ރާއްޖޭގައި ކުރާ އެއްވެސް ވިޔަފާރިއެއްގެ ފައިސާ ބިދޭސީއެއްގެ އެކައުންޓަށް ޖަމާ ކުރުމަކީ ގާނޫނީ ކުށެއް ކަމަށް ހޯމް މިނިސްޓަރު އަލީ އިހުސާން މިއަދު ވިދާޅުވެެއްޖެ އެވެ.
ހޯމްމިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމެއްގައި އިހުސާން ވިދާޅުވީ ވިޔަފާރީގެ ފައިސާ އެއްވެސް ހާލެއްގައި ބިދޭސީއެއްގެ އެކައުންޓަށް ޖަމާ ކުރުމަކީ ރާއްޖޭގައި ހުއްދަ ކަމަކަށް ނުވާތީ، އެކަން ޓޮލަރޭޓް ނުކުރާނެ ކަމަށެވެ.
"އެކްސެޕްޝަން ޓު ޕޮލިސީއެއް އޮތް ކަމެއް ނޫން އެއީކީ. އެއީ ފަހުން ތިމަންނަ އޯނަރު މީހާގެ އެކައުންޓަށް ޖަމާ ކުރާނަމޭ މިއީކީ އޮތް ގޮތެއް ނޫން ރާއްޖޭގައި. އެއީ އަޅުގަނޑުމެން ޓޮލެރޭޓް ކުރާނެ ކަމެއް ނޫން. އެގޮތަށް އެއްވެސް މީހަކު އަމަލު ކުރާނަމަ އެ ކުރެވެނީ ގާނޫނީ ކުށެއް،" އިހުސާން ވިދާޅުވި އެވެ.
ވިޔަފާރިއަށް ލިބޭ ފައިސާ ޖަމާކުރަން ޖެހޭނީ އެ ކުންފުންޏަކަށް ނުވަތަ އެ ކުންފުނި ރަޖިސްޓްރީ ކޮށްފައިވާ މީހާގެ އެކައުންޓަށްކަން ފާހަގަކުރައްވައި މިނިސްޓަރު ވިދާޅުވީ އެ ވިޔަފާރިއެއްގައި އުޅޭ މުވައްޒަފެއްގެ އެކައުްނޓަށް ޖަމާ ކުރުމަކީ ގޯހެއް ކަމަށެވެ.
ފައިސާ ޖަމާވާ ބިދޭސީ މީހާއަކީ އެ ވިޔަފާރި ހިންގާ މީހާ ކަމަށް ބެލުމުގެ ފުރުސަތު ވެސް އޭނާ ވިދާޅުވި ގޮތުގައި އޮންނާނެ އެވެ. އެހާލަތުގައި އެ ބިދޭސީ މީހާ ޑިޕޯޓް ކުރުމަކީ ވެސް އެކަށީގެންވާ ކަމެއް ކަމަށް ވެސް ވިދާޅުވި އެވެ.
"ވިސާ ވަޔަލޭޝަނެއް ވިއްޔާ އަޅުގަނޑުމެން ނުބަލަން ކިހާ ވަރެއްގެ ވަޔަލޭޝަނެއްތޯ އެއީކީ. ވިސާގައި އިންނާނެ ވަރަށް ކްލިއާކޮށް އެމީހާއަށް ދީފައި އިންނާނެ އޭނައަށް ކުރެވޭނެ ކަންކަމާއި ނުކުރެވޭނެ ކަނަކްން. މީނެ ކަމެއް އެބަ ކުރެއޭ ބުނާ ހިސާބުން ނިންމޭނެ،" އިހުސާން ވިދާޅުވި އެވެ.
އިހުސާން ވިދާޅުވީ ފުޅާ ދާއިރާއެއްގައި ރާއްޖޭގައި ގަވާއިދާ ހިލާފަށް ސެލޫންގެ ވިޔަފާރި ކުރަމުންދިޔަ ރަޖަނީ ޝްރެސްތާ (ރިޒް) ޑީޕޯޓްކުރީ އޭނާ ހިންގި ސެލޫންގެ ފައިސާ އޭނާއާ ގާތް ގުޅުމެއް އޮތް އެހެން ބިދޭސީއެއްގެ އެކައުންޓަށް ޖަމާކުރުމުން ކަމަށެވެ.
އެއާއެކު އޭނާ ވިޔަފާރިކުރާކަން ސާބިތުވެ، އެ ވިޔަފާރި ކުރަނީ އެ ކުންފުނިން ނޫންކަން އެނގިފައިވާކަން އިހުސާން ފާހަގަކުރެއްވި އެވެ.
