ހުޅުމާލޭ ފޭސް 2ގެ ބޮޑު ބައެއް ފުރިފައި ވާއިރު، ހުސްކޮށް އޮތް ބިންތަކެއް ނުއަގުގައި ވިއްކަން އުޅޭ ކަމަށް، އެކަމުގައި އެޗްޑީސީގެ ފަރާތުން މުއާމަލާތް ކުރި ބައެއް ވިޔަފާރިވެރިންނާއި ފައިސާވެރިން ބުނި ކަމަށް އިއްޔެ ރިޕޯޓުކުރި އެވެ.
ރާއްޖޭގެ ނަން މަޝްހޫރު ވިޔަފާރިވެރިޔަކު "އަދަދު" ނޫހަށް ވިދާޅުވީ އިއުލާނު ކުރުމެއް ނެތި، ހުޅުމާލޭން ވިޔަފާރި ބޭނުމަށް ބިމާއި ދިރިއުޅުމަށް ގޯތި ވިއްކަން މަސައްކަތް ކުރާ ކަމަށެވެ. ވިޔަފާރި ބޭނުމަށް ބިން ދޫކުރަނީ ރަސްމާލެ ހިއްކުމުގެ ބަދަލެއްގެ ގޮތުގައި، އެ މަސައްކަތް ކުރިޔަށް ގެންދިޔަ ސީއެމްސީ ކުންފުންޏަށް ދިން ބިން ކަމަށް ވިޔަފާރިވެރިޔާ ވިދާޅުވި އެވެ.
"އެތަނުން، 4000 އަކަފޫޓު ވެސް، 5000 އަކަފޫޓު ވެސް ވިއްކަން އެބަ އުޅޭ. އަކަފޫޓެއް ވިއްކަނީ 4000ރ. އަށް،" އޭނާ ވިދާޅުވި އެވެ.
ހުޅުމާލޭން ބައެއް ބިންތައް މިހާރު ވެސް ގަނެފައިވާ ފައިސާވެރިޔަކު ވިދާޅުވީ ހުޅުމާލޭން ގޯތި ވިއްކުމަށް އެޗްޑީސީގެ ފަރާތުން މީހަކު އޭނާއަށް ހުށަހެޅި ކަމަށެވެ.
"އެ މީހުން ހުށަހެޅީ 2،000 އަކަފޫޓުގެ ބިމެއް އަކަފޫޓެއް 4000ރ. އަށް،" އޭނާ ވިދާޅުވި އެވެ.
