ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް)ގެ ހިންގުން ކުޅިވަރާ ބެހޭ ގައުމީ މަޖިލީހަށް ހަވާލުކޮށްފައިވާ ކަމަށް ކޮމިޝަނާ އޮފް ސްޕޯޓްސް، މުހައްމަދު ތޮލާލް ވިދާޅުވެއްޖެ އެވެ.

ތޮލާލް މި ގޮތަށް ވިދާޅުވެފައިވަނީ، މިރޭ، އެކްސް (ކުރިން ޓްވިޓާ)ގައި ކުރެއްވި ޕޯސްޓެއްގަ އެވެ.

"ބެޑްމިންޓަން އެސޯސިއޭޝަން އޮފް މޯލްޑިވްސް ގެ ހިންގުން ވަގުތީ ގޮތުން އެ އެސޯސިއޭޝަންގެ މުއައްސިސް (ކުޅިވަރާބެހޭ ޤައުމީ މަޖިލިސް) އާއި ޙަވާލު ކުރުމަށް ނިންމާ، އެކަން އެ އެސޯސިއޭޝަނަށް މިއަދު ވާނީ އަންގާފަ. އަދި އެސޯސިއޭޝަންގެ އައު ހިންގާ ކޮމިޓީ އިންތިޚާބު ކުރުމަށްޓަކައި ކުރަންޖެހޭ މަސައްކަތްތައް ކުޅިވަރާބެހޭ ޤައުމީ މަޖިލީހުގެ މަޝްވަރާއާއެކު ވަނީ ފެށިފައި،" ތޮލާލް ކުރެއްވި ޕޯސްޓުގައިވެ އެވެ.

ތޮލާލް، "އަދަދު ސްޕޯޓްސް" އަށް ވިދާޅުވީ، ގައުމީ ކުޅިވަރު މަޖިލީހާ އެކު މަޝްވަރާ ކުރުމަށް ފަހު، ބެޑްމިންޓަން އެސޯސިއޭޝަންގެ އިންތިހާބުގެ ކަންކަން ކުރުމަށް ކޮމިޓީއެއް އައްޔަނުކުރެވޭނެ ކަމަށެވެ.

ބީއޭއެމްގެ ހިންގާ ކޮމިޓީގެ މުއްދަތު ހަމަވެފައި އޮންނަތާ މި މަހުގެ 11 އަށް ފަސް މަސް ހަމަވާއިރު، އަދިވެސް އެ ކަމަށް ޖުމްލަ ހައްލެއް ލިބިފައިނުވާތީ ގިނަ ބަޔަކު ވަނީ ކަންބޮޑުވުން ފާޅުކޮށްފަ އެވެ.

ބެޑްމިންޓަން އެސޯސިއޭޝަންގެ އެންމެ ފަހުން އިންތިހާބުކުރި ހިންގާ ބޯޑު އިންތިހާބު ކުރީ 2021 ވަަނަ އަހަރުގެ ފެބްރުއަރީ 24 ގަ އެވެ. އެ ހިންގާ ބޯޑު ކޮމިޝަނާ އޮފް ސްޕޯޓްސްގައި ރަޖިސްޓްރީ ކުރީ، 2021، މާޗް 11 ގަ އެވެ.

މިދިޔަ މަހުގެ މެދު ތެރޭގައި، ބެޑްމިންޓަން އެސޯސިއޭޝަންގެ ރައީސްގެ މަގާމުން މޫސާ ނާޝިދު (މޫސަ) ވަނީ އިސްތިއުފާ ދީފަ އެވެ. އެކަމަކު، މޫސަ، އިސްތިއުފާދީފައިވަނީ، މަގާމުގެ މުއްދަތު ހަމަވިތާ ހަތަރު މަސް ފަހުންނެވެ.

"އަދަދު ސްޕޯޓްސް" އަށް މައުލޫމާތު ލިބިފައިވާ ގޮތުގައި، ކުޅިވަރާ ބެހޭ ވަޒީރު، އަބްދުﷲ ރާފިއު (ރާއްޕެ) އާއި ކޮމިޝަނާ އޮފް ސްޕޯޓްސް ތޮލާލް އަދި މޯލްޑިވްސް އޮލިމްޕިކް ކޮމިޓީން އަންނަނީ، ބެޑްމިންޓަން ވޯލްޑް ފެޑެރޭޝަން (ބީޑަބްލިއުއެފް)އާ ގުޅިގެން، ބެޑްމިންޓަން އެސޯސިއޭޝަން މައްސަލަައިގައި ހައްލެއް ހޯދޭތޯ މަސައްކަތް ކުރަމުންނެވެ.

މީގެ ކުރިން ތޮލާލް ވަނީ ބެޑްމިންޓަން އެސޯސިއޭޝަންގެ އަސާސީ ގަވާއިދު އިސްލާހުނުކޮށް، ބެޑްމިންޓަން އިންތިހާބުގެ ކަންކަން ކުރިއަށް ނުގެންދަން ލަފާދީ ކުރިއަށްދާން ގޮތްތަކެއް ވެސް ސާފުކޮށްދީ، މުހުލަތުތަކެއް ވެސް ދީފަ އެވެ. އެކަމަކު، އޭގެއިން އެއް އިރުޝާދަކަށް ވެސް އެސޯސިއޭޝަން އޭރު ހިންގަވަމުން އައި، ހިންގާ ބޯޑުން މަސައްކަތްނުކުރެ އެވެ. އެންމެ ފަހުން، އެސޯސިއޭޝަންގެ ހިންގުން، ކުޅިވަރާ ބެހޭ ގައުމީ މަޖިލީހުގެ ބެލުމުގެ ދަށުން ކުރިއަށްގެންދާ ގޮތަށް މިއަދު ތޮލާލް މި ވަނީ ނިންމަވައިފަ އެވެ.