ލަންޑަން (މެއި 4) - ގަވާއިދާ ހިލާފަށް މެޗުތަކުގައި ބެޓްކުރުމުގެ މައްސަލަތަކެއްގައި މި ވަގުތު ސަސްޕެންޝަނެއްގައި ހުރި ނިއުކާސަލް ޔުނައިޓެޑްގެ މިޑްފީލްޑަރު، ސަންޑްރޯ ޓޮނާލީ އަށް އިނގިރޭސި އެފްއޭ އިން އެންމެ ފަހުން ދިން އަދަބާ މެދު ޝަކުވާއެއް ނެތް ކަމަށް ނިއުކާސަލްގެ ކޯޗު އެޑީ ހޯވް ބުނެފި އެވެ.
ގަވާއިދާ ހިލާފަށް ބެޓް ކުރުމުގެ ކަންކަމުގައި ބައިވެރިވެފައިވާތީ، ޓޮނާލީ މި ވަގުތު ހުރީ 10 މަހުގެ ސަސްޕެންޝަނެއްގަ އެވެ. އެ އަދަބު ތަންފީޒުކުރަމުން ދަނިކޮށް، މިދިޔަ މާޗް މަހު، އިނގިރޭސި އެފްއޭ އިން ވަނީ ޓޮނާލީއާ ގުޅޭ ބެޓިންގެ އާ މައްސަލައެއްގައި އޭނާއާ ސުވާލުކުރަން ފަށައިފަ އެވެ.
އެއީ، ނިއުކާސަލް އަށް ބަދަލުވި ފަހުން، 40-50 ދެމެދުގެ އަދަދަކަށް މެޗުތަކަށް ބެޓްކޮށްފައިވާތީ އެވެ. އޭގެ ތެރޭގައި ނިއުކާސަލް ކުޅުނު ހަތަރު މެޗަށް ބެޓް ކުރުން ވެސް ހިމެނެ އެވެ.
މި މައްސަލަތައް ބަލައި، އިނގިރޭސި އެފްއޭ އިން ނިންމީ، ޓޮނާލީ އަށް އިތުރު، ދެ މަހުގެ ސަސްޕެންޝަނެއް ދޭށެވެ. އެކަމަކު، މި ސަސްޕެންޝަނަށް އަމަލުކުރަން ޖެހޭނީ މި ފަދަ މައްސަަލައެއް ތަކުރާރުވެއްޖެނަމަ އެވެ.
ނިއުކާސަލްގެ ކޯޗު ހޯވް، ބުނީ، ޓޮނާލީގެ ފަރާތުން ފެންނަނީ ޕްރޮފެޝަނަލް ކުޅުންތެރިއެއްގެ ފަރާތުން ފެންނަން ޖެހޭ ކަންކަން ކަމަށެވެ. އަދި އޭނާ އަށް ކުރެވުނު ކުށަށް އިއުތިރާފްވެ، ތަހުގީގަށް އެއްބާރުލުން ދީ، ކްލަބުން އެދުނު ގޮތަށް މުސާރަ ވެސް ކުޑަކޮށްގެން ހުރުމަކީ، އޭނާ ފުޓްބޯޅަ ކެރިއަރަށް ދޭ އަހައްމިއްޔަތުކަން ފެންނަ ކަމެއް ކަމަށް ހޯވްގެ ވާހަކައިގައި ފާހަގަކޮށްފައިވެ އެވެ.
މިހާރު އޮތްގޮތުން، ޓޮނާލީ އަށް އެނބުރި ކުޅުމަށް އާދެވޭނީ މި އަހަރުގެ އޮގަސްޓް މަހުގަ އެވެ.
އިޓަލީގެ ދެ ވަނަ ޑިވިޝަނުގަައި ބްރެޝިއާ އަށް އުމުރުން 17 އަހަރުގައި ކުޅެން ފެށި ޓޮނާލީ ވަނީ އެ ޓީމު 2018-2019 ވަނަ އަހަރުގެ ސީޒަނުގައި އިޓާލީގެ އެއް ވަނަ ޑިވިޝަނުގައި ކުުޅުނުއިރު، އެ ޓީމަށް ކުޅެފަ އެވެ. ޖެހިގެން އައި ސީޒަނުގައި ބްރެޝިއާ ރެލިގޭޓްވުމުން، ޓޮނާލީ 2020 ވަނަ އަހަރު ލޯނަކަށް މިލާނާ ގުޅުނީ އެވެ. އަދި މިލާނުން ވަނީ 2021 ވަނަ އަހަރު ޓޮނާލީގެ އެއްބަސްވުން ދާއިމީ ކޮށްފަ އެވެ.
ނިއުކާސަލުން މިދިޔަ އަހަރު ޓޮނާލީގެ ސޮއި ހޯދީ، 70 މިލިއަން ޑޮލަރުގެ ޑީލެއްގެ ދަށުން ފަސް އަހަރުގެ ކޮންޓްރެކްޓެއްގަ އެވެ.
