މިދިޔަ ހަފުތާގައި ރާއްޖެއަށް ކުރި ވިއްސާރާގައި މާލެ ސަރަހައްދުގެ އިމާރާތްތަކަށާއި ހިފާ ގެންގުޅޭ ތަކެއްޗަށް ލިބުނު ގެއްލުން އަށް ލައްކަ ރުފިޔާއަށް ވުރެ މަތި ކަމަށް ނެޝަނަލް ޑިޒާސްޓާ މެނޭޖުމަންޓް އޮތޯރިޓީ (އެންޑީއެމްއޭ) އިން މިއަދު ބުނެފި އެވެ.
އެންޑީއެމްއޭއިން ބުނީ މާލޭން ފެން ބޮޑުވުމުގެ ސަބަބުން އެސެސްމަންޓް ހަދަން ޖެހޭ ކަމަށް 41 ގެއެއް ފާހަގަކުރެވުނު ކަމަށެވެ. ނަމަވެސް ހަތަރު ގެއަކުން އެސެސްމަންޓް ހަދަން ބޭނުން ނުވާ ކަމަށް އެންގުމުން އެސެސްމަންޓް ހެދީ 37 ގެއެއްގެ ކަމަށް އެ ތަނުން ބުންޏެވެ.
"އިމާރާތަށާއި ހިފާ ގެންގުޅޭ ތަކެއްޗަށް 819،549ރ. ގެ ގެއްލުން ލިބުން،" އެސެސްމަންޓުން ލިބުނު ގެއްލުން ކަމަށް ވަޒަން ކުރެވުނު އަދަދު އެންޑީއެމްގެ ރަސްމީ އެކްސް އެކައުންޓުން ކުރި ޕޯސްޓުން ހާމަކޮށް ލިޔެފައިވެ އެވެ.
މާލޭގެ އިތުރުން، ވިއްސާރާގައި އެހެން ރަށްރަށަށް ލިބުނު ގެއްލުންތައް ވަޒަން ކުރުމުގެ މަސައްކަތް ކުރަމުންދާ ކަމަށް އެންޑީއެމްއޭން ބުންޏެވެ.
މިއަދު މެންދުރު ފަހު 2:00 ޖެހުމާ ހަމައަށް 13 ރަށެއްގެ 77 ގެއަކަށް ގެއްލުން ލިބިގެން އެސެސްމަންޓް ހެދުމަށް ފޯމު ހުށަހަޅާފައިވާ ކަމަށް އެންޑީއެމްއޭން ބުންޏެވެ. އަދި ތިން ރަށެއްގެ ދަނޑުބިންތަކަށް ވެސް ގެއްލުން ލިބިފައިވާ ކަމަށް އެ އޮތޯރިޓީން ބުންޏެވެ.
ރާއްޖޭގެ އެކި ސަރަހައްދުތަކަށް ބޯކޮށް ވާރޭވެހި މޫސުން ގޯސްވެގެން އުޅޭތާ ހަފްތާއެއްހާ ދުވަސް ފަހުން މި ހަފުތާ ގިނަ ހިސާބުތަކަށް މޫސުން ރަނގަޅެވެ. ނަމަވެސް ވައިގަދަ ވާނެ ކަމަށް މެޓް އޮފީހުން ބުނެފައިވެ އެވެ.
