މެޑްރިޑް (އޮގަސްޓް 18) - ސީޒަނެއް ދިގުލަައި ގިނަ މެޗުތަކެއް ކުޅެން ޖެހި ކުޅުންތެރިންނަށް އޭގެ ސަބަބުން ކުރާ ނޭދެވޭ އަސަރުން ލުުޔެއްދިނުމުގެ ގޮތުން ރެއާލް މެޑްރިޑްގެ ކުޅުންތެރިންނަށް ޗުއްޓީ ޕްލޭނެއް އެބައޮތް ކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފި އެވެ.
އަންޗެލޮޓީ، މި ގޮތަށް ބުނެފައިވަނީ، ފީފާ އިން ފުޓްބޯޅަ ކަލަންޑަރަށް ގެންނަ ބަދަލުތަކާއި އާ މުބާރާތްތައް ތާވަލުކުރާގޮތުން، ކުޅުންތެރިންނަށް އޭގެ ނޭދެވޭ އަސަރު ކުރާ ވަރަށް މެޗު ކުޅެން ޖެހުމާ ގުޅިގެން އުފެދިފައިވާ މައްސަލަތަކާ ބެހޭގޮތުން ކުރި ސުވާލެއްގެ ޖަވާބުގަ އެވެ.
ޕްރޮފެޝަނަލް ފުޓްބޯލް އެސޯސިއޭޝަނާއި ކުޅުންތެރިންގެ ޔޫނިއަން ފިފްޕްރޯ އިން އަންނަނީ ފީފާ އިން ކަލަންޑަރު ރާވާގޮތާ މެދު ހިތްހަމަނުޖެހި، ގާނޫނީ ގޮތުން އޭގެ ހައްލެއް ހޯދަން މަސައްކަތް ކުރަމުންނެވެ.
"ކުޅުންތެރިން އެބަ ބޭނުންވޭ އަރާމްކުރަން ވެސް. ކުޅުންތެރިން ބޭނުންވާނެ ޗުއްޓީ ވެސް. މި ކަންކަމަށް ބަލާފައި ސީޒަނުގެ ތެރޭގައި، ވަކިވަކި ކުޅުންތެރިންނަށް ޗުއްޓީ ދެވޭނެ ދުވަސްތައް ބަލައި، އޭގެ ޕްލޭނެއް އަހަރެމެން އެބަ ގެންގުޅެން،" އަންޗެލޮޓީ ބުންޏެވެ.
އޭނާ ބުނީ މެޑިކަލް ޓީމުގެ ލަފާ ހޯދައިގެން، މި ޗުއްޓީ ޕްލޭން ރޭވުމުގެ އެންމެ ބޮޑު ބޭނުމަކީ، ކުޅުންތެރިންނަކީ ނަފްސާނީ އަދި ޖިސްމާނީގޮތުން ދުޅަހެޔޮ ބަޔަކަށް ހެދުމުގެ ބޭނުމުގައި ކަމަށެވެ.
"ރެއާލްގައި މި ތިބީ ގައުމީ ޓީމުތަކުގެ ކުޅުންތެރިން. އެ މީހުންނަށް އިންޓަނޭޝަނަލް ބްރޭކެއް އައި ކަމުގައި ވިޔަސް މި ޖެހެނީ މެޗު ކުޅެން. އެ ހުރިހާ ކަަމަކަށް ބަލާފައި، އަހަރެމެން އެބަޖެހޭ ކުޅުންތެރިންނާ މެދު ވިސްނައި ކަންތައްތައް ރަނގަޅުކުރަން. އެހެންވެ، މި ގޮތަށް ޗުއްޓީއެއް މި ދެނީ، އާއިލާއާ އެކު ވަގުތުު ހޭދަކޮށް، އަމިއްލަ ނަފްސަށް ވެސް އަރާމްކުރަން ވަގުތު ދޭން،" އަންޗެލޮޓީ ބުންޏެވެ.
ރެއާލުން މިދިޔަ ސީޒަނުގައި ސްޕެނިޝް ލީގާއި ޗެމްޕިއަންސް ލީގު ކާމިޔާބުކުރިއިރު، މި ސީޒަން ފެށީ ޔުއެފާ ސުޕަ ކަޕް ތަށި ހޯދައިގެންނެވެ.
ސްޕެނިޝް ލީގުގައި ރެއާލް ކުޅޭ ފުރަތަމަ މެޗުގައި މިރޭ ރަށުންބޭރުގައި މަޔޯކާއާ ދެކޮޅަށް ކުޅޭނެ އެވެ.
