އިޒްރޭލުން ފަލަސްތީނުގެ ގާޒާގައި ހިންގަމުންދާ ގަތުލްއާންމުގައި މިހާތަނަށް މަރުވި މީހުންގެ އަދަދު 40،000 އަށް ވުރެ އިތުރުވެއްޖެ އެވެ.
މިދިޔަ އަހަރުގެ އޮކްޓޯބަރު، 7 އިން ފެށިގެން އިޒްރޭލުން ހިންގާ މި ގަތުލްއާންމުގައި އެންމެ ގިނައިން މަރުވެފައި ވަނީ ކަމާ ނުބެހޭ ކުޑަކުދިންނާއި އަންހެނުން ކަމަށް ރިޕޯޓްތައް ބުނެ އެވެ.
"މަރުވި 40،005 މީހުންގެ ތެރޭގައި 16،456 ކުޑަކުދިންނާއި 11،000 އަށްވުރެ ގިނަ އަންހެނުން ހިމެނޭ،" ގާޒާގެ ހެލްތު މިނިސްޓްރީން ބުންޏެވެ.
ގާޒާއަށް މެދުކެނޑުމެއް ނެތި ކޮންމެ ދުވަހަކު އިޒްރޭލުން އަންނަނީ ހަމަލާ ދެމުންނެވެ. އެ ހަމަލާތައް އަމާޒު ކުރަމުން އަންނަނީ ވަގުތީ ހިޔާވެހިކަން ހޯދައިގެން ތިބި ތަންތަނަށެވެ.
ގާޒާގައި ހިންގަމުންދާ ގަތުލްއާންމު ހުއްޓުވަން މުޅި ދުނިޔެ ނުކުޅެދިފައިވާ ކަމަށް ގިނަ ބަޔަކު އަންނަނީ ބުނަމުންނެވެ. އެގޮތުން އަނިޔާވެރިކަން ހުއްޓުވަން އިޒްރޭލާއެކު އެއްވެސް ގައުމަކަށް މިހާތަނަށް އެއްބަސްވުމަކަށް އާދެވިފައެއް ނުވެ އެވެ.
އެމެރިކާއިން ވެސް ހަނގުރާމަ ހުއްޓުވަން މަސައްކަތް ކުރަމުންދާ ކަމަށް ބުނި ނަމަވެސް، އެ ގައުމުން ވެސް ދަނީ އިޒްރޭލަށް ވާގިވެރިވެ ބޭނުންވާ ހަތިޔާރުތައް ވެސް ފޯރުކޮށްދެމުންނެވެ.
މީގެ އިތުރުން އަރަބި ގައުމުތަކުން ވެސް ފަލަސްތީނާއެކު އޮތްކަން ހާމަކުރި ނަމަވެސް، ހަނގުރާމަ ހުއްޓުވަން އެ ގައުމުތަކަށް ވެސް އެދެވޭ މަސައްކަތެއް ނުކުރެވޭ ކަމަށް ގިނަ ބަޔަކު އަންނަނީ ބުނަމުންނެވެ.
