ނޭޕާލުގައި މިހާރު ކުރިއަށްދާ ސާފް 20 އަހަރުން ދަށުގެ މުބާރާތުގައި ރާއްޖޭގެ ދެ ރެފްރީން ކަމަށްވާ އަފްޝީން ނަސީރު އާއި ރައީފް ރައޫފް އަށް ދެ މެޗެއްގައި އިންސާފުކުރުމުގެ ފުރުސަތު ލިބިއްޖެ އެެވެ.
އެ ގޮތުން، އަފްޝީން އާއި ފީފާ އެސިސްޓަންޓް ރެފްރީ ބެޖް މި ފަހުން ހާސިލްކުރި ރައީފް އަށް ފުރުސަތު ލިބިފައިވަނީ، ސްރީ ލަންކާ އާއި ބަންގްލަދޭޝް ބައްދަލުކުރި މެޗާއި މުބާރާތް ބާއްވާ ގައުުމު ކަމަށްވާ ނޭޕާލާއި ބަންގްލަދޭޝް ބައްދަލުކުރި މެޗުގަ އެވެ.
ބަންގްލަދޭޝް އާއި ނޭޕާލް މެޗުގެ ރެފްރީ އަކަށް އަފްޝީން ހުރިއިރު، ލަންކާ އާއި ބަންގްލަދޭޝް މެޗުގެ ބަދަލު ރެފްރީ އަކަށް ވެސް ފެނިގެންދިޔަ އެވެ. އަދި ދެ މެޗުގެ އެސިސްޓަންޓް ރެފްރީ އަކީ ރައީފް އެވެ.
ސާފްގެ މުބާރާތްތަކަށް ރެފްރީން ފޮނުވުމުގެ ފުރުސަތު ކޮންމެ މެމްބަރު އެސޯސިއޭޝަނަކަށް ވެސް ލިބެ އެެެވެ. އެ ގޮތުން ސާފް އިން ކަނޑައަޅާ މިންގަނޑަކީ ފީފާ ބެޖް ހާސިލްކޮށްފައިވާ ރެފްރީއެއް ނޫނީ އެ ގައުމުގެ ލެވަލް ވަން ރެފްރީއެއް ފޮނުވުމަށެވެ.
އެ ގޮތުން، ރާއްޖޭން މި ފަހަރު، ފޮނުވި ރެފްރީ އަކީ، ފުރަތަމަ ޑިވިޝަނުގައި މި ފަހުން ގިނަ މެޗުތަކެއްގައި އިންސާފުކުރި، އަފްޝީން އެވެ. މި އަހަރު އެފްއޭއެމް އިން ބޭއްވި ހަމައެކަނި މުބާރާތް، 19 އަހަރުން ދަށުގެ ޔޫތު ޗެމްޕިއަންޝިޕްގެ މެޗުތަކުގައި ވެސް އަފްޝީން ވަނީ ރެފްރީކަން ކޮށްފަ އެވެ.
ނޭޕާލް އާއި ބަންގްލަދޭޝް ކުޅުނު މެޗު ފެށުމުގެ ގޮތުން އަފްޝީން ޓޮސް ކުރިއަށްގެންދަނީ.--- ފޮޓޯ: އޯލް ނޭޕާލް ފުޓްބޯލް އެސޯސިއޭޝަން (އަންފާ)
މި ފަހަރުގެ ސާފް މުބާރާތުގައި ފީފާ ބެޖް ހާސިލްކޮށްފައިވާ 12 ރެފްރީން ތިބިއިރު، އަފްޝީން މި ވަނީ، ގައުމީ ލެވަލްގެ ސްލޮޓެއްގައި ގޮސް ދެ މެޗެއްގައި އިންސާފުކޮށްފަ އެވެ. މިއީ، ރެފްރީއެއްގެ ގޮތުގައި އަފްޝީންގެ ފުރަތަމަ އިންޓަނޭޝަނަލް މުބާރާތެވެ.
