ބޭންކް އޮފް މޯލްޑިވްސް (ބީއެމްއެލް) ގެ ބޯޑުގައި މިހާރު ތިބި އެއްވެސް މީހަކު ވަކިނުކޮށް، ބޯޑުގެ ހުސްކޮށް ހުރި މަގާމުތަކަށް އައްޔަނުކުރަން ސަރުކާރުން ފޮނުވި ދެ މީހުންގެ ނަން އާންމުކޮށްފި އެވެ.
ބީއެމްއެލްގެ ބޯޑަށް އައްޔަނުކުރަން ސަރުކާރުން ފޮނުވީ މުހައްމަދު ޝާހިދާއި އަލީ އިރުފާނުގެ ނަމެވެ.
ބޭންކުން ނެރެފައިވާ އިއުލާނުގައިވާ ގޮތުގައި ޝާހިދަކީ މޯލްޑިވްސް ޕެންޝަން އޮފީހުގެ ކުރީގެ ޗީފް ފައިނޭންޝަލް އޮފިސަރު އަދި މީރާގައި އިސް މަގާމުތަކެއް އަދާކުރައްވާފައިވާ މީހެކެވެ. އިރުފާނަކީ ވެސް މާލީ ދާއިރާގެ ތަޖުރިބާހުރި އަދި މިހާރު ވެސް ފިނޭންސް މިނިސްޓްރީގެ ޑިރެކްޓަރެކެވެ.
ބީއެމްއެލްގެ އެޕޮއިންޓްމަންޓު، ނޮމިނޭޝަން އެންޑް ރެނިއުމަރޭޝަން ކޮމިޓީން ވަނީ މި ދެ މީހުންނަކީ ވެސް ބޭންކުގެ ބޯޑަށް އައްޔަނުކުރަން ގާބިލު ބަޔެއް ކަމަށް ފާސްކޮށްފަ އެވެ. މި ދެ މީހުން ބޯޑަށް އައްޔަނުކުރުމާ މެދު ގޮތެއް ނިންމާނީ މި މަހުގެ 21 ގައި ބާއްވާ އީޖީއެމްގަ އެވެ.
މި އީޖީއެމްއަކީ ބީއެމްއެލްގެ މައި ހިއްސާދާރުގެ ހައިސިއްޔަތުން ސަރުކާރުން ބޭނުންވެގެން ފިނޭންސް މިނިސްޓްރީން އެދިގެން ބާއްވާ ހާއްސަ ޖަލްސާއެކެވެ. އެއީ ބޭންކުގެ ދިވެހި ރުފިޔާ ކާޑުތަކަށް ޑޮލަރު ދިނުން ހުއްޓާލި މައްސަލައިގައި އުފެދުނު ނުތަނަވަސްކަމުގެ ތެރެއިން ހިނގައިދިޔަ ކަމެކެވެ.
މި މައްސަލަގަނޑުގެ ތެރެއިން ބޭންކުގެ އެންމެ ދުވަސްވީ އެއް މުވައްޒަފު އަދި ބޭންކުގެ ޑެޕިއުޓީ ސީއީއޯ އައިޝަތު ނޫރައްދީން ވަކިކުރަން ޕީސީބީން ނިންމުމުން އޭނާ ވަނީ ބޯޑުން އިސްތިއުފާދެއްވާފަ އެވެ.
ބީއެމްއެލްގެ ނިންމުން ސަރުކާރުން ސިފަކުރީ މާލީ ބަގާވާތެއްގެ ގޮތުގަ އެވެ. އަދި ފުލުހުން އަންނަނީ މި މައްސަލަ ތަހުގީގު ވެސް ކުރަމުންނެވެ. އެކަމަކު މިހާތަނަށް މި މައްސަލައިގައި އެއްވެސް މީހަކާ ސުވާލުކޮށް، ހައްޔަރުކުރި ކަމެއް ސާފެއް ނޫނެވެ.
