މާލީ ހާލަތާ ގުޅޭ ކަންކަން ރައްޔިތުންނަށް ސާފުކޮށްދޭން ޖެހޭ ކަމަށް ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
ނަޝީދު "އެކްސް" ގައި ކުރެއްވި ޕޯސްޓެއްގައި ވިދާޅުވީ މިވަގުތު ހުރިހާ ސިޔާސީ ލީޑަރުންގެ ޒިންމާ ބޮޑުއިރު މާލީ ހާލަތާ ގުޅޭ ކަންކަން ރައްޔިތުންނަށް ސާފުކޮށް ދޭންޖެހޭ ކަމަށެވެ.
"މާލީ ހާލަތު މި ހިސާބަށް ދިޔަ ގޮތާއި، ދެން ވެދާނެ ކަމަށް ލަފާ ކުރެވޭ ގޮތާއި އަދި އަރައިގަތުމަށް އަމަލުކުރަން ރާވާފައި އޮތް ގޮތްތައް ސާފު ބަހުން ރައްޔިތުންނަށް ކިޔައިދޭންޖެހޭނެ،" ނަޝީދު ވިދާޅުވި އެވެ.
ނަޝީދު މިހެން ވިދާޅުވެފައި މިވަނީ ރާއްޖޭގެ ގައުމީ ބޭންކު، ބޭންކު އޮފް މޯލްޑިވްސްއަށް ޑޮލަރު ލިބުން ދަތިވެ، ރުފިޔާ ކާޑުތަކުން ކުރެވޭ ޑޮލަރު މުއާމަލާތްތައް އެއްކޮށް ކަނޑާލައި ކުރިން ދޫކޮށްފައިވާ ކްރެޑިޓް ކާޑުތަކުގެ ލިމިޓު 100 ޑޮލަރަށް މިއަދު ކުޑަކޮށްފައިވާ ދަނޑިވަޅެއްގަ އެވެ.
މި ބަދަލުތައް ގެނައީ ބޭންކަށް ޑޮލަރު ލިބުން ދަތިވެ ގަންނަން ލިބޭ ޑޮލަރަށް ވުރެ އިތުރަށް ބޭންކުން ވެސް ޑޮލަރު ހޭދަކުރަން ޖެހުމުގެ ސަބަބުންނެވެ.
ބީއެމްއެލްގެ އެ ނިންމުމާ ގުޅިގެން ރައްޔިތުން އަންނަނީ އެކަމާ ވަރަށް ބޮޑަށް ނުރުހުން ފާޅުކުރަމުންނެވެ. އޭގެ ތެރޭގައި ބޭރުގައި ކިޔަވާ ދިވެހި ދަރިވަރުން ވެސް އަންނަނީ ކަންބޮޑުވުން ފާޅުކުރަމުންނެވެ.
އޭގެއިތުރުން ގިނަ ބަޔަކު އަންނަނީ ސަރުކާރުން ހަރަދު ކުޑަ ކުރުމަށް ސިޔާސީ ވަޒީފާތައް މަދު ކުރުމުގެ ބަދަލުގައި އާންމު ރައްޔިތުންނާ ގުޅޭ ކަންކަމުގައި ދަތި ކުރާތީ ވެސް ނުރުހުން ފާޅުކުރަމުންނެވެ.
