ޓޭނަލް ޓެނިހުގެ ގައުމީ ރޭންކިން މެޗުތައް ނިންމާލިއިރު، އަންހެން އެއް ވަަނަ ފާތުމަތު ދީމާ އަލީ ދިފާއުކުރިއިރު، ފިރިހެން ރޭންކިން އެއް ވަނަ ތަޖުރިބާކާރު ކުޅުންތެރިޔާ، މޫސާ މުންސިފް އަހުމަދު ހޯދައިފި އެވެ.
ރޭންކިންގައި ގަދަ ނުވައެއް ވާދަކުރާއިރު، ފިރިހެން ރޭންކިންގައި ދެ ކުޅުންތެރިއަކު ވާދަނުކުރެ އެވެ.
ދީމާ، 16، އަންނަނީ މީގެ ހަ ވަރަކަށް އަހަރު ކުރިން ރޭންކިން އެއް ވަނަ އަށް އެރި ގޮތަށް، އެ މަގާމު ދިފާއުކުރަމުންނެވެ. ދީމާ، އެންމެ ފުރަތަމަ ރޭންކިން ކުރިއަށް ޖެހިލީ 2018 ވަނަ އަހަރު އެވެ.
ދީމާ، މި ފަހަރު ރޭންކިން އެއް ވަނަ ހޯދީ ތިން ބުރު ކުޅުނުއިރު، 24 މެޗުން ވެސް މޮޅުވެގެންނެވެ. ދީމާ އަށް ޖުމްލަ އެކު، 48 ޕޮއިންޓް ލިބިފައިވެ އެވެ.
ރޭންކިންގައި، ދެ ވަނަ ހޯދީ އިނގިރޭސިވިލާތުގައި ޑޮކްޓަރުކަން ކިޔެވަމުން ވެސް ޓީޓީ އަށް ވަގުތު ހުސްކުރަމުން އަންނަ، އައިޝަތު ރަފާ ނާޒިމް އެވެ. ރަފާ ވަނީ ރޭންކިންގައި ކުޅުނު 24 މެޗުގެ ތެރެއިން، 21 މެޗުން މޮޅުވެފަ އެވެ. ބަލިވީ ދީމާއާ ދެކޮޅަށް ކުޅުނު މެޗުތަކުންނެވެ. ރަފާ، ވަނީ ދާދި ފަހުން، ނިމުނު އިންޓަ ސްކޫލް ޓީޓީ މުބާރާތުގައި އިސްކަންދަރު ސްކޫލްގެ ކޯޗަކަށް ވެސް މަސައްކަތްކޮށްފަ އެވެ.
ޓީޓީ އަންހެން ރޭންކިން:
1. ފާތިމަތު ދީމާ އަލީ - 48 ޕޮއިންޓް
2. އައިޝަތު ރަފާ ނާޒިމް - 48 ޕޮއިންޓް
3. މިޝްކާ މުހައްމަދު އިބްރާހިމް - 41 ޕޮއިންޓް
4. ލައިސާ ފަތުހުﷲ - 39 ޕޮއިންޓް
5. ފާތިމަތު ޖުމާނާ ނިމާލް - 35 ޕޮއިންޓް
6. މަލާކް ބިންތި މުއިއްޒު - 33 ޕޮއިންޓް
7. މިންހާ މަހްޖޫބް ސުޖާއު - 30 ޕޮއިންޓް
8. އައިޝަތު އަލްސާ ނާފިޒު - 28 ޕޮއިންޓް
9. އައިޝަތު މަލަކް ތާސީން - 25 ޕޮއިންޓް
ފިރިހެން ރޭންކިންގެ އެއް ވަނަ އަށް މުންސިފް ޖެހިލީ ފޯރިގަދަކޮށް ދިޔަ މެޗުތަކުން ވެސް މޮޅުވެގެންނެވެ. ގައުމީ ޓީޓީ ޓީމުގައި މި ވަގުތު ހުރި އެންމެ ތަޖުރިބާކާރު ކުޅުންތެރިޔާ، މުންސިފް ވަނީ ރޭންކިންގައި ކުޅުނު 24 މެޗުތަކުގައި ސައްތަ އިން ސައްތަ ރެކޯޑެއް ދަމަހައްޓައިފަ އެވެ. ހުރިހާ މެޗަކުން މޮޅުވެ، 48 ޕޮއިންޓް ހޯދާފައިވެ އެވެ.
ރޭންކިން ދެ ވަނައިގައި ކުރިން އޮތް ގައުމީ ޗެމްޕިއަންކަން ހޯދާފައިވާ މުހައްމަދު ޝައްފާން އިސްމާއިލް އާއި މުހައްމަދު ތާބިން ސުޖާއު މުބާރާތުގައި ނުފެނުނީ ގައުމުގައި ނެތުމުންނެވެ.
ރޭންކިން ދެ ވަނައިގައި މި ފަހަރު އޮތީ އަހުޔާރު އަހުމަދު ހާލިދު އެވެ. އޭނާ ވަނީ 24 މެޗުގެ ތެރެއިން 21 މެޗުން މޮޅުވެފަ އެވެ. ބަލިވީ މުންސިފާ ދެކޮޅަށް ކުޅުނު މެޗުތަކުންނެވެ. އަހުޔާރު ވަނީ، 45 ޕޮއިންޓް ހޯދައިފަ އެވެ.
ގައުމީ ރޭންކިންގައި ހިމެނޭ ފަސް ކުުޅުންތެރިންނަށް ގައުމީ އެތުލީޓުންނަށް ދޭ މުސާރަ ލިބޭނެ އެވެ.
ޓީޓީ ފިރިހެން ރޭންކިން:
1. މޫސާ މުންސިފް އަހުމަދު - 48 ޕޮއިންޓް
2. އަހުޔާރު އަހުމަދު ހާލިދު - 45 ޕޮއިންޓް
3. ޒީކް ހަސަން ލަތީފް - 42 ޕޮއިންޓް
4. އިބްރާހިމް އައުޒަމް އަޒީމް - 37 ޕޮއިންޓް
5. އުމީރު މުހައްމަދު މުއިއްޒު - 35 ޕޮއިންޓް
6. ހުސެއިން އާދު އާސިމް - 35 ޕޮއިންޓް
7. އަހުމަދު ރައްޔާން މުހައްމަދު އަނީސް - 31 ޕޮއިންޓް
