ލަންޑަން (އޮގަސްޓް 15) - އެތުލެޓިކޯ މެޑްރިޑަށް ބަދަލުވާން ހުރިހާ ކަމެއް ނިމުނު ކަަމަށް ބެލެވުނު، އިނގިރޭސި މިޑްފީލްޑަރު، ކޮނާ ގެލަގާގެ ޑީލްގެ ކަންކަމުގައި މައްސަލަތަކެއް ދިމާވެ، އޭނާ ކުރީގެ ކްލަބް ޗެލްސީ އަށް އެނބުރި އަންނަން ޖެހިއްޖެ އެވެ.
ގެލަގާ، 24، އަށް ޗެލްސީން އެންމެ ފަހުން ކޮންޓްރެކްޓް އާ ކުރަން ހުށަހެޅި ދެ ޕްރޮޕޯސަލަށް ވެސް އޭނާ ވަނީ ފުރަގަސްދީފަ އެވެ. އޭގެ ފަހުން، ޗެލްސީން ވަނީ އެތުލެޓިކޯ އިން ގެލަގާ ގަންނަންް ހުށަހެޅި 40 މިލިއަން ޑޮލަރުގެ ޑީލަށް އެއްބަސްވެފަ އެވެ.
އެ އަށް ފަހު، ގެލަގާ ވަނީ އޭނާގެ އޭޖެންޓާ އެކު، މެޑްރިޑަށް ދަތުރުކޮށްފަ އެވެ. އަދި އެތުލެޓިކޯގެ ސްޓޭޑިއަމް ވަންޑާ މެޓްރޮޕޮލިޓާނޯގައި، އެ ކްލަބްގެ އޮފިޝަލުންނާ އެކު، ގެލަގާ ގިނަ ބައްދަލުވުންތަކެއް ބޭއްވި އެވެ. ފަސް ދުވަހު، މެޑްރިޑްގައި މަޑުކުރުމަށް ފަހު، ގެލަގާ، އެނބުރި ޗެލްސީ އަށް އަންނަން ޖެހުނީ، އެތުލެޓިކޯ އާއި ޗެލްސީގެ މެދުގައި އެއްބަސްވާން ޖެހޭ ކަންކަން ހަމަނުޖެހި ހުރުމުން ކަމަށް ރިޕޯޓްތައް ބުނެ އެވެ.
ސްޕެއިނުގެ މީޑިއާ ރިޕޯޓްތައް ބުނާގޮތުން، ގެލަގާ، އެތުލެޓިކޯ އަށް ބަދަލުވުމުގެ ކަންކަން ހުއްޓުނީ، ޗެލްސީން އެތުލެޓިކޯގެ ފޯވާޑް ސަމޫ އޮމޮރޮޑިއޯންގެ ގަންނަން ކުރި މަސައްކަތް ނާކާމިޔާބުވުމުންނެވެ. ޗެލްސީ އާއި އެތުލެޓިކޯ އިން ނިންމީ ގެލަގާ އާއި އޮމޮރޮޑިއޯންގެ ޑީލުގެ ލިޔެކިޔުންތައް އެކުއެކީގައި ނިންމަން ކަމުގައިވާއިރު، ފަހު ވަގުތު އޮމޮރޮޑިއޯން ބޭނުންވާ ކަންތައްތަކެއްގެ ޔަގީންކަން ޗެލްސީ އަށް ނުދެވުމުން އެ ޑީލް ހުއްޓުނީ އެވެ. އަދި އޭގެ އަސަރު ގެލަގާގެ ޓްރާންސްފާ އަށް ވެސް ކުރީ އެވެ.
ގެލަގާ، މިހާރު، އަންނަނީ ޗެލްސީގެ ކޮބްހަމް ޓްރެއިނިން ފެސިލިޓީގައި އަމިއްލަ އަށް ޓްރެއިނިން ކަންކަން ކުރިއަށް ގެންދަމުންނެވެ.
ރިޕޯޓްތައް ބުނާގޮތުން، ގެލަގާ، އެތުލެޓިކޯ އަށް ދާން ބޭނުންވާއިރު، މިހާރު އެ ޑީލް ކުރިއަށްގެންދެވެން އޮތް ގޮތަކީ، ޗެލްސީން އެތުލެޓިކޯ އަށް ކުޅޭ ޕޯޗުގަލްގެ ޖޮއާއޯ ފެލިކްސް ގަންނަން ކުރާ މަސައްކަތް ކާމިޔާބުވެއްޖެނަމަ އެވެ.
ޗެލްސީ އެކަޑަމީން ފެށި، ގެލަގާ ވަނީ ލޯން އުސޫލުން، ޗާލްޓަން އެތުލެޓިކް، ސްވަންސީ ސިޓީ، ވެސްޓް ބްރޮމްވިޗް އަލްބިއަން އަދި ކްރިސްޓަލް ޕެލަސް އަށް ކުޅެފަ އެވެ. މިދިޔަ ސީޒަނުގައި ޗެލްސީގެ ކެޕްޓަން ބޭންޑް އަޅައިގެން ގިނަ މެޗުތަކުގައި ކުޅުނު ގެލަގާ ވަނީ ޗެލްސީ އަށް ކުޅެދިން 95 މެޗުން އެ ޓީމަށް 10 ލަނޑު ޖަހައި، 10 ލަނޑު ޖަހަން ފުރުސަތު ތަނަވަސްކޮށްދީފަ އެވެ.
