މިލާން (އޮގަސްޓް 16) - އިޓަލީގެ ފުޓްބޯޅަ ފެޑެރޭޝަން (އެފްއައިޖީސީ) އިން ކުށުގެ މައުލޫމާތު ސާފުކުރުމަށް ފަހު، ނިއުކާސަލް ޔުނައިޓެޑަށް ކުޅެމުން އަންނަ އިޓަލީގެ މިޑްފީލްޑަރު، ސަންޑްރޯ ޓޮނާލީ، 10 މަހަށް ފަހު އެނބުރި ކުޅުމަށް އަންނަން ތައްޔާރުވެއްޖެ އެވެ.
ގަވާއިދާ ހިލާފަށް ބެޓް ކުރުމުގެ ކަންކަމުގައި ބައިވެރިވެފައިވާތީ، ޓޮނާލީ މި ވަގުތު ހުރީ 10 މަހުގެ ސަސްޕެންޝަނެއްގަ އެވެ. ކުރިން ބެލެވުނު ގޮތުގައި، މި މައްސަލައިގައި ޓޮނާލީއަށް ތިން އަހަރުގެ ސަސްޕެންޝަނެއް އައުން ގާތެވެ. ނަމަވެސް، މި މައްސަލައިގެ ތަހުގީގަށް އެހީވުމުގައި ޓޮނާލީގެ ފަރާތުން ލިބުނު އެއްބާރުލުން ފާހަގަކޮށް އޭނާގެ އަދަބު ކުޑަކުރަން އިޓަލީގެ ފެޑެރޭޝަނުން ނިންމީ އެވެ.
ޓޮނާލީ، އެ އަދަބު ތަންފީޒުކުރަމުން ދަނިކޮށް، މިދިޔަ މާޗް މަހު، އިނގިރޭސި އެފްއޭ އިން ވަނީ ޓޮނާލީއާ ގުޅޭ ބެޓިންގެ އާ މައްސަލައެއްގައި އޭނާއާ ސުވާލުކުރަން ފަށައިފަ އެވެ. އެއީ، ނިއުކާސަލް އަށް ބަދަލުވި ފަހުން، 40-50 ދެމެދުގެ އަދަދަކަށް މެޗުތަކަށް ބެޓްކޮށްފައިވާތީ އެވެ. އޭގެ ތެރޭގައި ނިއުކާސަލް ކުޅުނު ހަތަރު މެޗަށް ބެޓް ކުރުން ވެސް ހިމެނެ އެވެ. މި މައްސަލަތައް ބަލައި، އިނގިރޭސި އެފްއޭ އިން ނިންމީ، ޓޮނާލީ އަށް އިތުރު، ދެ މަހުގެ ސަސްޕެންޝަނެއް ދޭށެވެ. އެކަމަކު، މި ސަސްޕެންޝަނަށް އަމަލުކުރަން ޖެހޭނީ މި ފަދަ މައްސަަލައެއް ތަކުރާރުވެއްޖެނަމަ އެވެ.
ނިއުކާސަލްގެ ޕްރީ ސީޒަން ޕްރެކްޓިހުގެ ތެރެއިން ޓޮނާލީ: އޭނާ އަށް އަންނަ މަހު ކުޅުމުގެ ތެރެއަށް އެނބުރި އާދެވޭނެ.
ނިއުކާސަލް އިން އާ ސީޒަނަށް ތައްޔާރުވުމުގެ ގޮތުން، ޓޮނާލީގެ ސަސްޕެންޝަނާ ގުޅޭ ކަންކަން އޮޅުންފިލުވުމަށް، އިޓަލީ ފުޓްބޯޅަ ފެޑެރޭޝަނަށް ލިޔުނެވެ. ޖަވާބުގައި، އިޓަލީ ފެޑެރޭޝަނުން ބުނެފައިވަނީ، އޮގަސްޓް 27 ގެ ނިޔަލަށް ޓޮނާލީގެ ސަސްޕެންޝަން މުއްދަތު ހަމަވާނެ ކަމަށާއި އިތުރަށް ތަންފީޒުކުރަން ޖެހޭ އަދަބެއް ނެތް ކަމަށެވެ.
އޭސީ މިލާން ދޫކޮށް، މިދިޔަ އަހަރުގެ ޖުލައި މަހު، ނިއުކާސަލަށް ޓޮނާލީ ބަދަލުވީ، 64 މިލިއަން ޑޮލަރުގެ ޑީލެއްގަ އެވެ. ނިއުކާސަލް އަށް އެންމެ 12 މެޗު ކުޅުނުތަނާ ޓޮނާލީ އަށް ސަސްޕެންޝަން އައުމުން، މިދިޔަ ސީޒަން އެއްކޮށް ގެއްލުނީ އެވެ.
ނިއުކާސަލްގެ ކޯޗު އެޑީ ހޯވް ބުނީ، ފުރަތަމަ މެޗުތައް ޓޮނާލީ އަށް ގެއްލުނު ނަމަވެސް އުންމީދަކީ، ސެޕްޓެމްބަރު މަހުން ފެށިގެން މެޗުތަކުގައި އޭނާ ބޭނުންކުރުމަށް ކަމަށެވެ.
އެ ގޮތުން، އެންމެ އަވަހަށް ވެސް ޓޮނާލީ އަށް އެނބުރި ކުޅުމަށް އާދެވޭނީ، ސެޕްޓެމްބަރު މަހު އެއް ވަނަ ދުވަހު ޓޮޓެންހަމް ހޮޓްސްޕާސްއާ ކުޅޭ މެޗުގަ އެވެ.
