ޒިއުރިކް (އޮގަސްޓް 30) - ކޮލިފައިން ޕްލޭއޮފްގެ ދެ ވަނަ ލެގުގައި ސްވިޒަލެންޑްގެ ސާވެޓް އަތުން 2-1 އިން ބަލިވި ނަމަވެސް އެގްރިގޭޓުން ކުރިހޯދައި ޗެލްސީން ޔުއެފާ ކޮންފަރެންސް ލީގަށް ކޮލިފައިވެއްޖެ އެވެ.
މިދިޔަ ހަފްތާގައި ޗެލްސީ ދަނޑުގައި ކުޅުނު ފުރަތަމަ ލެގުން އެ ޓީމު ވަނީ 2-0 އިން މޮޅުވެފަ އެވެ. އެހެންކަމުން، ރޭގެ ނަތީޖާއާ އެކު، އެ ޓީމަށް ކޮންފަރެންސް ލީގުން ފުރުސަތު ލިބުނީ، އެގްރިގޭޓަށް ބަލާއިރު، 3-2 އިން ކުރިހޯދައިގެންނެވެ.
ޗެލްސީން ރޭގެ މެޗުގައި ލީޑުނެގީ ޕެނަލްޓީ އަކުން ކްރިސްޓޮފާ އެންކުންކޫ ޖެހި ގޯލުންނެވެ. މި ޕެނަލްޓީ ދޭން ނިންމީ ޗެލްސީގެ މިހައިލޯ މުޑްރިކް އަށް ސާވެޓްގެ އޭރިއާތެރެއިން އެ ޓީމުގެ، ކެއިގޯ ސުނެމޭޓޯ ފައުލުކުރުމުންނެވެ.
ފުރަތަމަ ހާފު ނިމުމުގެ ކުރިން ސާވެޓް ވަނީ އެއްވަރުކޮށްފަ އެވެ. މި ލަނޑު ޖެހީ މެޗުގެ 32 ވަނަ މިނިޓްގައި، ޖެރެމީ ގީލެމެނޯ އެވެ. މިއީ، ޑެރެކް ކުޓޭސާ ނެގި ހުރަަހަކަށް އަރައި، ގީލެމެނޯ ޖެހި ލަނޑެކެވެ.
ޗެލްސީ އަށް ދެ ވަނަ ލަނޑެއް ޖަހައިދޭން އެންޒޯ ފެނާންޑޭޒް ވަނީ ރަނގަޅު ހަމަލާއެއް ފޮނުވާލައިފަ އެވެ.
މެޗުގައި ސާވެޓް ލީޑުނެގީ، ބަދަލަކަށް ކުޅެން އެރި އެންޒޯ ކްރިވެލީ ޖެހި ގޯލުންނެވެ. މެޗުގެ 72 ވަނަ މިނިޓްގައި ކްރިވެލީ މި ލަނޑު ޖެހީ، ބަދަލަކަށް ކުޅެން އެރި، މިރޮސްލާވް ސްޓެވަނޯވިޗް ދިން ބޯޅައަކުންނެވެ. އިތުރު ގޯލެއް ޖަހައި، ނަތީޖާ އަނބުރާލެވޭތޯ، ސާވެޓުން ކުރި މަސައްކަތް ކާމިޔާބެއްނުވި އެވެ.
ޗެލްސީގެ ނިކޮލަސް ޖެކްސަން ޖެހި ގޯލެއް އޮފްސައިޑްވިއިރު، ކޯލް ޕާމާ ފޮނުވާލި ހަމަލާއެއް ވަނީ ހުރަސްދަނޑިއަށް އަމާޒުވެފަ އެވެ.
ކޮންފަރެންސް ލީގުގެ ގުރުއަތުލުން މިއަދު ކުރިއަށްދާއިރު، އެ މުބާރާތް ވެސް ކުރިއަށްދާނީ 36 ޓީމު ހިމެނޭ ގޮތަށް ލީގު ފޭސްއެއް ކުޅޭ ގޮތަށެވެ. އަދި ކޮންމެ ޓީމެއް ތަފާތު އަށް ޓީމަކާ ކުޅުމަށް ފަހު، ރޭންކިން ރަނގަޅު އަށް ޓީމަކަށް ގަދަ 16ގެ ޖާގަ ލިބޭއިރު، ނުވަ ވަނައިިން ފެށިގެން 24 ވަނައާ ދެމެދު ރޭންކް ކުރެވޭ ޓީމުތައް ޕްލޭއޮފެއް ކުޅުމަށް ފަހު، ގަދަ 16 ގެ ބާކީ އަށް ޖާގަ އަށް ޓީމުތައް ދަތުރުކުރާ ގޮތަށެވެ.
