މިދިޔަ މެއި މަހު ރައީސް ތަސްދީގުކުރައްވައި ސަރުކާރުގެ ގެޒެޓްގައި ޝާއިއުކުރައްވާފައިވާ ކާބޯތަކެތީގެ ގާނޫނަށް އިއްޔެ އަމަލުކުރަން ފެށުމާ އެކު ލޯކަލް ކައުންސިލްތަކަށް ބޮޑު ޒިންމާއެއް ހަވާލުވެއްޖެ އެވެ.
އެ ގާނޫނުގައިވާ ގޮތުން، މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އަކީ އެ ގާނޫނުގެ ދަށުން އަލުން އުފެދޭ އިދާރާއަކަށް ވާއިރު، ރަށްތަކަކާއި ސިޓީތަކުގައި އެ އިދާރާގެ ބައެއް މަސައްކަތްތައް ހިންގަން ޖެހޭނީ ކައުންސިލްތަކުންނެވެ. އެހެން ނަމަވެސް އެ މަސައްކަތްތައް ކުރާ މުވައްޒަފުންނަކީ އެ އިދާރާއިން ހުއްދަދޭ ބައެކެވެ.
ކާބޯތަކެތީގެ ރައްކާތެރިކަމުގެ ގާނޫނުން ކައުންސިލްތަކާ ހަވާލުވި އެއް ޒިންމާއަކީ އެމްއެފްޑީއޭއިން ހަދާ ގަވާއިދުތަކާއި އުސޫލުތައް އަދި މިންގަނޑުތައް ތަންފީޒުކުރުމެވެ. ކައުންސިލްތަކުގެ މަސްއޫލިއްޔަތުތައް ބަޔާންކޮށްފައި އޮތީ އެ ގާނޫނުގެ ހަތް ވަނަ މާއްދާގަ އެވެ.
އެ މާއްދާގެ ހ. ގެ ދެވަނަ ނަންބަރުގައިވާ ގޮތުން އެމްއެފްޑީއޭގެ ގަވާއިދުތަކާއި އުސޫލުތައް ތަންފީޒުކުރުމަށް ރަށު ފެންވަރުގައި ހޭލުންތެރިކަން އުފެއްދުމަކީ ވެސް ކައުންސިލްގެ ޒިންމާއެކެވެ. އެކަމަށް ޓަކައި ޕްރޮފްރާމްތައް ހިންގުމަކީ ވެސް ކައުންސިލްތަކަށް އެ މާއްދާއިން ލާޒިމުކުރާ ކަމެކެވެ.
އެމްއެފްޑީއޭގެ ހުއްދަ ދޭ މުވައްޒަފުން ލައްވައި ކައުންސިލްތަކުން ކުރަން ޖެހޭ އަނެއް ކަމަކީ ކާބޯތަކެތީގެ ހިދުމަތް ދޭ ތަންތަން ބަލައި ފާސްކުރުމާއި ގަވާއިދާ ހިލާފުވާ ތަންތަނަށް ފިޔަވަޅު އެޅުމެވެ. ކާބޯތަކެތީގެ ޒަރިއްޔާއިން ފެތުރޭ ބަލިތައް ރަށު އަދި ސިޓީ ފެންވަރުގައި ކޮންޓްރޯލްކުރުމަކީ ވެސްް އެ ގާނޫނުގައިވާ ގޮތުން ކައުންސިލްތަކުން ކުރަން ޖެހޭނެ ކަމެކެވެ.
ރައްކާތެރި ނޫން ކާބޯތަކެތި ބާޒާރުން ނެގުމުގައި އެމްއެފްޑީއޭއަށް އެހީތެރިވުމަކީ ވެސް ކައުންސިލްތަކުން ކުރަން ޖެހޭ ކަމެކެވެ.
ގާނޫނު ތަންފީޒުކުރުމަށް ޓަކައި އެމްއެފްޑީއޭއަށް ބޭނުންވާ މައުލޫމާތު ފޯރުކޮށްދިނުމަކީ ވެސް ކައުންސިލްތަކުން ކުރަން ޖެހޭ ކަމެކެވެ.
އެހެން ނަމަވެސް އެ ގާނޫނުގައިވާ ގޮތުން އެމްއެފްޑީއޭގެ އެފަދަ މަސްއޫލިއްޔަތުތައް ކައުންސިލާ ހަވާލުކުރާނީ ކައުންސިލްތަކާ އެކު ހެލްތު މިނިސްޓްރީން ހަދާ އެއްބަސްވުމެއްގެ ދަށުންނެވެ.
