މާޓާޓޯއިން އިންތިޒާމުކޮށް ރާއްޖޭގައި ފުރަތަމަ ފަހަރަށް މޯލްޑިވްސް ޓްރެވެލް ކޮންފަރެންސްގެ ވިމެންސް އެޑިޝަން ހޮޓެލް ޖެންގައި މިއަދު ބާއްވައިފި އެވެ.
ކޮންފަރެންސް ހުޅުވައި ދެއްވަމުން މާޓާޓޯގެ ސީއީއޯ އާމިނަތު ސޫޒަން ވިދާޅުވީ މިއީ އަންހެނުންނަށް ދިމާވާ ގޮންޖެހުންތަކާ ގުޅޭގޮތުން ފެށޭ މޫވްމަންޓެއް ކަމަށާއި ކޮންފަރެންސްގައި އަންހެނުންނަށް ދިމާވާ އެކި ކަންކަމާ ގުޅޭ ގޮތުން މަޝްވަރާ ކުރެވޭނެ ކަމަށެވެ.
"އަންހެނުންގެ ތަރައްގީ އާއި ކުރި އެރުމަށް މަސައްކަތް ކުރަން ޖެހޭ. އެންމެ ފަސް ޕަސަންޓު އަންހެނުން ޓޫރިޒަމް ދާއިރާގައި ހަރަކާތްތެރިވަނީ. މިކަން ބަދަލުކުރަން ޖެހޭ. މިއީ ފެށުމެއް،" ސޫޒަން ވިދާޅުވި އެވެ.
މޯލްޑިވްސް ޓްރެވެލް ކޮންފަރެންސް ވިމެންސް އެޑިޝަން 2024
ކޮންފަރެންސް ޝަރަފުވެރި ކޮށްދެއްވާ ރައީސް ޑރ. މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދު ވިދާޅުވީ ޓޫރިޒަމްއަކީ ރާއްޖޭގެ ބެކްބޯން ކަމަށްވާއިރު އެ ދާއިރާގައި އަންހެނުންގެ ބައިވެރިވުން މަދުވަނީ ކީއްވެތޯ ބަލަން ޖެހޭ ކަމަށެވެ.
އަންހެނުންގެ ބައިވެރިވުން އެކި ދާއިރާތަކުގައި އިތުރު ކުރެވޭނެ ގޮތްތައް ހޯދަން ޖެހޭކަން ފާހަގަކުރައްވާ ސާޖިދާ ވިދާޅުވީ އަންހެނުންނަށް ދިމާވާ ގޮންޖެހުންތަކަށް ހައްލު ހޯދުމަށް މަސައްކަތްކޮށް ހަމަހަމަކަން ގާއިމުކުރަން ޖެހޭ ކަމަށެވެ.
"50 އަހަރުވީ ޓޫރިޒަމް ދާއިރާގައި އަންހެނުން މަދުވުމަކީ ކަންބޮޑުވާ ކަމެއް. އެކަން ބަދަލުކޮށް ހޭލުންތެރިކަން އިތުރުކުރަން ޖެހޭ. ސަރުކާރުން ވެސް ދަނީ ޖެންޑާ އިކުއަލިޓީއަށް މަސައްކަތްތަކެއް ކުރަަމުން،" ސާޖިދާ ވިދާޅުވި އެވެ.
އެ ކޮންފަރެންސްގައި ވިމެން އިން މެނޭޖްމަންޓް އާއި ވިމެން އިން ޓޫރިޒަމްއާ ގުޅޭ ޕެނަލް ޑިސްކަޝަންއެއް ވަނީ ކުރިއަށް ގެންގޮސްފަ އެވެ.
