މޮންޓެވީޑޯ، އުރުގުއޭ (އޮކްޓޫބަރު 23) - މީގެ ފަސް އަހަރު ކުރިން ފުޓްބޯޅައިން ރިޓަޔާކުރި، އުރުގުއޭގެ ލެޖެންޑަރީ ފޯވާޑް، ޑިއޭގޯ ފޯލާން، ޕްރޮފެޝަނަލް ޓެނިސް މުބާރާތެއްގައި ކުޅެން ތައްޔާރުވެއްޖެ އެވެ.
އުމުރުން 45 އަހަރުގެ ފޯލާން، ފުޓްބޯޅަ ކެރިއަރު ނިންމާލީ 2019 ވަނަ އަހަރު އެވެ.
މީގެ ކުރިން، މެންޗެސްޓާ ޔުނައިޓެޑް، އިންޓަ މިލާން ވިޔަރެއާލް އަދި އެތުލެޓިކޯ މެޑްރިޑަށް ކުޅުނު ފޯލާން ޕްރޮފެޝަނަލް ޓެނިހަށް ނުކުންނާނީ އަންނަ މަހު މޮންޓެވީޑޯގައި ކުޅޭ އުރުގުއޭ އޯޕަންގެ ފިރިހެން ޑަބަލްސްގަ އެވެ.
ފޯލާންގެ ޑަބަލްސް ޕެއާ އަކީ، އާޖެންޓީނާގެ ފެޑެރީކޯ ކޯރިއާ އެވެ. އޭނާ އަކީ، ދުނިޔޭގެ ފިރިހެން ސިންގަލްސްގެ 101 ވަނަ އެވެ، މިދިޔަ އަހަރު އޭނާ ވަނީ ދުނިޔޭގެ 49 ވަނަ އަށް ވެސް ޖެހިލައިފަ އެވެ.
ޒުވާން އުމުރުގައި ޓެނިސް ކުޅުނު ފޯލާން އަންނަނީ އިންޓަނޭޝަނަލް ޓެނިސް ފެޑެރޭޝަންގެ މާސްޓާސް އިވެންޓްތަކުގައި ކުޅެމުންނެވެ. އެކަމަކު، ރަސްމީ ޕްރޮފެޝަަނަލް މުބާރާތެއްގައި އޭނާ ކުޅޭނީ އަންނަ މަހު އެވެ. އަންނަ މަހުގެ މުބާރާތުގައި ފޯލާން ކުޅެނީ ވައިލްޑް ކާޑް މެދުވެރިކޮށް ފަހިވި ފުރުސަތެއްގަ އެެވެ.
ޔުނައިޓެޑާ 2002 ވަނަ އަހަރު ގުޅުނު ފޯލާން އެ ޓީމަށް 98 މެޗު ކުޅެދިނެވެ. ފޯލާންގެ ކެރިއަރުގައި އެންމެ ބޮޑު ތަފާތެއް ދެއްކީ ވިޔަރެއާލް އާއި އެތުލެޓިކޯ އަށް ކުޅުނުއިރު އެވެ. އޭނާ ވަނީ ޔޫރަޕްގެ ލީގުތަކުގައި އެންމެ ގިނަ ގޯލު ޖަހާ ކުޅުންތެރިޔާ އަށް ދޭ ރަން ބޫޓު ދެ ފަހަރު ހޯދައިފަ އެވެ.
އުރުގުއޭ އިން 2010 ވަނަ އަހަރުގެ ފީފާ ވޯލްޑް ކަޕްގެ ތިން ވަނަ ހޯދިއިރު، މުބާރާތުގެ މޮޅު ކުޅުންތެރިޔާ، ފޯލާން ވަނީ ޖެހިގެން އައި އަހަރު ބޭއްވި ކޮޕަ އެމެރިކާ ފުޓްބޯޅަ މުބާރާތް އުރުގުއޭ އަށް ހޯދައިދޭން އެހީތެރިވެދީފަ އެެވެ.