އޭނާ އުންމީދުކޮށްގެން ހުރީ، މުބާރާތުގެ ފައިނަލުގައި ރެފްރީކަން ކުރުމުގެ ފުރުސަތަކަށެވެ.
"ފުރަތަމަ މެޗުގައި އިންޖަރީއެއް އައީމަ، އެސެސަރު ދިން ރެސްޓެއްގައި ދެން މި ހުރީ، ހީވޭ ފައިނަލް ލިބޭނެހެން،" އަފްޝީން ބުންޏެވެ.
ބޫޓާން އަތުން ޕެނަލްޓީ ޖަހައިގެން މޮޅުވެ، ނޭޕާލް ވަނީ މުބާރާތުގެ ފައިނަލުގެ ފުރަތަމަ ޖާގަ ހޯދައިފަ އެވެ. ދެ ވަނަ ޖާގަ ލިބޭނީ، ދެ ވަނަ ސެމީގައި މިިއަދު ބަންގްލަދޭޝް އާއި އިންޑިއާ ކުޅެގެން މޮޅުވާ ޓީމަކަށެވެ. މިއަދުގެ މެޗުގެ އެސިސްޓަންޓް ރެފްރީ އަކަށް ރައީފް ހަރަކާތްތެރިވާނެ އެވެ.
ސާފް 20 އަހަރުން ދަށުގެ މުބާރާތުގައި މެޗު ކޮމިޝަނަރެއްގެ ގޮތުގައި، އަބްދުލްހަމީދު އަބްދުލްގަފޫރު (އައްޑޯ) އަންނަނީ ހަރަކާތްތެރިވަމުންނެވެ.
މިދިޔަ އަހަރުގެ ހަތަރު މަސްތެރޭގައި ކުރިއަށްދިޔަ ސަރަހައްދީ ފުޓްބޯޅަ މުބާރާތްތަކުގެ ތިން ފައިނަލުން ވެސް ރާއްޖޭގެ ރެފްރީން ވަނީ ފުރުސަތު ހޯދައިފަ އެވެ. މިދިޔަ އަހަރު ޖުލައި މަހު އިންޑިއާގައި ނިމުނު ސަރަހައްދީ އެންމެ ބޮޑު ފުޓްބޯޅަ މުބާރާތް ކަމަށްވާ ސާފް ޗެމްޕިއަންޝިޕާއި، ސެޕްޓެމްބަރު މަހު ނިމުނު 16 އަހަރުން ދަށުގެ ސާފް ޗެމްޕިއަންޝިޕާއި 19 އަހަރުން ދަށުގެ ސާފް ޗެމްޕިއަންޝިޕުގެ ފައިނަލުގައި ވެސް ދިވެހި ރެފްރީން ފެނުނެވެ.
އިންޑިއާ އާއި ކުވެއިތު ވާދަކުރި ސާފް ޗެމްޕިއަންޝިޕްގެ ފަސްޓް އެސިސްޓަންޓް ރެފްރީކަންކުރީ ރާއްޖޭގެ އޭއެފްސީ އެލީޓް ރެފްރީ އަހުމަދު ހަސަން އެވެ. ބަންގްލަދޭޝް އާއި އިންޑިއާ ވާދަކުރި 16 އަހަރުން ދަށުގެ ފައިނަލުގައި ރާއްޖޭގެ ދެ ރެފްރީން ކަމަށްވާ ޒަހީރު ހުސެއިން އާއި ރައީފް ރައުފް ހަރަކާތްތެރިވި އެވެ. ޕާކިސްތާނާއި އިންޑިއާ ވާދަކުރާ 19 އަހަރުން ދަށުގެ ސާފް ޗެމްޕިއަންޝިޕްގެ ފައިނަލުގެ ރެފްރީ އަކީ ރާއްޖޭގެ އަލީ ނަދީމް އެވެ. އަދި އެސިސްޓަންޓް ރެފްރީ އަކީ ހުސައިން ޝަހީމް އެވެ.
