ލަންޑަން (އޮގަސްޓް 22) - ޗެލްސީ އަށް ކުޅެމުން އަންނަ އިނގިރޭސި ދެ ކުޅުންތެރިން ކަމަށްވާ ރަހީމް ސްޓާލިން އާއި ބެން ޗިލްވެލް އަށް ޗެލްސީގެ ޕްލޭނުން ފުރުސަތެއް ނެތް ކަމަށް އެ ޓީމުގެ ކޯޗު އެންޒޯ މަރެސްކާ ބުނެފި އެވެ.
ޗެލްސީން ޖޮއާއޯ ފެލިކްސް އާއި ޕެޑްރޯ ނެޓޯގެ ޑީލް ނިންމުމަށް ފަހު، އެ ކުޅުންތެރިންނަށް ޖޯޒީ ނަމްބަރު ދިންއިރު، ޗެލްސީގެ ބައެއް ކުޅުންތެރިން ބޭނުންކުރަމުން އައި ނަމްބަރު ހިމެނެ އެވެ. އެ ގޮތުން، ނެޓޯ އަށް ދިން ހަތް ނަމްބަރު ޖޯޒީ ބޭނުންކުރަމުން އައީ ސްޓާލިން އެވެ. އަދި ފެލިސް އަށް 14 ނަމްބަރު ދިންއިރު، މިއީ، ޓްރެވޯ ޗަލޯބާ ބޭނުންކުރަމުން އައި ނަމްބަރެކެވެ.
މި ސީޒަނުގައި ޗެލްސީއާ ގުޅުނު ކުޅުންތެރިންގެ އަދަދު އިތުރުއިރު، މުޅި ޗެލްސީގެ ސްކޮޑުގެ އަދަދުތައް 40 އަށް ވުރެ މައްޗެވެ. އެކަަމަކު، މަރެސްކާ ބުނީ އޭނާ މަސައްކަތް ކުރަމުން އަންނަނީ ސީނިއާ ޓީމުގެ 21 ކުޅުންތެރިންނާ އެކު ކަމަށެވެ.
"ދެން ތިބުނާ 15-20 ކުޅުންތެރިން ޕްރެކްޓިސް ކުރަނީ ޓީމާ ވަކިން، ބޭރުން ބޮޑު މައްސަލައެއްގެ ގޮތުގައި މި ކަންކަން ފެނިދާނެ، އަހަރެން އެކަމަކާ ނުވިސްނަން،" މަރެސްކާ ބުންޏެެވެ.
"އަހަންނަށް ހެޔޮ ތި ކުޅުންތެރިންގެ ކޮންޓްރެކްޓް 20 އަހަރަށް މި ކްލަބްގައި އޮތް ކަމުގައި ވިޔަސް އަހަރެން މި އައީ ޓީމާ ގުޅޭ ރަނގަޅު ނިންމުންތަކެއް ނިންމައި މަސައްކަތްކުރަން،"
ސްޓާލިން އާއި ޗިލްވެލާ ބެހޭގޮތުން ކުރި ސުވާލުގެ ޖަވާބުގައި، މަރެސްކާ ބުނީ، އެ ދެ ކުޅުންތެރިން ޕްލޭނުގައި ނުހިމެނޭކަން އެ ކުޅުންތެރިންނަށް ވެސް އަންގާފައިވާނެ ކަމަށެެވެ. އެ ގޮތުން، ސްޓާލިން އަކީ އޭނާ ބޭނުންވާ ސްޓައިލްގެ ވިންގް ކުޅުންތެރިއެއް ނޫން ކަމަށާއި ޗިލްވެލް އަށް ގިނަ ވަގުތެއް ޗެލްސީން ދެވޭނެ ގޮތެއް ނެތް ކަމަށް މަރެސްކާ ވަނީ ބުނެފަ އެވެ.
މީގެ ދެ އަހަރު ކުރިން، ސިޓީން 60 މިލިއަން ޑޮލަރުގެ ޑީލެއްގައި ޗެލްސީއާ ގުޅުނު ސްޓާލިން އެ ޓީމަށް ކުޅުނު ދެ ސީޒަނުގައި ޖުމްލަ އެކު ޖެހުނީ، 19 ގޯލެވެ. ސްޓާލިން އަށް އެއް ފެންވަރެއްގައި ކުޅުން ދެމެހެއްޓުން އުނދަގޫ ކަމަކަށްވެފައިވާއިރު، ޗެލްސީގެ ސަޕޯޓަރުންގެ ނުރުހުން ވެސް އޭނާ އަށް ވަނީ އަމާޒުވެފަ އެެވެ. ޗެލްސީން ސްޓާލިން ކޮންޓްރެކްޓް އުވާލާނަމަ އޭނާ އަށް 60 މިލިއަން ޑޮލަރު ދޭން ޖެހޭނެ އެވެ.
ޗެލްސީން ޗިލްވެލް ގަތީ މީގެ ހަތަރު އަހަރު ކުރިން ލެސްޓާ ސިޓީ އަށް 50 މިިލިއަން ޑޮލަރު ދީފަ އެވެ. ޗިލްވެލް މި ވަގުތު ޗެލްސީގެ ކޮންޓްރެކްޓްގައި ހުރީ، 2027 ވަނަ އަހަރު ޖޫން މަހުގެ ނިޔަލަށެވެ.
