އުތުރުގައި ބަންކަރިން ހިދުމަތް ފަށަން އެސްޓީއޯއިން ގެންނަ ބަންކަރިންގެ ދެ ބޯޓު ރާއްޖެ އަށް ދަތުރުފަށައިފި އެވެ.
ރާއްޖޭގައި ބަންކަރިން ހިދުމަތް ދެނީ އެކަމުގައި އެންމެ މުޅި ދުނިޔޭގައި ވެސް އެންމެ ފުންނާބު އުސް ކުންފުނިތަކުގެ ތެރޭގައި ހިމެނޭ ވިޓޯލްއިންނެވެ.
"އަދަދު" އަށް މައުލޫމާތު ލިބިފައިވާ ގޮތުގައި ރާއްޖެއަށް މިހާރު ދަތުރުކުރަމުން ދަނީ އެ ކުންފުނިން ސިންގަޕޫރުގައި ބޭނުންކުރަމުންދިޔަ "މެރިން ބެލާ" އަދި "މެރިން އޭންޖެލް" އެވެ. ވިޓޯލްގެ ވެބްސައިޓުގައި އެ ދެ ބޯޓު އަދިވެސް އޮތީ ސިންގަޕޫރުގައި ބޭނުންކުރާ ބޯޓުތަކުގެ ލިސްޓުގެ ދަށުގަ އެވެ.
އެ ދެ ބޯޓު ވެސް ރާއްޖެ ދަތުރުކުރަމުންދާކަން ކަނޑުބޯޓުތައް ޓްރެކްކުރާ ވެސެލްފައިންޑާ އަދި މެރިން ޓްރެފިކް ފަދަ ސައިޓުތަކުން ވެސް ދައްކަ އެވެ.
މެރިން އޭންޖެލް މާލެއަށް ފޯރާނެ ކަމަށް ބެލެވެނީ އަންގާރަ ދުވަހު އެވެ. މެރިން ބެލާ މާލޭގައި ބަނދަރުކުރާނެ ކަމަށް ބެލެވެނީ މި މަހު އަށް ވަނަ ދުވަހު އެވެ. ދެ ބޯޓު ވެސް މިހާރު ވަނީ ރާއްޖޭގެ ދިދައިގެ ދަށަށް ބަދަލުކޮށްފަ އެވެ.
މެރިން ބެލާ
- އައިއެމްއޯ ނަމްބަރު: 9625267
- ބޯޓުގެ ބާވަތް: ތެޔޮ ޓޭންކަރު
- ބޯޓުގެ ދިގުމިން: 95 މީޓަރު
- ބޯޓު އުފެއްދި ތާރީހު: 2011
- ގްރޮސް ޓަނޭޖް: 2608
ބަންކަރިން އަށް ގެންނަ މެރިން ބެލާ ބޯޓު މިހާރު އޮތް ތަން -- ފޮޓޯ: މެރިން ޓްރެފިކް
މެރިން އޭންޖެލް
- އައިއެމްއޯ ނަމްބަރު: 9647899
- ބޯޓުގެ ބާވަތް: ތެޔޮ ޓޭންކަރު
- ބޯޓުގެ ދިގުމިން: 70 މީޓަރު
- ބޯޓު އުފެއްދި ތާރީހު: 2012
- ގްރޮސް ޓަނޭޖް: 1999
ބަންކަރިން އަށް ގެންނަ މެރިން އޭންޖަލް ބޯޓު މިހާރު އޮތް ތަން -- ފޮޓޯ: މެރިން ޓްރެފިކް
ބަންކަރިންގެ ހިދުމަތް ފަށަން ސަރުކާރުން އެންމެ ފުރަތަމަ މަސައްކަތް ކުރީ ޖުލައި މަހު އެވެ. އޭގެ ފަހުން އޮގަސްޓު 22، ގައި އެ މަސައްކަތް ފެށޭނެ ކަމަށާއި އޮގަސްޓު 21، ގައި އެކަމަށް ބޭނުންވާ ބޯޓުތައް ރާއްޖެ އަންނާނެ ކަމަށްވެސް ސަރުކާރުން ބުންޏެވެ.
ނަމަވެސް، އެ މުއްދަތު ފާއިތުވުމުން އިކޮނޮމިކް މިނިސްޓަރު މުހައްމަދު ސައީދު އެންމެ ފަހުން ވިދާޅުވީ ބަކްނަރިންގެ މަސައްކަތް ފެށޭނެ ތާރީހަކީ މި މަހު 12، ކަމަށެވެ. އެ ދުވަހަށް މި ދެ ބޯޓަށް ރާއްޖެ އާދެވޭނެ އެވެ.
އެސްޓީއޯއާ ހަވާލާދީ ހަބަރުތަކުގައިވާ ގޮތުގައި އެސްޓީއޯއިން މި ހިދުމަތް ފަށަނީ 4000 މެޓްރިކް ޓަނުގެ ދެ ބަންކަރުންނެވެ. ސަރުކާރުން ބުނަނީ މި ވިޔަފާރި ފެށުމުން ފުރަތަމަ އަހަރުގެ ތެރޭގައި ވެސް ރާއްޖޭގެ އިގްތިސާދަށް 400 މިލިއަން ޑޮލަރު ވަންނާނެ ކަމަށެވެ.
އިންޓަނޭޝަނަލް ބަންކަރިން ހިދުމަތް ފެށުމަށްޓަކައި ގިނަ މަސައްކަތްތައް ކުރަމުންދަނީ އެމްޕީއެލްއިންނެވެ. މި ދެ ބޯޓަކީ ވެސް މީގެ ކުރިން އެމްޕީއެލްގެ އޮޕަރޭޝަންތަކުގައި ބޭނުންކުރަމުން އައި ބޯޓުތަކެކެވެ.
އޭގެއިތުރުން އެމްޕީއެލްއިން ވަނީ ހއ. އުލިގަމުގައި ޔޮޓް މެރީނާއެއް ހެދުމަށް އެ ރަށު ކައުންސިލާއެކު އެމްއޯޔޫއެއްގައި ސޮއިކޮށް، އެ މަސައްކަތް ކުރުމަށް ޝައުގުވެރިވާ އީއޯއައި ހުށަހެޅުމަށް ހުޅުވާލާފަ އެވެ.
