޝަނާ ގުޅޭ ކޮރަޕްޝަންގެ މައްސަލައެއް އެންޓި ކޮރަޕްޝަން ކޮމިޝަން (އޭސީސީ) އިން އަންނަނީ ތަހުގީގު ކުރަމުންނެވެ.
ބެޑްމިންޓަންގެ އެންމެ ފަހުން އިންތިހާބުކުރި ހިންގާ ކޮމީޓީގެ ދައުރު، މި އަހަރުގެ މާޗް މަހުގެ 11 އަށް އޮތީ ހަމަވެފަ އެވެ. އެކަމަކު، މި ވަގުތު ވެސް ރަސްމީ ހައިސިއްޔަތުން ބެޑްމިންޓަން އެސޯސިއޭޝަނުން، އެންމެ އިސް ފަރާތެއްގެ ގޮތުގައި މުއާމަލާތު ކުރަމުން އަންނަނީ، އެ ހިންގާ ކޮމިޓީގެ ނައިބު ރައީސް އަހުމަދު ޝާކިރު މޫސާ އެވެ.
ބީއޭއެމްގެ ހިންގާ ކޮމީޓީ މަގާމުގައި ދެމިތިބީ، ބީޑަބްލިއުއެފް އަށް ނުރަނގަޅު މައުލޫމާތުތަކެއް ދީގެން ކަމަށް ބެލެވޭ ކަމަށް ކޮމިޝަނާ އޮފް ސްޕޯޓްސް، ތޮލާލް ވަނީ ވިދާޅުވެފަ އެވެ.
"އަދަދު ސްޕޯޓްސް" އަށް ކުރިން އިން އިންޓަވިއުއެއްގައި، ތޮލާލް ވިދާޅުވީ، ބީޑަބްލިއުއެފް އަށް ގޮންޖަހައި އެއްވެސް ކަމެއް ކުރަން ވިސްނާފައި ނުވާނެ ކަމަށެވެ. އަދި ހަގީގަތުގައި، ރާއްޖޭގެ ބެޑްމިންޓަންގެ ކަންކަން ރަނގަޅު ނުކުރެވިގެން އުޅޭ އެންމެ ބޮޑު ސަބަބަކީ ބީއޭއެމް އިން އެކި ފަރާތްތަކަށް މައުލޫމާތު ދިނުމުގައި ކަންކަން އޮޅުވާލާތީ ކަމަށް ވެސް ތޮލާލް ވިދާޅުވި އެވެ.
