ލޮސް އެންޖެލްސް، ޔުނައިޓެޑް ސްޓޭޓްސް (އޮގަސްޓް 30) - ޔޫއެސް އޯޕަން ޓެނިސް މުބާރާތުގެ ދެ ވަނަ ބުރުން ކަޓައި، ސްޕެއިނުގެ ކާލޯސް އަލްކަރާޒް، ޓެނިހުގެ ބޮޑު ރެކޯޑަކާ ހަމަކުރަން ކުރި އުންމީދު ފުރިހަމަ ވުމުގެ ފުރުސަތު ގެއްލިއްޖެ އެެވެ.
މި ފަހަރުގެ ފްރެންޗް އޯޕަން، ވިމްބަލްޑަން ކާމިޔާބުކުރި އަލްކަރާޒް އަށް ޔޫއެސް އޯޕަން ކާމިޔާބުކޮށް ޓެނިހުގެ ލެޖެންޑުން ކަމަށްވާ ރޮޑް ލޭވާ، ރަފަައެލް ނަޑާލް ހަދާފައި އޮތް ރެކޯޑާ ހަމަކުރުމުގެ ފުރުސަތު އޮތެެވެ. އެކަމަކު، ޔޫއެސް އޯޕަންގެ ދެ ވަނަ ބުރުން، ނެދަލެންޑްސްގެ ބޮޓިކް ވެން ޑެ ޒަންޑްޝަލްޕް އަތުން އަލްކަރާޒް ވަނީ ބަަލިވެ، މުބާރާތުން ކަޓައިފަ އެވެ.
އޮލިމްޕިކްސްގެ ފައިނަލުން ނޮވަކް ޖޮކޮވިޗް އަތުން ބަލިވި އަލްކަރާޒް އަތުން، ޒަންޑްޝަލްފް މޮޅުވީ، 6-1 7-5 6-4، އިން ސެޓުތައް ގޮސްގެންނެވެ. މިއީ ދުނިޔޭގެ ރޭންކިންގެ 74 ގައި އޮތް ޒަންޑްޝަލްފަށް އޭނާގެ ކެރިއަރުގައި ޓެނިހުގެ ރޭންކިންގެ ގަދަ 10ގައި އޮތް ކުޅުންތެރިއަކު އަތުން ގްރޭންޑް ސްލޭމް މުބާރާތެއްގައި ލިބުނު ފުރަތަމަ މޮޅެވެ.
މި ނަތީޖާއާ އެކު، ގްރޭންޑް ސްލޭމް މުބާރާތްތަކުގައި އަލްކަރާޒް ބަލިނުވެ ދަމަހައްޓަމުން އައި ރެކޯޑަށް ވަނީ 15 މެޗަށް ފަހު ނިމުމެއް އަތުވެފަ އެވެ.
"އަހަރެންގެ ލެވަލް މުޅި މެޗުގައި ހުރީ އެއް ވަރެއްގައި، އެއީ ހަގީގަތުގައި އަހަރެންނަށް މި މެޗުން މޮޅުވާން ބޭނުންވާ މިންވަރެއް ނޫން. ވަރަށް ގިނަ ގޯސްތަކެއް ހެދިގެން މި މެޗުން ބަލިވެފައި މި އޮތީ، މި ކަންކަން ރަނގަޅުކުރަން އެބަޖެހޭ،" 21 އަހަރުގެ އަލްކަރާޒް، މެޗަށް ފަހު ބުންޏެވެ.
މިއީ، 2021 ވަނަ އަހަރުގެ ވިމްބަލްޑަން އަށް ފަހު، ބޮޑު މުބާރާތެއްގެ ދެ ވަނަ ބުރުން، އަލްކަރާޒް ކެޓި ފުރަތަމަ ފަހަރެވެ.
