ލޫކޭ، ޕެރަގުއޭ (އޮގަސްޓް 28) - ކޮޕަ އެމެރިކާ ފުޓްބޯޅަ މުބާރާތުގެ ސެމީ ފައިނަލުގައި ކޮލަމްބިއާ އަތުން އުރުގުއޭ ބަލިވި މެޗަށް ފަހު، ކޮލަމްބިއާގެ ސަޕޯޓަރުންނާއި އުރުގުއޭގެ ކުޅުންތެރިންނާ ދެމެދު ހިނގި މާރާމާރީއާ ގުޅިގެން، އުރުގުއޭގެ ފޯވާޑް، ޑާވިން ނޫނޭޒްގެ ބައިވެރިވުން އޮތް މިންވަރު ބަލައި، އޭނާ ފަސް މެޗަށް ސަސްޕެންޑްކޮށް 20،000 ޑޮލަރުން ޖޫރިމަނާކޮށްފި އެވެ.
ކޮލަމްބިއާ އަތުން 1-0 އިން އުރުގުއޭ ބަލިވި މެޗުގައި، އުރުގުއޭގެ ކުޅުންތެރިންގެ އާއިލާ ތިބި ސަރަހައްދާ ގާތުގައި، ކޮލަމްބިއާގެ ސަޕޯޓަރުން ތިބި އެވެ. މެޗަށް ފަހު، މައްސަލަ ހޫނުވީ، އުރުގުއޭގެ ކުޅުންތެރިންގެ އާއިލާއާ ކޮލަމްބިއާގެ ސަޕޯޓަރުން ދިމާކުރަން ފެށުމުންނެވެ. އެ ހިސާބުން، އުރުގުއޭގެ ކުޅުންތެރިން ވަނީ، ސަޕޯޓަރުންގެ ތެެރެއަށް ގޮސް، އާއިލާގެ ދިފާއުގައި މާރާމާރީ ހިންގައިފަ އެވެ.
ކޮލަމްބިއާގެ ސަޕޯޓަރުންނާއި އުރުގުއޭގެ ކުޅުންތެރިންގެ ދެމެދުގައި ހިނގި ހަމަނުޖެހުމުގެ ތެރެއިން.--- ފޮޓޯ: އޭއެފްޕީ
މި ކަމާ ގުޅިގެން، އުރުގުއޭ 11 ކުޅުންތެރިންގެ މައްސަލަ ބަލަ އެވެ. އޭގެ ތެރެއިން ފަސް ކުޅުންތެރިއަކަށް އަދަބު ދޭން ދެކުނު އޭޝިއާގެ ފުޓްބޯޅަ ފެޑެރޭޝަން، ކޮންމެބޯލްގެ ޑިސިޕްލިނަރީ ކޮމިޓީން ވަނީ ނިންމައިފަ އެވެ.
އެ ގޮތުން، ނޫނޭޒް، 25، އަށް ފަސް މެޗާއި 20،000 ޑޮލަރުގެ ސަސްޕެންޝަނެއް އައިއިރު، ޓޮޓެންހަމްގެ މިޑްފީލްޑަރު، ރޮޑްރީގޯ ބެންޓަންކޫރު ވަނީ ހަތަރު މެޗަށް ސަސްޕެންޑްކޮށްފަ އެވެ.
ނަޕޯލީގެ ޑިފެންޑަރު، މަތައިސް އޮލިވޭރާ، ބާސެލޯނާގެ ރޮނާލްޑް އަރައުހޯ އަދި އެތުލެޓިކޯ މެޑްރިޑްގެ ހޯސޭ މާރިއާ ޖިމެނޭޒަށް ވަނީ ތިން މެޗުގެ ސަސްޕެންޝަނެއް އަތުވެފަ އެވެ.
މި ވަގުތު ތަހުގީގު ކުރިއަށްދާ އުރުގުއޭގެ ކުޅުންތެރިންނަކީ، ސަންޓިއާގޯ މެލޭ، ސަބެސްޓިއަން ކަސޭރެސް، އެމިލިއާނޯ މާޓިނޭޒް، މަޓިއަން ވީން، ބްރިއަން ރޮޑްރިގޭޒް އަދި ފަކުންޑޯ ޕެލެސްޓްރީ އެވެ.
