ރާއްޖޭގައި މަސައްކަތް ކުރަން ބިދޭސީން ގެންނައިރު ދައްކަން ޖެހޭ ކޯޓާ ފީ އާއި ވޯކް ޕާމިޓް ފީ އަދި ބަހައްޓަން ޖެހޭ ސެކިއުރިޓީ ޑިޕޮސިޓަށް ގެންނަ ބަދަލުތަކާއި އެއް ގައުމަކުން ރާއްޖެއަށް ގެނެވޭނެ އެންމެ ގިނަ ބިދޭސީންގެ އަދަދު އަހަރަކު ދެ ފަހަރު ހާމަކުރަން ހިމަނައި ވަޒީފާއާ ބެހޭ ގާނޫނަށް ބަދަލު ގެނައުމަށް ހުށަހަޅާފައިވާ ބިލު މިއަދު ފާސްކޮށްފި އެވެ.
މި ބިލު ދިރާސާކުރީ 241 ކޮމިޓީންނެވެ. އެ ކޮމިޓީން ގެނައި ބަދަލުތަކާއެކު ބިލު ފާސްކުރީ 65 މެންބަރުންގެ ވޯޓާއެކު އެވެ. މި ބިލާ ދެކޮޅަށް 10 މެންބަރުން ވޯޓު ދެއްވި އެވެ.
އެ ކޮމިޓީން ގެނައި މައިގަނޑު އެއް އިސްލާހަކީ އަހަރެއްގެ ތެރޭގައި ރާއްޖެއަށް ގެނެވޭނެ ބިދޭސީންގެ އަދަދާއި ދާއިރާތަކާއި އެއް ގައުމަކުން އެންމެ ގިނައިން ބިދޭސީން ގެނެވޭނެ އަދަދާއި ދާއިރާތައް ކަނޑައަޅައި އަހަރަކު ދެ ފަހަރު އާންމުކުރަން ޖެހޭ ގޮތަށް ގެނައި ބަދަލެވެ. މީގެކުރިން އޮންނަ ގޮތުން ވަކި އެ އަދަދު ގަވާއިދުން ހާމަކުރަން ނުޖެހެ އެވެ.
ބިދޭސީން ގެންނައިރު ދައްކަން ޖެހޭ ކޯޓާ ފީ އާއި ވޯކް ޕާމިޓް ފީ އަދި ބަހައްޓަން ޖެހޭ ސެކިއުރިޓީ ޑިޕޮސިޓަށް ވެސް މި ބިލު ގާނޫނުގައި ހިމެނުމުން ބަދަލުތަކެއް އަންނާނެ އެވެ.
އެގޮތުން, ނަގާ ސެކިއުރިޓީ ޑިޕޮސިޓަކީ ގެންނަ ބިދޭސީ މީހަކު އަނބުރާ ގައުމަށް ފޮނުވާލުމަށް ޓިކެޓަށް ހަރަދުވާ ވަރަށް ވުރެ އިތުރުވެގެން ނުވާނެ އަދަދެއް ކަމަށް ވަނީ ކަނޑައަޅާފަ އެވެ. ކޮމިޓީން ބިލު ދިރާސާކުރަމުންދިޔަ ވަކި އަދަދެއް ހިމެނުމަށް ބައެއް މެންބަރުން ހުށަހެޅުއްވި އެވެ.
